ESAY 28
28
WÃÃRE TI SIR JUDA WO DE ISRAYELE
Samari dwas ge go
1Re ti gawraŋ maga kaŋ wer jar taɗge de yii
ma Efrayim wo far ti see ɓaara ciŋ mono.
Re ti fuɗgi koo ma de lwaɗge ma ciŋ ti log ma de
rumgi ga diŋ fen woore ɓen mono.
Re ti jar maga yii go de raw egre ɓaara mono.
2Ko we ga bloo maga Waŋkluu ɓoʼn le, le de seege.
Á de egre lay, coɓ jag re lay.
Á doo baa maga laa húulì nono,
doo degurleege ma far fẽẽre de pel nono,
doo bii Baa maga far pyewre wo nono.
Se srog ge tilgi sen ge go gesiŋ de egre.
3À dagn ge go de ɓaale,
gawraŋ se ma kaŋ wer jar taɗge de yii ma
Efrayim wo far ti see ɓaara ciŋ no.
4Fuɗgi koo ma de lwaɗge ma ciŋ ti log ma de rumgin
ga diŋ fen woore ɓen joŋ ge yaŋ doo leʼge hõõ maga
rug go deparday day nen baan go taŋgu jwaʼge ɓe
day á bragn le go doo no kay go de liggi ɓe ɓuy tuu nono.
5Ti wur sen mono,
Manwur Pantway joŋ ge diŋ gawraŋ ma sagge,
diŋ õõbe ma kaa ti ma de togoɗge ti
jar ɓe maga gwaʼ ge wo mono.
6Á hã ge ɗiggi ma joŋ fẽẽre ti faage ɓe yaŋ
ne jar ma lagge car kiidan wo.
Á joŋ ge diŋ egre jar maga maŋ wo ɓil je heen wo go day kaŋn wo wer ɓe wo go jag tiŋ ni ɓe mono.
Jar jo yii feg wo ti Esay
7Ama á wo go de laage wer yii wo de fẽẽre joge ma taɗ jarn wo lay.
Je siɗ jagn wo de je ndar nen wããre Baa gon wo go de laage wer fẽẽre joge ma taɗ jar no,
yii go de raw egre ɓaara.
Á yeɗ wo go wer fẽẽre joge ma de egren wo.
Á daɗ wo jag de maga saara de fer wããre ma jag Baa go mono,
mbar wo nen ti go de maga saara hay nen fer wããre ti re po so mono.
8Tabuln wo go ɓuy de yããge de duggi wo de fẽẽre yeɗe wo,
ngel ma de el yweg taʼ bay wa so.
9Á wãɗ wo ga : Esay da kaŋ nen wose ti mopo mo la?
Á da ga wose mo laa fen maga à nen laage ɓe mo la?
Á nà diŋ ne weere maga à far jag ɓaara go ga men wo pãã go defay ɗa yawla?
10Á wãɗ mopo ga Saw lasaw, saw lasaw,
lakaw, kaw lakaw, se er sam, se er sam.
11Kidolgi Manwur wãã ge wããre yaŋ ne jar sen wo la diŋ
de jar ma mborglo wo, diŋ de jag ma tigriŋ.
12Á hay wii ra go ga :
Mokay diŋ iggi no, men we je maga go de gayre iggi,
mokay diŋ jam maga nday daʼ see ɓay ni mono!
Ama saara laa dayge laage ɓe gà.
13Day doo kay no so no wããre maga
Manwur wããn ge ne hara diŋ saw lasaw,
saw lasaw kaw lakaw, kaw lakaw se er sam, se er sam.
Sen nà maga á leʼ wo seele we no, á mo dag wo de gloge,
mo leɗ wo go gorgesarge, mo hrag wo go
day à mo hoo ra go ti rew, à mo bag ra go.
Húulì ma ti cõõ tiŋ no
14Diŋ wersen so laa we wããre Manwuri,
nday jar fegge ti jar no,
nday jar ʼwad mbaa ti jar ma Jerusalem wo lam no!
15Nday wãɗ ga :
Wùr go de tay jag de húulí,
wùr go de baa barge de tuu húulí.
De maga re ma joŋ jar de gùrn mo a bà layblaʼ no,
a daʼge wùr ga werga geteʼ diŋ ngel
yãã waŋ wùri,
jãɗge jarn diŋ duuli wùri.
16Diŋ wersen so Waŋkluu, Manwur wãã ga :
Ko we ndi so!
Ndi yaŋ de ɓoʼ húulì ma ɓoʼ wer mopo wo Siyoŋ,
á diŋ húulì maga ndi go de lamge ɓe,
húulì ma de ɗúu ma ti cõõ tiŋ ga go de ɓoʼ wer gesiŋ de ele.
Je maga deŋ ge see ɓe we see ɓe no,
daŋ ge de ɗee gà hase.
17Ndi de maŋ joŋge fẽẽre ti faage ɓen doo ɓi doo fen ngaɓ fẽẽre nono,
de maŋ keɗedn doo ɓi doo fen ngaɓ deele fẽẽre wo nono.
Húulì baa crag ge ngel yãã waŋ jar geteʼn wo yaŋ go,
bii maŋ ge yaŋ go ne duuli jar jãɗ jarn wo ti.
18Tayge jag ɓay de húulín ɓlag ge yaŋ go,
barge ɓay de tuu húulín joŋ ge wo wolaŋ gà.
De maga re ma joŋ jar de gùrn a ge we no,
á dag ge nday go de ɓaale ti mbraʼ mbraʼa.
19Tum de maga á hee we no,
se bag ge nday werga á hee ge de jag toŋ tum lay,
de ceg lay de suŋ lay.
Ngarge jag ɓe tawa caa ge hẽẽne jar go.
20Fen suulin joŋ ge go de dogray doo maga à mbeɗ ge go mono,
fen laage tin joŋ ge go gebeŋ kãã go ma laage ti gà doo hẽẽne ɓe.
21Werga Manwur ur gi le go ciŋ doo maga se hay joŋ le ti húulì Peratsimn nono.
Á leʼ ge fĩɗ see doo maga á joŋ le ɓil log ma Gabawoŋn nono ma joŋ joŋre ɓen go,
ma joŋ joŋre ɓe ma ngil jar no,
ma bag jag joŋre ɓe go,
joŋre ɓe maga daʼ wer doo jobo gà mono.
22Patala mono,
hã we see ɓay ne fegge ti jarn nen maga à mo creɗ saale ma de baŋ we gen wa.
Werga à go de bag jag mo ma ɓlag sir no,
ndi laa re sen le jag Waŋkluu, Manwur Pantway no.
Baa de ko re de daŋ je jeege
23Coʼ we sugi,
laa we jag ɓi!
Lag we ɗegede,
laa we wããre ɓi no.
24Je maga jee ngel ma joʼge jeen mbe tum tum yawla?
Á mbuɗ mbe pay ɓen go ciŋ day kaʼ fíi ɓe mbe ceɓ so yawla?
25De maga á caa fíi ɓe go mono, se bug nijel ni,
raw lag kumin ni,
joʼ coore blen go de sraɗge tiʼ tiʼ i,
joʼ coore orjen go ti ngel po tinoo taʼ lay,
pigrin go ti jag ɓe leŋleŋ ɓuy lay.
26Baa ɓen hay hadn de seele ma seege,
á hay kaŋ nen ɓe ti haɗge ɓen wo.
27À ɓum nijel de mo ma kogge wer deeren wo gà
à seɗ de pus durgi ne kumin ti ma ɓumgi ɓe gà
ama à ɓum nijel de graw,
à ɓum kumin de wegraw.
28À nen naŋ coore ble go ma ɓoʼ hoole ane de maga
à leʼ ɓumgi ɓe mono,
à ɓumn mbe pa, mbe pa gà.
À seɗ de pus durgi wo de piiri ne hẽn
ti bay ma naŋ ge ɓe go wa.
29Sen a le nà see Manwur Pantway maga bagge yaŋ
mani ɓen daŋ go, ɗeŋ joŋge fẽẽren nen ɓe debaŋ mono.
Currently Selected:
ESAY 28: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
