ESAY 23
23
Re ti Tir wo de Sidoŋ
1Re ti Tiri. Law we see ɓay,
nday daage ma Tarsis no!
Werga à ɓlag ɓi leegen we go,
tiŋ bay ciŋ kaʼ wa so!
Jag faage bay tinoo kaʼ wa so lay!
À naa nen re sen le nà ɓil sir Sitim.
2Ɓug we jag go doo hẽẽne,
nday jar ma ti kaali maga jar trere ma Sidoŋ
ma raŋge ti maarog hay nges wo nday go mono!
3Coore ma jag maarog ma de pããgen wo de
fẽẽre maga à we ra le ɓil Nil hay wo diŋ
daʼge ma Sidoŋ ciŋ ti bii ma kluurin wo.
Se hay diŋ lumo maga wer jar ɓuy hay wo woge ni.
4Ndo wùu mbo ti go de sõõre so, Sidoŋ!
Werga maaroge,
ngel kluu maarogn wãã so gana :
Ɓil ɓi hay leʼ me, bay ma biŋgi wa.
Ndi bay de biŋgi wa,
ndi gẽẽ weere jõõre po wo de mayre
tigliiri po wo gà lay.
5De maga reen mokay la wo ge daʼ jar Ejipte wo mono,
à daɗ ge wo doo ga jar ma ɓi leege Tir hay daɗ
wo doo re sen no lay.
6Cegaɗ we wo go nen Tarsisi,
law we see ɓay nday jar ma ti kaali no.
7Ɓa mbe mono diŋ ɓi leege maga
à hay mbe joŋ hragge ni mo yawla?
Á hay diŋ ɓi leege maga
à laan le nen wur ma ɓaaɓaa wo le,
day se ɗee doo wo go ti sir ma hãã hãã wo.
8Wose ɗig re sen le go ti Tir maga hay kaŋ
gawraŋ waŋ ne jar wo ti mo la?
Jar trere ɓen hay wo diŋ waŋre day
à hay hoo sug go ti ɓaara ti tamsir ɓuy.
9Bag jag re sen le go ti ɓe diŋ Manwur Pantway no,
ma ham jag mopo ɓuy ma far ti see ɓe ciŋ go gesiŋ,
ma mbuɗ foo jar maga à horge sug ti ɓaara ti tamsir
la mo ɓuy wo go.
10Jee mbo sir ɓon mbo hãy doo maŋge Niln so,
ndo may ma Tasis no! Jug po bay soole ɓo wa so!
11Manwur maŋ doo ɓe we ciŋ see maarog no,
á fĩɗ sir waŋren wo we.
Á go de hã jag ne Kanaan maga á mo ɓlag
ngel ɓe ma de egren wo go.
12Á hay wãã ga :
Ndo joŋ ge wo tum joŋ hragge gà so hase,
ndo may ma Sidoŋ maga à ɓlag tigli ɓon go de waŋ mono!
Ur go ciŋ, cegaɗ wo go ɓi sir Sitim! Bà mbe de sen
ɓuy ndo daʼ ge mbo iggi wo ni gà pa.
13Koɗa sir mani jar Kalde maga bay wo diŋ jar po wa so mono,
jar Asiri hay koln go diŋ ngel tiŋ fẽẽre ma yoofíi wo.
Á bor wo tiŋ ma de gẽẽre ma gor ngel go ni,
ɓlag wo ngel hayle ma de woore ma Tirn wo go,
kol wo ra go diŋ tabuli.
14Law we see ɓay,
nday daage ma Tarsis no werga
à ɓlag ngel biŋni ɓayn we go!
15Ti wur sen mono,
à yõõ ge ti yaŋ go ti Tir nen kiŋgi doo renam,
mono diŋ kiŋgi waŋ po boŋ.
Ti kiŋgi doo renam mono,
à wãã ge ti Tir doo mangawlaŋ maga siŋ ʼwaa ti ɓe ga :
16Maŋ dilna, kii ti ɓi leege no,
ndo mangawlaŋ maga à yõõ ti go ti ɓo mono!
Maʼn de ele, kaŋ siŋ wo debaŋ nen maga
à mo fer ɗig ti ti ɓo!
17Ti kiŋgi doo renam mono,
Manwur fer yaŋ ko decoo Tiri.
Se ferge mbe yaŋ jag kiɗgi daʼge ɓe ma bay blamn pa,
joŋ ge figliw yaŋ go de sir waŋre ma ti sir la wo ɓuy,
wo go ti tamsir ɓuy.
18Ama daʼge ɓen wo de solay ɓe ma bay blam
joŋ ge wo yaŋ go sag sag ma Manwuri.
À bag ge jag ɓaara ciŋ gà
à ɗaw ge ra gà lay werga daʼge ɓen joŋ ge
go diŋ rege ma wùu jar maga wo de tiŋ pel Manwur mono,
diŋ fẽẽre heege see ɓaara ma de wooren wo.
Currently Selected:
ESAY 23: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
