ESAY 33
33
Re ti je ɓlag Jerusalem go no
1Re ti ɓo,
ndo maga ndo frum jar go day à frum ndo ti boŋ gà mono!
Re ti ɓo, ndo maga ndo lag húulí ne jar ti
day à laa mo ti ti boŋ gà ɗa mono!
De maga ndo maŋ ge jag frum jarn we go,
de maga ndo taw ge lag húulí ne jar ti we go no,
à laa ge húulí ne ndo ti lay.
2Manwuri, ko decoo wùri!
Wùr de gor ge nà diŋ doo ɓo.
Hay diŋ egre wùr tum de jag toŋ,
diŋ je yãã wùr go nen wur reen wo no!
3De maga à laa ɓaale ɓo le samge mono,
wer jar daŋ wo,
de maga ndo ur go ciŋ mono,
jar dehãy wel wo go.
4À trom fẽẽre ɓayn wo go doo ɓuy
doo mo maga gejer seɗn wo go nono.
À cor go ne kẽẽ ti corge doo maga maapoɗ
cor wo go ne kããra ti nono.
5Manwur go ciŋ ti jar werga a le go de hayle ciŋ.
Á baa ɓil Siyoŋ go de fẽẽre ma ti faage ɓe no,
de keɗed no.
6Á joŋ ge nen maga ndo mo see
go de yõõ ti nen naw ɓon wo.
Ɗeŋ wo de koge re wo diŋ horog maga yãã jobo go,
joŋge hẽẽne doo Manwur mo nà diŋ horog ɓe no.
Waŋkluu joŋ ge jar go nen ti taʼa
7Blumri durgin wo go ti war ti faage wo,
jar age de soole jawn ra wo debaŋ.
8Blam faage huɗ wo go,
jobo bay heege ti faagen wa so.
Á ɓlag wo tayge jagn go,
á ɓoʼ wo foo ɓi leegen wo go
day se bay hoo sug ti jobo wa so hase.
9Sirn go nen lawge, á puu go.
Yooway ma ti húulì Libaŋn go nen sõõre,
cog ti go gesiŋ.
Ful Saron kol go doo laale nono,
sir Basan wo de húulì Karmel puu wo go.
10Patalam no, ndi ur gi yaŋ ciŋ,
Manwur wãã nono.
Patalam no, ndi bud ge see ɓi go.
Patalam no, à maŋ ge ti ɓi yaŋ ciŋ.
11Nday hay maŋ diŋ ɓiili hõõ horog wo,
nday raw biŋgi diŋ fíi.
Ɓodge egre ɓayn diŋ wùu maga roɗ ge nday go.
12Wer jar roɗ ge wo yaŋ go doo mo ma ti ngel jiɗ fẽẽre nono,
doo hõõre maga à car ra go day roɗ wo ti wùu nono.
13Nday maga nday wo go hãã hãã mono,
laa we re maga ndi hay joŋ mono!
Nday maga nday la mbaŋ mono,
ko we egre ɓin so!
14Jar ɓlaggen ma ɓil Siyoŋn wo go de hẽẽne.
Jar ɗar Baan wo go de daɗge day wo ga :
Wose kãã ge yaŋ yoo naa
ma ooge ti jeŋ wùu ma roɗ jarn la?
Wose kãã ge yaŋ yoo naa
ma ooge ti jeŋ jaŋre wùu ma tumn wo la?
15Je maga see diŋ ti fen ma ti ngel ɓe wãã diŋ mo ma ti faage ɓe no.
Á day yãã mo maga à daʼn le de hram gà
baa doo ɓe see daʼ ge ma de koɗn gà.
Á day coʼ sug wããre ma kaa cíi jarn go gà
laa õõbe go nen ɓe maga se mo ko ɓlaggen wa lay.
16Diŋ wersen á hay ge yaŋ go ti ngel ma ciŋ hããn wo.
Húulì ma kiŋkiŋn joŋ ge wo yaŋ diŋ ngel iggi ɓe.
À hã ge hoole yaŋ ne hẽne,
á daʼ ge bii yaŋ go de yõõ ti.
Jerusalem daʼ ge see ɓe yaŋ
17Nen ɓo ko ge waŋn yaŋ go de woore ɓen ɓuy,
ndo ko ge kluu sirn yaŋ go de nen ɓo ɓuy lay.
18Ndo ngrum gi jag yaŋ ti hẽẽne
maga hay joŋ moge mono ga :
Ɓa je yergen wo de je yãɗ lombon wo genla?
Je maga hay kol go wãã wããre tiŋ
ma de gẽẽren wo ɓuy nà genla?
19Nen ɓo ko ge jar yurguy yoo jarn wo gà so hase,
jar se maga jag ɓaara gaali ma laage lay,
jag ɓaara diŋ jag dehãy maga
à daʼ wer ne hẽn gà lay mono.
20Kaŋ nen ɓo ti Siyoŋ,
ɓi leege maga diŋ ngel yiŋgi wùrn mono!
Nen ɓo ko ge Jerusalem ngel iggi ma de woore no,
tiŋ naw maga à jwidn gi go gà so hase,
à ndar ge gefay ɓen wo ge go gà has
day á pog ge saale ɓen wo go gà hase.
21Sen kidolgi nà diŋ fen maga kaŋ nen
ga Manwur kluu ti wùr mono.
Á see wùr doo maarog ma de pããregen wo nono,
doo log ma de diy maga daage ma durgi caa wo nen ɓe go gà hase,
day daage biŋni po hee wo ni gà lay nono.
22Werga Manwur diŋ je cag re wùr no.
Manwur diŋ je ɓod jag liŋgin ne wùr no.
Manwur diŋ waŋ wùr no,
je yãã wùrn go nà diŋ se.
23Ma ɓo ndo je hee no, saale ɓon ngloʼ wo go,
á bay wo de baŋ ko ɓon wa so,
bay wo go mbeɗ õõbe ma dig leegen wa so lay.
Doo kay no so no,
à ɓes mbe fẽẽre maga à yãã ra le jag jaw koɗ so,
hayba jar leŋre wo draʼ a wo ti frumgi fẽẽre ni lay.
24Je ma ɓi leege maga riŋ ga :
Ndi de cegè, bay wa.
Á fug ɓil go ne jar maga wo de tiŋ ɓi leege
Jerusalem go ti debaycõõre ɓaara no.
Currently Selected:
ESAY 33: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
