ESAY 30
30
Re ti tayge jag de Ejipte no
1Re ti weere ma ti graŋn wo,
Manwur wããn nono.
Á tay wo ma ɓod faare wããre ɓaaran wo bay ndi,
tay wo jag de jar bay laa jag ɓi,
ma cab ɓlagge ne see ɓaara ti ni pa.
2Á wo go jag seele yaw,
ma woge Ejipte bay wii ndi.
Sen nà ma woge kiɗ ngel yãã waŋ see Farawoŋ,
ma kiɗ duuli wo nen cee Ejipte.
3Ngel yãã waŋ mani Farawoŋ joŋ ge sõõre yaŋ ne nday.
Duuli ma nen cee Ejipten kaŋ ge sõõre yaŋ ne nday ti.
4Minisdir ɓen wo wo go Sowan yaw.
Jar ɓe maga se laa ra day wo we go Hanes yaw.
5Á fer wo yaŋ go ɓuy de sõõre wer
jar po maga maŋ ge wo mopo ne hara gà lay,
caa ge wo war ɓaara gà lay,
kay ge wo ra gà lay mono.
Á kol ge wo yaŋ diŋ fen kaŋ sõõre ne ra ti,
diŋ fen mbuɗ fuy ɓaara yaw.
Haya, nday jar kiɗ kayge ma Ejipte no
6Põõre ti nàyre ma ɓil Negefn wo.
Á caa wo sir ma bay bii ma de bon no,
hee wo ɓil sir maga man mingir wo de bloo mingir a wo le ni mono,
sir maga bondro wo de manmbuyuri ma de graŋ tin a wo le ni mono.
Á hoo wo horog ɓaara wo ti gerhẽẽre wo,
hoo wo nen horog ɓaaran wo ti yoŋyoŋ wo
ma woge de ɓaara ne jar po maga kay wo ra
ti mopo meʼ gà has mono!
7Werga, caage war mani Ejipten diŋ ngel de koɗ koɗ has tuu,
diŋ wersen ndi wãã go ti ɓe poɗag ga á diŋ
je maga re de caage ɓe ti ngel iggi ɓe mono.
Ko we see ɓay see ngel ma pel no
8A le patala, yer fẽẽre sen wo go pel ɓaara ti húulì ma de ceɗge,
krig ra go ɓil kefder nen maga á mo hay wo tum ni,
hãã wo go ti naw ma blam no, wo tum sag sage.
9Werga á wo diŋ jar ma ti graŋ,
wo diŋ weere maga bay wo yãã jag wa,
wo diŋ weere maga bay wo dage
ga saara coʼ sug jag liŋgi mani Manwurn lay wa.
10Á wiɗ wo jar ko nen wo gana : Ko we nen wa!
Wiɗ wo jar ndar nen wããre Baa gon wo gana :
Ndar we nen re ma ti ngel ɓen wo ne wùr wa,
wãɗ we ne wùr diŋ fẽẽre
maga sen coo wo yaŋ jag wùr mono.
Ndar we diŋ nen fẽẽre maga kay wo wùr gà mono!
11Men we faagen go,
cel we go ti faage no,
kaŋ we nen wùr ti je ma bay ɗag ma Israyeln wa!
Re caa ge nday mbale
12Diŋ wersen je ma bay ɗag ma Israyel wãã so ga :
Wer maga nday day yãã wããre sen gà
nday kaŋ ɗiggi ɓay diŋ de joŋge girgir wo de mege faagen go,
day nday kol ra diŋ fen deŋ see ɓay so mono,
13ɓlagge sen joŋ ge yaŋ see ɓay doo
glig ma de gẽẽre maga mun go ma leʼge,
waʼ ɓil go day kola se leʼ we go doo ni tuu yaw nono.
14À tig nen ɓe go doo ga à tig nen hárngáŋ
cããge mani jar borgen wo go teʼ teʼe,
day à men nen ɓe po meʼ ma maŋ wùu
ɓi swee noga ma ɗa bii jag gutug gà nono.
Lag we de kaŋ ɗiggi ti ɓi
15Werga, Waŋkluu, Manwuri,
je ma bay ɗag ma Israyeln hay wãã ga :
Nday daʼ ge see ɓay nà diŋ de ferge le see Baa,
de lagge ɗegede.
Egre ɓayn joŋ ge nà diŋ de maga nday lag eŋ,
day nday kaŋ ɗiggi ɓay we go sog boŋ ti Baa mono!
Ama, nday laa dayge gà.
16Nday day ga :
Bay wa, wùr daŋ ge yaŋ ti piiri wo!
Diŋ wersen nday ngraɗ ge kidolgi de ɗeere.
Nday ga :
Wùr ɗii ge fẽẽre ma deege deparday wo yaŋ!
Diŋ wersen jar maga maŋ ge wo blam ɓay
niigi joŋ ge wo deparday lay.
17Jar ndar daŋ ge wo yaŋ jag taʼ boŋ doo je ma boŋ nono,
nday daŋ ge de ɗeere doo jar dwee hãã
nday kol ge yaŋ wo go ne frẽw frẽw
doo koo ma de coʼge ti húulì nono,
doo drapo ciŋ ti húulì ma lub nono.
Baa fer ge ko decoo Israyele
18Diŋ wersen Manwur de gorge ma ferge ko decoo ɓay,
á ur gi yaŋ ciŋ ma joŋ ɓil de el ti ɓay
werga Manwur diŋ Baa ma keɗede :
Woore ti jar maga gor wo doo ɓe mo ɓuy no!
19Werga jar po lag ge wo mbaara yaŋ de tiŋ Siyoŋ
wo de Jerusalem ɗa pa.
Ndo raage gà so hase!
Á ko ge decoo ɓo yaŋ ti ɗúu maga ndo ɗen ge jag ti roo mono.
De maga á laa ge gẽẽge ɓo no kay tuu,
se yiŋgi jag ne ndo tuu.
20Waŋkluu hã ge hoole yaŋ ne nday de maga nday nen re mono.
Ndi hã ge bii yaŋ ne nday de maga nday nen lawge mono.
Je ma had ndon yoŋ ge see ɓe gà so,
day nen ɓo ko ge je had ndon yaŋ.
21Sug ɓo laa ge wããre yaŋ le nen blam ɓo ga :
Faagen mo tiʼ no, see we ni!
Sen mo nà de maga nday leʼ we ferge ti ɓaŋ war layblaʼ
ti ɓaŋ gùr layblaʼ mono.
22Nday ko ge boo solay ma de korge see fodo baa ɓayn wo yaŋ
de boo biŋni ma de biŋgi see ɓaaran wo doo fẽẽre yeɗe wo nono.
Ndo lag ge besgem ɓaaran wo yaŋ go doo jããre nono.
Ndo wãã ge yaŋ ga : Lag ra wo go ti jããre.
23Mo so no serage baa yaŋ ne ndo ti mbeere
mo ɓo maga ndo joʼn ge gesiŋ mono,
day hoole maga ndo daʼ ge le pay joŋ ge yaŋ
de coɓge lay, lwiɗ lwiɗ lay.
Ti wur sen mono,
horog ɓon raw ge wo yaŋ wo rege ti ngel koɗge ma pliypliy wo.
24Bloore deere wo de gerhẽẽre ma jeegen re ge
wo yaŋ diŋ hõõ ma de manda ti,
diŋ hõõ maga à gasn ge go gasge
de ko wo de fen faʼ fẽẽre.
25Ti wur idgi jar ma kluu no,
ti wur maga tiŋ ma de gẽẽren leɗ wo go gesiŋ mono,
pyewre wo de bii yuuri joŋ ge wo yaŋ go ti húulìn wo ɓuy,
ti ngel ma de maŋge ciŋ ma honla ɓuy lay.
26Few tee ge ngel yaŋ go doo wur nono,
wur tee ge ngel de daŋ maga se teen ɓaale renam
doo maga à tay ma nen naw renam wo go ti kããra nono.
Sen nà ti wur maga Manwur saʼge wããge mani
jar ɓen wo day ruggi wããge maga
à car ne hara see go mono.
Sir Asiri leʼ ge go gesiŋ
27Ko we, ɗúu Manwur le de rage le hãã.
Baage põõ ɓen de ti ngel wùu debaŋ,
á diŋ põõre ma kluu debaŋ.
Jag ɓe fõõ waŋ budi day trum ɓe
doo wùu ma de hãã nono.
28Ɓoɗge egre ɓe doo pyew maga dug go,
caa jar go soole yeʼe,
day hã bii wer jar go diŋ de hãge bii ma taw jar gon nono.
Á doo bugrum ma jãɗ jag jar wo nono.
29Nday ʼwad ge siŋ yaŋ doo ma nen ngel suŋ
ti wur maga à de ma joŋ few nono.
Ɓil ɓay joŋ ge yaŋ go feh doo je
maga maŋ ɓaale de roo síilí nono,
de maga nday wo ge ti húulì mani Manwur no,
see Húulì ma Israyeln mono.
30Manwur kaŋ ge nen ɓay yaŋ
ti gẽẽge ɓe ma de woore no,
ti doo ɓe ma de põõre ga leʼ ne jar
ti de bagge põõ ma debaŋ no,
de wùu ma yããge de hãã jag no,
ti doo ɓe maga maŋ bii ne jar ti,
kaŋ degurleege wo de húulì-baa ne jar ti lay mono.
31Mo so no,
je Asirin caa ge hẽẽne yaŋ go doo gẽẽge Manwuri,
day Manwur maʼn ge yaŋ de genày ɓe no.
32De maga jag graw maga Manwur mbarn ge de ɓe mo ɓuy no,
à laa ge gẽẽge tembale wo de dilna wo lay.
Manwur maŋ ge doo ɓe yaŋ go ciŋ
tinoo poɗag kay ma durgi ɓe.
33Le go ɓaa tuu à go de tay jag hããre taʼa,
à go de ngal wùu kaʼ see waŋ Asiri,
diŋ wùu ma ngil lay ma hiɓ lay.
Wùu se ga à ɓoʼn ge nen ɓe
diŋ wùu day hããre ɓen debaŋ lay.
Ɓoɗge egre Manwur doʼn ge go doo pyew wùu sufre nono.
Currently Selected:
ESAY 30: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
