ESAY 24
24
WÃÃRE TI WUR MA PELN WO NO
Tamsir ɓlag ge go
1Ko we ga Manwur go de ɓlag tamsiri,
go de taw jar ma ɓil ɓen wo.
Á ɓlag ge sirn go, wel ge jar ma ɓil ɓen wo go.
2Re maga daʼ ge je sii jagn diŋ maga daʼ ge jar ma ɓuyn
wo mo lay, mani je wãã re jarn doo mani gebeen no lay,
mani wãy tiŋn doo mani maygeben no lay,
mani je maga yee mopo go doo mani
je maga yee yeege no lay,
mani je taɗ mopo ne jarn doo mani je maga taa taage no lay,
mani je ma bay ɓèere tin doo je ma de ɓèere tin no lay.
3À ɓlag ge tamsir go ɓlagge ɓuy tuu, à frumn gi go
frumgi werga Manwur hay wãã wããre sen go.
4Tamsir go nen lawge, a go de sealge. Jag sir tawge
ɓuy go nen gayre, go de sealge. Jar maga wo go de lagge
ciŋ ti jarn ciŋ ti sir la taw ge wo lay.
5Jar ma ti tamsir la glubn wo go werga á cegaɗ wo jag
liŋgin wo go, ɓoʼ wo foo wããre ma de yergen wo go,
ɓlag wo tayge jag ma tumn go.
6Diŋ wersen so ga faɗge go de taw tamsiri day jar ma
ɓil ɓen wo de re ɓlagge sen ti mono. Diŋ wersen so ga
jar ma ti sirn la roɗ ge wo go day jar gwaʼ ge wo ne
yemeg mbag koɗ no.
7Yii ma defayn go nen coocoo, pay tlalum hig go lay.
Jar maga ɓil ɓaara hay go de fruygi mo ɓuy wo de ndumgi.
8Fruygi tembaln taw wo go, ngarge jag hraggen maŋ wo
jag go, fruygi dilnan caa wo wer go.
9Jobo bay jo yii de siŋ jag wa so hase, fẽẽre jogen
kol wo go wag jag jar jo rage no.
10Ɓi leege ma de koɗ koɗn ɓlag go, jag tiŋn wo ɓuy wo go
de tẽgge, jobo bay wo kalge ni wa so.
11À ʼwad war ti faage wo wer maga yii bay wa. Fruygin
ɓuy kol go diŋ lawge, jag de fegn yee nen go ɓil sir no.
12Mo ma ɓlag jar de gwaʼge ɓi leegen ni, jag tiŋn wo go
de hragge, gwaʼ go diŋ tabuli.
13Wo yoo wer jar wo mono, sir joŋ ge doo maga à de jwaʼ
koo Olifiye nono, doo maga à de fleg blam tlalum wo nono.
Á fruy wo de koɗ koɗe
14Ama jar ma lan wo mbaara de ʼwad ware, ʼwad wo war
de fruygi, ʼwad wo siŋ le de fruygi le nen wur bolaw
ma maŋ ti Manwur ciŋ.
15Togoɗ we Manwur wo ti ngel maga poɗag wo ni mono.
Togoɗ we ɗúu Manwuri, Baa ma Israyeln wo
ti kaali ma nen maarogn wo!
16Go ti jag sir tawge naa laa siŋ wo ʼwadge ga :
Hoo sug ti je ma keɗed no! Ama ma ɓi ndi wãã ɓin ga :
Ndi go de yeege! Ndi go de yeege! Maga ndi taw we go!
Jar lag cogobn lag wo cogobe, cogobe!
Jar lag cogobn lag wo cogobe.
17Hẽẽne, tuu wo de bay wo go de cir ti ɓo,
ndo je ma ti tamsir no!
18Je maga daŋ go doo hẽẽne maga caan go leʼ go ɓi tuu.
Je maga ɗii le go ciŋ jag tuu mono, sen baa go ti bay.
Werga jag ngel ma ciŋ buŋ wo le go,
dog tamsirn hrag wo go lay.
19Tamsir mun ɓor go, tamsir crag go, à gas tamsir go.
20Tamsir go de ɓaʼge doo ga je yii ɓaʼ nono.
Á paa doo mburyug nono. Debaycõõre ɓen de põõge ɓe.
Á leʼ go day ur gi ciŋ gà so hase.
Kluu joŋ ge go wurpo ɓuy doo Baa boŋ
21Ti wur sen mono, Manwur joŋ ge bon jar
durgi ma ciŋn wo yaŋ le ciŋ, joŋ ge bon waŋre
ma ti tamsir wo yaŋ ti tamsir la.
22À tay ge ra yaŋ go doo jar ma ti paglam wo ɓuy ɓi tuu,
à laa ge ra yaŋ ti daŋgay ɓi tiŋ daŋgay. Naw joŋ ge we
go blam sen pur no, à joŋ ge bon ɓaara.
23Sõõre baa ge few go, wur cog ge ti go gesiŋ de sõõre
lay werga Manwur Pantway de hayge
le waŋ ti húulì Siyoŋ ɓi leege Jerusalem.
Togoɗge ɓen naa ge nen yaŋ go pel
jar kluuri mani ɓen wo.
Currently Selected:
ESAY 24: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
