ESAY 29
29
À yãã ge Jerusalem go
1Re ti Ariyel, ti Ariyel,
ɓi leege maga Dafid hay laa tiŋ ɓen ni mono.
Jwag we kiŋgin wo go ti kããra,
daga wur fewn mo joŋ wo go ti wur ɓaara tum tum.
2Ama ndi fer ge Ariyel yaŋ go blam.
Wǔy wo de ndumgi joŋ ge wo yaŋ ni
day ɓi leegen kol ge yaŋ go nen ɓi diŋ Ariyele.
3Ndi kaŋ ge yaŋ mo jag go de cir ti ɓo cwẽẽ ɓuy.
Ndi heb mo yaŋ de jar durgi wo
day ndi cir gi ti ɓo yaŋ go de fẽẽre durgi wo.
4Ndo fer ge yaŋ go gesiŋ,
ndo wãã ge wããre yaŋ le gesiŋ tiʼ i.
Ndo sweg ge wããre yaŋ swegge doo ga ndo le nen sir nono.
À laa ge gẽẽge ɓo yaŋ no gag gag doo je maga bir le go ɓi tuu nono.
À laa ge wããre ɓo yaŋ le nen sir ne swe swe no.
5Ngaɓa jar hee ɓon joŋ ge wo doo ɓurgi ma de saʼ sãy ɗilig nono.
Ngaɓa jar joŋ bon jar sen joŋ ge wo doo fíi
maga pud ciŋ wer leege nono.
Reen naa ge mbe ndo doo tuu.
6Manwur Pantwayn yam ge ndo yaŋ le de carge põõ baa,
de daɗge sir wo de ngarge jag ma joŋge hẽẽne,
doo degurleege wo de swìli,
de wùu ma yããge ma de hãã nono.
7Doo maga lwaʼge wo de mbuɗgi nen ma de suŋ joŋ wo nono,
ngaɓa jar maga a wo le ti wer jar wo ɓuy
ma dur Ariyel de jar maga a ge wo mo ɓuy ma yiŋ rage
ma heb rage de kor ɓe ma
de egre kiŋkiŋn joŋ ge wo nà doosen no lay.
8Ngaɓa jar ma ti wer jar maga dur gi wo húulì Siyoŋ
joŋ ge wo doo je maga lwaʼ ga se re
day pũy go la ɓil ɓe de koɗ nono,
doo je maga jwaale de kaŋge ɓe
day lwaʼ ga se jo bii nono.
Reen maʼ nen ti jar go
9Ngris we ni nday ngil we!
Rãã we nen ɓay go ni nday hay we go rẽwre!
Á wo go de taage,
ane bay diŋ doo yii wa!
Á leɗ wo kenam kenam,
ane bay diŋ doo fẽẽre joge ma taɗ jarn wo wa!
10Werga Manwur de kaŋ naa ma dingil jar ne nday ti.
Á rãã nday go nday jar ndar nen wããre Baa go no.
Á maʼ nen ti ɓay go nday jar ko nen no.
11Re maga à naa nen ɓe ɓuyn see ɓay doo
wããre ma ɓil kefder po ga de kaŋ kase ti,
à hãn ne je ma de ko keege ga á mo keen go,
se raw ferge ga se kãã ma keege ɓe gà
werga á go de kaŋ kase ti nono.
12Á joŋ doo kefder maga
à hãn ne je maga ko keege gà ga á mo keen go,
se raw ferge ga se kãã ma keege ɓe gà
werga á go de kaŋ kase ti nono.
Reen ndar ge wo nday doo tum
13Waŋkluu ga :
De maga jar sen wo la a wo see ɓi mono,
á togoɗ wo ndi go jag la tawa,
ama jiili ɓaara wo go hãã see ɓi.
Hẽẽge maga á hẽẽ wo ndi mono diŋ jag liŋgi po
maga je táabay joŋn doo fen tosge ɓe no koɗ no.
14Diŋ wersen so,
ndi de see ɓi, ndi ngel ge jar sen la wo yaŋ go tum
de fẽẽre mbuɗgi wo de fẽẽre ma ngil jar wo,
Ɗeŋ mani jar ɗeŋ yee ge nen yaŋ go ni,
ti mani jar ma de tin daŋ ge yaŋ yoŋge.
Nday sog Baa go glog so ge?
15Re ti jar maga yoŋ wo see ɓaara doo
Manwur ma yoŋ ɗiggi ɓaara doo ɓe mono.
Á joŋ wo joŋre ɓaaran wo nen suŋgu day saara wãɗ ga :
Wose de ko naa noga wose de daʼ wer ne naa la?
16Sen diŋ ɓlur mayse joŋ we doosen no la?
À nen ko je boogen doo pãy nono go nen
maga pãy ma de boogen wii je joŋ ge ɓen ga
á joŋ se gà mbe yawla?
Noga daŋn wii je boogen ɓen ga á bay de ti ngel wa mbe yawla?
Wur mani Mesi no
17Nday bay de koge ga ig la meʼ à fer ge peɗ
koore yooway ma Libaŋ no,
day koore sen sãã ge wo doo go krig wa yawla?
18Ti wur sen mono, jar ndigriŋ laa ge wo wããre
maga à keen ɓil kefder yaŋ,
nen jar rẽwre caa wo yaŋ go day ko wo yaŋ.
19Jar ma fer ti see ɓaara gesiŋ joŋ ge wo
fruygi yaŋ debaŋ debaŋ wer Manwuri,
day jar coo ma yoo jar tabayn
kol ge wo je ma bay ɗag ma Israyeln yaŋ diŋ fen fruygi ɓaara no.
20Werga, je joŋ bon jarn joŋ ge gà so hase.
Je fegge ti jarn taw ge go,
à caa ge wer jar maga hay wo de laa gǔu
ma joŋ ɓlagge wo yaŋ go ɓuy.
21À taw ge jar maga hay wo kol ɓlagge ne je ma keɗedn ti
jag kiida wo go de jar maga frãy wo nen jar
car kiidan wo de wããre ti ngel kiidan wo go.
À taw ge jar maga nii wo je ma keɗedn mbaara
go bay laa ma jag ɓen tuu wo yaŋ go.
22Diŋ wersen so Manwur maga hay coo
Abraham le wãã doo kay nono ne Jakob ga :
Patala sõõre joŋge Jakob gà so hase,
patala nen ɓe baɗ ge go gà so has lay.
23Werga, de maga weere ɓen ko ge wo joŋre maga
ndi joŋ de doo ɓi yoo ɓaara we no,
saara gel ge ɗúu ɓi yaŋ go ti nene,
gel ge wo je ma bay ɗag mani Jakob yaŋ go ti nen lay.
Á joŋ ge wo hẽẽne yaŋ doo Baa ma Israyel no.
24Jar maga ti ɓaara hay mbar nen go fer ge wo yaŋ de ti.
Jar maga ti ɓaara hay graŋ fer wo yaŋ laa jag jare.
Currently Selected:
ESAY 29: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
