ESAY 44
44
Bosaʼ joŋ ge ti Israyele
1Patala laa mbo so Jakob wejõõ ɓi no,
ndo Israyel maga ndi hay maŋ mo go ma ɓi mono!
2Manwur maga hay joŋ ndo,
hay ʼwũy ndo le go ti wur biŋgi ɓo day diŋ dog ɓon wãã ga :
Joŋ hẽẽne wa, wejõõ ɓi Jakobe,
ndo Yesurun maga ndi hay maŋ mo go mono.
3Werga ndi cwaa ge bii yaŋ ne mo ma jwaalen ti,
ndi yuu gi bii yaŋ ne sir ma de hegn ti.
Ndi cwaa ge Nenterse ɓin yaŋ ne wer mani ɓon wo ti,
ndi cwaa ge bosaʼ ɓin yaŋ ne cẽw mani ɓon wo ti.
4Á tĩĩ gi yaŋ le yoofíi ma ɗilig wo doo kesme ti jeŋ bii yuuri wo.
5Je maapo wãã ge ga : Ndi diŋ ma Manwuri,
je ma lan ga se ti wer mani Jakob no ma lan pa,
sen yer ge yaŋ go doo ɓe tiʼ ga :
Diŋ ma Manwuri! Day se kaŋ ɗúu Israyel yaŋ ne see ɓe.
Baa ma tigriŋ bay wa so
6Manwuri, Waŋ Israyel no, je maga fer le cooge ɓe,
Manwur Pantwayn wãã gana : Ndi diŋ je ma taŋgu no, ndi
diŋ je ma blam no, baa ma tigriŋ bay go faale ɓi wa so.
7Wose wãã yaŋ go ti see ɓe foɗaŋ doo ndi no la?
Á mo wãã mbe day mo wããn go me de el so!
Á mo tĩĩn wo le ti wur maga ndi lag wer jar wo le
hãã mo ɓaa no, day mo wãã wo fẽẽre
maga hay joŋ wo le noga fen maga joŋ ge yaŋ wo pel go ɗa so la!
8Caa we hẽẽne go wa, daɗ we wa lay.
Ndo hay le ɓaa tuu laage ɓe day ndi hay siigi ɓe ne ndo tum gà yawla?
Nday diŋ jar sedewa ɓi.
Baa ma tigriŋ yaŋ mbe go faale ɓi yawla?
Húulì ma tigriŋ bay wa so, ndi bay de ko ma tigriŋ wa so lay.
Jar ceɗ fodo sõõren wo no
9Jar maga joŋ wo fodo sõõren bay wo diŋ mopo meʼ wa
hase. Joŋre ɓaara maŋ wo mopo ne jobo meʼ gà hase.
Á wo de see ɓaara tuu diŋ sedewa ti see ɓaara.
Fodon bay wo de nen ti wa, bay wo de ko mopo wa lay.
Sõõre wùu gi ti yaŋ go ne hara.
10Wose sen ga yaʼ ʼwũy baa noga raw yor fodo po bay ma
daʼ mopo le ni wa lay la?
11Kidolgi kããre ɓen wùu gi wo ti yaŋ go de sõõre,
jar ceɗgen wo de see ɓaara tuu wo nà diŋ jar téebeere.
Daga á mo tay wo ɓuy, mo á wo lagge taʼa,
ama hẽẽne caa ge ra yaŋ go ɓuy,
sõõre joŋ ge ra yaŋ ɓuy lay.
12Je torgen toon doo maga à too klaɓ no lay,
laa wùu de hegre day raw too fodo sõõn de bìgì.
Á maŋ doo ɓe maʼge ɓe de egre debaŋ.
Koŋne cee ne, se hoo egre go.
Á jo bii gà kola se go de gayre.
13Je ceɗ koon raw ngaɓge ɓe de saale,
raw klir mo ma de puy go ti ngaɓge ɓe no.
Á ceɗn go de weklaɓe, gaɗn go de mo ma ngaɗ fẽẽre no,
day ʼwũyn go de maŋ je táabay,
doo je táabay nono nen maga á mo hay ɓil tiŋ sõõ po.
14Á raw car koo seder wo,
hoo koore rufer wo de koore cen wo,
raw kiɗgi yoo koore ma yoowayn wo.
Á peɗ koore Buwis wo day baa raw rage ti ɓe, gẽẽ ra go.
15Koore sen la je táabay roɗ ra.
Se hoo te ɓe yaʼ bor wùu ɓe,
hoo see ɓe heen wer wùu ma ɓoʼ hoole lay.
Day maga gwaʼ ni mono se raw joŋ baa de ɓe,
leʼ monɗra pel ɓe.
Á ceɗ fodo baa de ɓe day se a pel ɓe goŋge ɓe.
16Á hee te koon go ti wùu ma kar này ɓe ma rege,
á cog này ɓen go day wùu go.
Se hay go yeʼ bor wùu day raw wããge gana :
May pa, ndi bor wùu jag ɓi, nen ɓi mbe ne wùu ti taʼ ɗa so!
17Te koo maga gwaʼ ni mono, se raw joŋ baa de ɓe,
ceɗ fodo de ɓe day se raw age pel ɓe goŋge ɓe.
Á leʼ monɗra ne hẽne, tos ne, raw wããge go jag ciŋ kloŋ gana :
Yãã ndi go, werga ndo diŋ baa ɓi no!
18Á bay wo de ko re noga de ti ngel wa werga à rãã nen
ɓaara go nen maga á mo koo wo nen wa.
Á hig jiili ɓaara go nen maga á mo laa wo wer mopo wa.
19Je sen bay ɗig re sen meʼ le jiili ɓe wa,
koge ɓe kãã gà lay.
Á bay de ti ngel nen maga se wãã ga :
Ndi roɗ te ɓen go ti wùu, ndi ɓoʼ hoole go de jaŋre ɓe,
ndi cog này go day ndi reen go,
ndi raw joŋ fen yeɗe de te ɓe maga gwaʼ nà joŋge la gà.
Á ɗig ga ndi yaʼ goŋ gurdum koo nà goŋge la gà.
20Á fer ɓen mbe blulgi nen sããge no werga jiili ɓe
ma de ɓlagge raw egre ɓe.
Á yãã ge see ɓe go gà lay day wãã ge ga :
Mo sen doo ɓi mokay diŋ jããge gà lay.
Israyel nen ferge ɗig ti ti Baa
21Fer ɗig ti ti seno, Jakobe, ndo Israyel no,
werga ndo diŋ wejõõ ɓi!
Ndi hay ʼwũy ndo maga ndo mo hay diŋ wejõõ ɓi,
go ma ɓi. Ndi yõõ ge ti go ti ɓo gà Israyele.
22Ndi hay tag debaycõõre ɓon wo go
doo swaare maga dwas go nono,
tag ɓlagge ɓon wo go doo ngloro maga raw go nono.
Fer le see ɓi werga hay coo ndo le nà diŋ ndi.
23Ngel ma ciŋ no, ʼwad we ware,
werga Manwur joŋ mopo we!
Nday tuu ma kuɗum kuɗum ma ti tamsir no,
ngar we jage! Nday húulìn wo no,
ʼwad siŋ blum no!
Nday yoowayn de koore ma yoowayn wo ɓuy lay!
Werga, Manwur coo Jakob we le,
á naa nen togoɗge ɓen we ne Israyele!
Wãã re fẽẽren le ɓaa tuu diŋ Baa
24Manwur maga coo ndo le,
je maga ʼwũy ndo le hãã ti wur
biŋgi ɓo wãã ga : Ndi Manwur,
ndi hay joŋ fẽẽren wo ɓuy,
ndi boŋ tuu ndi go ciŋ ti fẽẽre ma nen ngel ma ciŋ wo.
Ndi mbi de see ɓi tuu ndi joŋ tamsiri.
25Á ɓlag fẽẽre ma jãɗ jarn wo go,
loɗ jar kaŋ halgen wo go.
Á fer ge jar ɗeŋ wo go blam day
kol ge koge re ɓaaran go diŋ loɗge.
26Á bag ge jag wããre mani wejõõ ɓen go,
bag jag fen maga jar peele ɓe wãɗn wo go pel bol go.
Á wãã ti Jerusalem gana :
Jar fer ge wo yaŋ de tiŋ ɓil ɓe, wãã ti
ɓi leege ma Juda wo ga :
À fer yaŋ bor rage tigriŋ
day ndi fer ge yaŋ go hoo tabul ɓaaran wo ciŋ.
27Ndi wii bii ma kuɗumn ga :
Õg go, ndi õg ge maarog ɓo ma de pããregen wo go.
28Ndi wii Sirus ga :
Á diŋ je koɗ jar ɓi no, á bag ge jag ɗiggi ɓin wo ge go ɓuy.
Á wãã ge yaŋ ti Jerusalem ga : Daga fer booge ɓe!
Wãã ge ti tiŋ Baan ga :
Daga ɓoʼ wer ɓe!
Currently Selected:
ESAY 44: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
