ESAY 34
34
À taw ge sir Edom go
1Yaʼ we le maŋ,
nday jar dehãy no,
ma laa re!
Nday jar no, lag we eŋ laa wããre!
Daga sir de fẽẽre ma ɓil ɓen wo ɓuy mo laa wo,
tamsir de fẽẽre maga tĩĩ wo ti ɓe mo ɓuy mo coʼ wo sugi!
2Werga sõõge ɓil mani Manwurn day leʼge ne wer jar wo ti ɓuy,
bagge põõ ɓen day leʼge ne jar durgi ɓaaran wo ti ɓuy.
Á ga se caa wer ɓaara go, se sraʼ ra go gesiŋ de húulì.
3À tob jar ɓaara ma de daʼ wããge wo go,
fõõre no jar ɓaara maga huɗ wo go yãã ngel
wo go day cíi ɓaara yuu le go ti húulì wo.
4Fẽẽre ma nen ngel ma ciŋ ngroɓ wo go,
ngel ma ciŋ kaa go ti kẽẽ doo kefder nono
day jar durgi ɓaaran baɗ wo nen go
doo ga sug tlalum lwaɗ go nono,
doo maga sug koo hõõ lwaɗ go nono.
5Werga, moslam ɓin taa le go ciŋ
hãã day a le de cwaage ne Edom ti,
ne jar maga ndi go de wããge ga ndi taw ra go mono ti.
6Moslam mani Manwurn go de cíi ti ɓuy,
go de noo này ti,
diŋ cíi weere sããren wo de togloŋren wo,
diŋ noo ma ti hẽẽre gamlaaren wo.
Werga, Manwur de ma joŋ siigi jag ɓe wo Bosra,
á taw ge jar wo go debaŋ ɓil sir Edom.
7Càyn laa ge wo gesiŋ de ɓaara ɓuy,
deeren wo go wer bloore deeren wo lay.
Sir ɓaaran wùu go de cíi, beɗef ɓaaran der go doo noo ɓaara.
8Werga sen diŋ wur maga Manwur saʼ hee see ɓe,
diŋ kiŋgi maga á joŋ bon jar ti fen maga
á hay joŋ wo Siyoŋ de ɓe mono.
9Pyewre ma Edom kol ge wo yaŋ go diŋ keãy ma cog jare,
beɗef ɓen go diŋ sufre,
sir ɓen go doo keãy maga de yorge nono.
10Wùu ɓen huu gi go de suŋ gà lay, de ceg gà lay.
Cug ɓen ndar ciŋ sagsage,
de kiŋgi de kiŋgi sir ɓen joŋ ge nen lawge.
Jobo hee ge ni gà so hase, wo tum tuu.
11Tugturu wo de gecemgecem yãã ge wo ne go,
cigriw wo de gawla bag ge wo tiŋ yaŋ go ni.
Ngeln kol ge yaŋ go poɗag poɗage,
go diŋ gusuŋ-gusuŋ.
12Weere biŋni ɓen joŋ ge wo ni mabaa waŋ gà so,
weere waŋren joŋ ge wo ɓil ɓe ni gà so hase.
13Gusuŋ-gusuŋ tĩĩ wo yaŋ go
ti ngel hayle ɓaara ma de wooren wo,
wũy wo de fíi ma bay blam jaw wo yaŋ
go ɓil kor ɓe ma de egre kiŋkiŋn wo.
Á joŋ ge go diŋ tway ma wé wo,
ngel blulgi gii wo.
14Fẽẽre ma yoofíi yiŋ gi wo wo go
de nàyre ma mbásga wo ni,
togloŋre jãɗ ge wo jag kããra yaŋ wo go ni.
Fensuŋ daʼ ge ngel naw wo de ngel iggi wo go ni.
15Cwe tee ge tuu wo go ni day laa ge pããre ɓe wo go ni.
Se ceʼ ge ra go day suu gi ne weere ɓen wo ti.
Ereŋngã tay ge wo ti wo go ni,
wo ɓuy see kẽẽ yeʼ yeʼe.
16Ko we ne ɓil kefder mani Manwur no,
ni nday kee we ne!
Ma po boŋ yoo nàyre sen wo mo ɓuy gwaʼ ge go gà :
Á tay ge wo ge go see kããra ni ɓuy maapo gwaʼ ge go gà.
Werga jag ɓe wããn go day tay ge ra le nà diŋ Nenterse ɓe no.
17Á go de naa wãywáale ne hara ti sir no,
go de ngaɓge ɓe ne hara de saale de doo ɓe.
Á yããn ge wo yaŋ go ma tum day lag ge
wo yaŋ go ni de kiŋgi de kiŋgi.
Currently Selected:
ESAY 34: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
