ESAY 31
31
Re ti jar deŋ see ɓaara see Ejipte no
1Re ti jar maga raw wo wo Ejipte kiɗ kayge,
deŋ wo see ɓaara ti piirin wo,
day kaŋ wo ɗiggi ɓaara ti ngaɓa pus durgin wo
de jar yaɗ piirin wo werga á wo de egre mono!
Re ti jar maga bay wo mbuɗ nen ɓaara ne
je ma bay ɗag ma Israyeln ti wa,
day kiɗ wo Manwur gà mono!
2Paga á nà diŋ je ma de ɗeŋ maga faage kaŋge re
ne jar tin nen ɓe mo yaw no.
Á bay go jwag jag ɓe ti wããre ɓen wo wa.
Á ur de tiŋ mani jar ɓlaggen wo,
de jar caa war jar joŋ debaycõõren wo.
3Je Ejipten diŋ je táabay, á bay diŋ Baa wa.
Piiri ɓen wo diŋ nàyre wo,
á bay wo diŋ nenterse wa.
De maga Manwur maŋ ge doo ɓe we ciŋ no,
je ma caa war Ejipten say ge go,
je maga à caa war ɓe le leʼ ge go gesiŋ lay.
Saara taw ge go jag taʼ boŋ ɓuy.
Je yãã Jerusalem go diŋ Manwur boŋ tuu
4Manwur hay riŋ me doo kay nono gana :
Doo maga mingiri noga wel mingir ra
de pegge ne này maga se baan ti tiʼ i,
men see ɓe go caa hẽẽne doo ngaɓa
jar koɗge maga tay wo ti ngar jage noga mbarge ɓe gà mono,
Manwur Pantwayn cwaa ge le durgi ti húulì Siyoŋ,
wel húulì ɓen nà doosen no lay.
5Doo maga wedwee dur ti weere ɓe wo no mono,
Manwur Pantway ur gi yaŋ go ciŋ ti Jerusalem doosen no lay.
Á oo ge yaŋ ti ɓe, yããn yaŋ go,
oo ge yaŋ go ne hẽn nene day joŋ ge yaŋ
ga re po mo caa ra wa so.
6Fer we le see je maga nday hay
maŋ ɓil wo go see ɓe has has mono,
nday jar ni Israyel no!
7Ti wur sen mo so no,
wosela ɓuy lag ge baa ɓe maga se joŋ ra de boo solay
wo de boo biŋni wo yaŋ wo go,
baa se maga nday hay joŋ ra de doo ɓay wo mono.
8Je Asirin leʼ ge yaŋ go jag moslam maga bay
diŋ moslam ma doo je táabay wa mono.
Moslam maga bay diŋ ma doo je táabay wa kaf ge nen ɓe yaŋ.
Á yãã ge yaŋ de ɗee doo moslam no,
weere ma jõõre ɓen kol ge wo yaŋ go gebeere.
9Je maga hay doo húulì ɓen nono daŋ ge yaŋ de ɗee doo hẽẽne,
waŋre ɓen caa ge wo hẽẽne yaŋ go doo drapo no.
Kay diŋ jag Manwur maga le de ngal wùu ti Siyoŋ,
day le de laa wùu ma hiɓ le Jerusalem mono.
Currently Selected:
ESAY 31: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
