ESAY 35
35
Wur ma de wooren wo
1Puulin wo de laalen joŋ ge wo fruygi yaŋ.
Sir maga bay joŋ mopo ɓil wa joŋ ɓil yaŋ go fehe
day fuɗ gi yaŋ go proho.
2Fuɗgi koo yãã ɓil ɓe yaŋ go day se yor yaŋ ciŋ de siŋ
fruygi wo de siŋ blum no.
À hã ge togoɗge ma ti Libaŋ go ne hẽne,
hã ge kluu ma ti Karmel wo de Saron wo go ne hẽne.
Á ko ge wo togoɗge mani Manwurn yaŋ, ko ge wo kluu
mani Baa naan yaŋ.
3Hã we egre ne doo ma de gayren wo,
deŋ we kõyõgre ma ɓaʼgen wo.
4Wii we jar maga jiili ɓaara daŋ go ga :
Coɓ we nen ɓay, joŋ we hẽẽne wa.
Baa ɓayn le de age ma saʼ hee ɓay,
maapoɗ jar hee ɓayn wo ti ɓlagge ɓaara no.
Á a ge nà diŋ se de see ɓe tuu day yãã nday yaŋ go.
5Mo so no, nen jar rẽwre caa ge wo yaŋ go,
sug jar ndigriŋ leʼ wo yaŋ laɗge.
6Je leŋ yor ge yaŋ doo man meene nono,
trum je mbululumn wal yaŋ go werga bii maŋ ge yaŋ
go ti puuli no day pyewre dug gi wo yaŋ go ɓil Araba no.
7Sir ma de hegn kol ge yaŋ go diŋ mangloŋ,
sir ma bay biin kol ge yaŋ go diŋ tuu bii wo lay.
Ti ngel maga wé hay wo go suɗgi ni mono,
fǐiri bii wo de gusur kol wo yaŋ go ni.
8À ɓoʼ ge faage yaŋ go ni,
day à ɗe ge faage sen ga blam faage ma bay ɗag no.
Je ma de ɗag hee ge ni gà á joŋ ge diŋ ma ɓaara tawa.
Jar maga maŋ ge wo faage sen mono, jar bay ko re wo draʼ yee wo go gà.
9Mingir joŋ ge ti faagen ni gà
này po ma bag jar hee ge ni gà hase,
à yiŋ gi bà de ɓe ni draʼ gà.
Jar maga à naa saale gebee go ne hara ti see ge wo ni.
10Doo kay nono, jar maga Manwur hay yãã ra go fer ge wo
yaŋ le day a ge wo yaŋ ɓil Siyoŋ de siŋ blum jage,
fruygi ma tum joŋ ge yaŋ diŋ gawraŋ ma ti ɓaara.
Feg wo de fruygi yaʼ ge wo yaŋ le,
lawge wo de ndumgi maŋ ge wo ɓil yaŋ wo go.
Currently Selected:
ESAY 35: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
