ESAY 36

FẼẼRE MA TI KAL MANI WAŊ ESEKIYASN WO

Waŋ soode ma Asirin ɗar Baa

1Nen kiŋgi ma de hwal ti naan ga Esekiyas hay de ma joŋ waŋ mono, Senakerib waŋ Asiri raw urgi le dur ɓi leege ma de egre ma ti sir Judan wo day se raw yãã rage. 2De maga waŋ Asiri hay Lakis mono, se raw ɓoʼ Rabsake ɓen wo Jerusalem see waŋ Esekiyas de soode ma de egre debaŋ wo were. Rabsaken raw woge ooge ti blam bii maga a le ti gloŋ ma nen ciŋn wo ti faage maga leʼ wo ɓil pay mani jar bag law õõben wo mono.

3Mo so no Eliyakim je ni Hilkiyahu je ko wer horog ma liŋ ni waŋn raw wo laage wo go see ɓe de gee Sebna je yergen wo de Yowa je ni Asafn je bag jag fẽẽre ma de yergen wo no. 4Rabsaken raw riŋ rage gana : Ndi kam nday kamge, riŋ we Esekiyas ga : Waŋ ma kluu no, Waŋ Asiri wãã doo kay nono ga : Ndo de kaŋ ɗiggi ɓo nà diŋ ti mayse noga ndo de deŋ see ɓo see ɓe mo la? 5Ndi riŋ ndo ga sen diŋ wããre maga go jag la tawa koɗe, à dur jaw nà diŋ de ɗeŋ wo de egre. Day ɓon patala ndo de kaŋ ɗiggi ti mayse lay so ga ndo joŋ ti graŋ go see ɓi mo la? 6Koɗa, ndo kaŋ ɗiggi ɓo diŋ ti kayge mani Ejipte, fǐiri bii se maga go de hawge day ɓeʼ wosela ɓuy maga deŋ see ɓe ti ɓe doo day nduln go no : Farawoŋ waŋ Ejipte joŋ jar maga kaŋ wo ɗiggi ɓaara ti ɓe mo ɓuy nà doo kay nono. 7Tiga ndo wãã bà yaŋ ga : Wùr de kaŋ ɗiggi wùr nà ti Manwuri, Baa wùr no. Esekiyas caa wer ngel siɗ jag ma ti ngel ma de farge ciŋ wo de ngel siɗ jag wo go nà bay diŋ ngel siɗ jag ne Manwur sen wa yawla? Se day riŋ Juda wo de Jerusalem wo ga : Nday leɗ ge monɗra nà pel ngel siɗ jag ma taʼ la boŋ tuu! 8Patala ndi kam ndo kamge, tay jag go de je wãã re ɓi waŋ Asiri, day ni ndi hã piiri wo yaŋ ne ndo ndar ɓoge tiga ndo kãã yaŋ ma daʼ jar ɗid rage lay blaʼ no. 9Ndo joŋ ge joŋge de maga ndo hoo sug we ti waŋ po boŋ yoo weere jõõre ma kleere mani waŋ ɓin gà mo la? Ndo kaŋ ɗiggi ɓo ti Ejipte wer pus durgi ɓen wo de jar piiri ɓen wo! 10Bà mo pa yaw no, ndi ur le dur sir mo tiʼ la nà ti jag Manwuri. Manwur hay riŋ me ga : See wo dur sir no, ɓlagn go.

11Eliyakim, Sebna wo de Yowa kal wo riŋ Rabsaken ga : Wùr kam mo kamge, wããn ne gebeere ɓon wo de jag Arameyẽẽ werga wùr laa ne, wããn ne wùr de jag Jude nen maga jar ma ti korn laan wo go de sug ɓaara lay wa. 12Rabsaken raw ferge ga : Waŋ ɓin ɓoʼ me le wãã wããre nà diŋ ne nday de je wãã re ɓon yawla? Á nà bay ne jar se ma de lagge ti korn re mbiiri ɓaara, jo tõõ ɓaara wer ɓay mo wa yawla?

13Blam ɓe Rabsaken raw bud see ɓe go, kal wãã wããre go jag ciŋ kloŋ de jag Jude tob egre ɓe go tobge ga : Laa we wããre mani waŋ ma kluu, waŋ Asiri no! 14Waŋ wãã ga : Yõõ we wer Esekiyas wa werga á kãã ge ma yãã nday ge go gà. 15Daga Esekiyas mo kaŋ wer ɓay kaŋ ɗiggi ti Manwur de riŋ ga : Á go cwãy ga Manwur yãã ge naa yaŋ go, day ɓi leegen la kol go doo waŋ Asiri gà nà wa. 16Coʼ we sug Esekiyas wa, gahãyla waŋ Asiri wãã ga : Baa we barge go de ɓi, tay we go wer ɓi ni wosela yoo ɓay re ge leʼge tlalum ɓe wo yaŋ de leʼge hõõ ɓe, wosela yoo ɓay jo ge bii ma ɓi gutug ɓe yaŋ. 17Sen nà hãã wo go ti wur maga ndi a ge, day ndi hoo ge nday wo go ti sir ma doo mani ɓayn la no lay, ɓil sir maga coore ble wo de yii wo ni, ɓi sir hoole wo de joŋge joŋre ɓil pay tlalum. 18Daga Esekiyas mo jãɗ nen ɓay de riŋgi ga : Manwur yãã ge naa yaŋ go wa. Baa mani wer jar ma hon hay yãã sir ɓe go doo waŋ Asiri la? 19Baa ma ɓi leege Hamadn wo de Arpadn wo genla? Baa ma Sefarfayim wo genla? Á yãã wo mbaara Samari we go doo ɓi yawla? 20Yoo baa ma ɓil sir sen wo mo ɓuy no, ma hon hay yãã sir ɓen go doo ɓi nen maga Manwur yãã Jerusalem go doo ɓi mo la?

21Ama saara raw ferge go baʼa, fer wo mopo go ne hẽn ni boŋ gà werga waŋ hay riŋ go ga : Nday fer ge wããre ne hẽn ni gà. 22Eliyakim je ni Hilkiyahu je wãã wããre horog ma liŋ ni waŋ no, Sebna je yergen wo de Yowa je ni Asaf je bag jag fẽẽre ma de yergen raw wo age daʼ waŋ go de ngrag õõbe ma see ɓaaran wo, raw wo fer wããre mani Rabsaken wo ne hẽne.

Currently Selected:

ESAY 36: TUP

Highlight

Copy

Compare