ESAY 46
46
Baa ma Babilon taw ge wo go
1Bel hrag we go gesiŋ,
Nebo gun we go ti kẽẽ.
À kaŋ fodo ɓaaran ti horog wo,
ti horog ma de balge wo.
Nday soɗ ra, nday far ra go ti taʼ taʼ,
á kol wo diŋ fen põõre ti horog ma soɗgen wo.
2Á gun wo go ti kããra,
hrag wo go gesiŋ.
Á kãã wo ma maŋ põõre go ne jobo ti gà
day saara de see ɓaara à hoo ge ra wo go ti daŋgay lay.
3Coʼ we sug ɓi nday jar ma liŋ ni Jakob no,
nday ɓuy maga nday gwaʼ ti tiŋ mani Israyeln mono,
nday maga ndi hay ko ngar ɓay le hãã ɓil man ɓay,
nday maga ndi soɗ nday le hãã ti biŋgi ɓay mono.
4Wo go hãã ti tããbe ɓay ndi joŋ ge mbi tum diŋ ndi ma ɓo no,
hãã go ti wur maga nday gar go ndi kay ge mbi nday yaŋ tum.
Ndi hay joŋn le go day ndi mbi tum de dage ga ndi soɗ we,
ga ndi kay we, ga ndi yãã nday go.
5Nday ngaɓ ge ndi nà de wose noga nday kol ge ndi bà degaʼ de wosela?
Nday tayge wùr bà de wose nen maga wùr mo hay de far kããra so la?
6Á pug wo boo biŋni ma ɓi ndar ɓaaran wo go,
kaŋ wo solay boo wo ti klew.
Saara raw poɗ je yor boo biŋni no,
nen maga á mo joŋ baa ne saara,
day saara raw goŋge ɓe raw wo leɗ monɗra pel ɓe.
7Á soɗ wo ne, deŋn wo de bay ɓaara day wo wo kaŋge ɓe
ti ngel maga á taw de kaŋge ni taʼ tuu mono.
Á ndor go ga men ngel ɓen go gà hase!
À mo ra baa ne hẽn ti, se yiŋ jag draʼ gà lay,
yãã jobo go jag re gà lay.
Je yãã jarn bay le go hãã wa
8Fer we ɗig ti ti seno day ni nday joŋ we fen jar kluuri!
Nday jar ma ti graŋ no,
ɗig we wer re sen le jiili ɓay!
9Fer we ɗig ti ti fẽẽre maga hay joŋ wo le taŋgu mono
werga ndi diŋ Baa no,
ma tigriŋ bay wa so hase.
Ndi diŋ Baa no, mopo ma doo ndi nono bay wa hase.
10Ndi wãã le go ti mopo maga joŋ ge yaŋ wo pel go ti tĩĩgi wer hãã.
Ndi wãã go ti fen maga joŋ gà ɗa le go taŋgu pel bol hãã.
Ndi wãã ga mo ɓi maga ndi de kaŋge ɓe
pel ɓi ma joŋ ge joŋ ge yaŋ day ndi joŋ ge fen maga ndi
ɗig joŋge ɓe ge go ɓuy.
11Ndi ɗe wedwee ma bag này le nen wur botoŋ,
ndi ɗe bloo ma bag jag joŋre ɓin wo go le ti sir ma hãã.
Fen maga ndi hay wããn go ndi a ge de ɓe,
fen maga ndi hay ɗign le go ɓil ɓi ndi bag jag ɓe go.
12Coʼ we sug ɓi nday jar ma de hig jiili no,
nday maga nday maŋ wer wo go hãã see fen ma ti ngel ɓen mono!
13Ndi a ge yaŋ de keɗed ɓi no,
á bay wo go hãã wa.
Ndi ge yaŋ de pẽẽge ɓi no, á ig gi le gà.
Ndi kaŋ ge pẽẽgen yaŋ ti Siyoŋ,
ndi hee ge mo ma grag ndi de wooren yaŋ ne Israyel ti.
Currently Selected:
ESAY 46: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
