ESAY 22
22
Wããre ma ti Jerusalem no
1Re ti log ndarge nen wããre no.
Wer mayse ga jar sir ɓon wo ɓuy ɗii wo go
ciŋ ti tiŋ ma de lawgen wo la,
2ndo ɓi leege ma de ngarge jag ɓil maga war wo go
de yããge ɓil ɓo ɓuy day à joŋ hragge ni no?
Car wããge ne jar ɓon wo see bay diŋ moslam wa,
à huɗ gi wo bay diŋ jag durgi wa.
3Jar kluuri soode ɓon hoo wo ɗeere go jag taʼ boŋ ɓuy,
jar jwag waa hoo wo ra go daŋgay.
À hoo jar sir ɓon wo go jag taʼ boŋ ɓuy daŋgay
de maga saara hoo ɗeere wo go
hãã tiʼ ma daŋge mono.
4Diŋ wersen so ndi ga :
Far we nen ɓay go ne ndi ti,
men we ndi raage debaŋ.
Teb we ndi ma jãã nen ɓi ti re maga de caa
may mani jar ɓin wo mo wa.
5Werga á diŋ wur sõõre,
wur ndreɗge jar wo de bagge põõ maga
Waŋkluu, Manwur Pantwayn á de ɓe ɓil log
ndarge nen wããre no.
À mbug korn go day
à ʼwad war wo nen ti húulìn wo nen maga
jar mo caa war saara le.
6Jar Elam wo go de ɓod hul waa jag bay,
pus durgi ma jar durgin wo de jar piirin wo le de seege.
Jar Kir wo go de hoo gidigli ɓaaran siigi.
7Por ɓo ma de woore daŋ kããra wo go
de bagge de pus durgi wo.
Jar piiri wo go de cirgi mo jag tiŋ ma dur moge.
8À hog kor ma ti Judan go.
Ti wur sen mono,
ndo hay kaŋ nen ɓo diŋ ti fẽẽre durgi
ma ɓil tiŋ ma yooway no.
9Nday ko ywaale ma ti kor ma ti ɓi leege mani Dafid no,
nday raw yãã bii ɓil gloŋ ma nen gesiŋ no.
10Nday kee tiŋ ma Jerusalem wo day nday mbug
tiŋ wo go ma jwaʼ see kor no.
11Nday tee gloŋ ti holaŋ kor ma ɓogn wo ma yãã bii
ma ɓil gloŋ ma ɓaa no.
Ama nday laa dayge kaŋ nen ti je maga joŋ re sen mo gà
nday bay ko je maga hay ʼwũy re sen le go taŋgu ɓaa mo wa.
12Waŋkluu, Manwur Pantway ɗe nday wara maga nday mo raa,
nday mo law, nday mo cẽẽ ti ɓay go day
nday mo lag tãy õõbe ti ɓay.
13Bà nà nday bay mbay dayge wa pa.
Jag ɓay mbe ti fege.
Nday mbay nà ti fruygi doosen lam no!
À ngaʼ deere, à ngaʼ fǐiri.
À re này,
à jo yii day à kal ga :
Naa re, naa jo werga toŋ naa huɗ gi go!
14Manwur Pantwayn go de naa nen ɓe me ga :
Cwãy à maŋ ge ɓlagge sen go ma ko decoo
ɓay gà hase, say diŋ húulí ɓay boŋ tuu.
Waŋkluu, Manwur Pantway wãã nono.
Re ti Sebna
15Waŋkluu, Manwur Pantway wãã gana :
See, wo daʼ Sebna je twore no,
je ma ti tiŋ mani waŋn ga :
16Mayse ɓo la ni noga wose ɓo la ni nen maga
ndo tee tuu húulí ɓo go la ni la?
Ndo kol mbo go ter tuu húulí go ti ɗiŋriŋ wo hãy so!
Ndo cloʼ mbo húulì wo hãy ma tiŋ naw so!
17Ko go ti ɓo ga Manwur srog mo yaŋ wo go
hãã de egre, ndo pãy no.
Á kaŋ ge cee yaŋ go mo ti.
18Á kaa ge ndo yaŋ go ti kẽẽ,
legad ge ndo yaŋ wo go legadge ti ngel ma fihfihi.
Ndo huu gi wo go nà ni.
Pus ɓo ma de togoɗgen taw wo ge wo go nà ni lay,
ndo je ma kaŋ sõõre ne tiŋ mani je wãã wããre ɓon ti no!
19Ndi Manwuri, ndi nii ndo yaŋ go ti ngel joŋre ɓo no,
ndi yãã ge ngel kluu ɓon yaŋ go mo doo.
20Ti wur sen ni,
ndi ɗe ge wejõõ ɓi Eliyakim je ni Hilkiyan yaŋ.
21Ndi hee ge õõbe ɓo ma kluun yaŋ go ne hẽn ti,
ndi saʼ ge yoo ɓe yaŋ go de mblaaga ɓo no,
day ndi hã ge kluu mani ɓon yaŋ go ne hẽn doo.
Á joŋ ge yaŋ diŋ pan jar Jerusalem wo de tiŋ mani Juda no.
22Ndi hã ge saale tiŋ mani Dafid yaŋ ne hẽn doo :
De maga á buŋ jag ɓe we go no,
je tẽgge ɓe joŋ ge gà hase.
De maga á tẽgn we go no,
je bulgi ɓe joŋ ge gà has lay.
23Ndi coʼn ge yaŋ gesiŋ doo gefay go ti ngel
ma flãy day se joŋ ge yaŋ diŋ ngel hayle ma
de togoɗge ma jar ni ɓe wo.
24Fen maga diŋ togoɗge ma jar ni ɓe wo mo
ɓuy à hagn ge go ti ɓe ɓuy.
Á diŋ jag doo ɓe wo, sug ɓe wo, fẽẽre ma
bargiŋ wo ɓuy, tĩĩ ti tasan wo hãã leʼ wo go ti hoolen wo,
sen wo mo ɓuy joŋ ge wo go de hagge ti ɓe.
25Wããre ma jag Manwur Pantwayn ga :
Ti wur sen mono,
à naa ge gefay se ma de coʼge gesiŋ ti ngel ma flãyn yaŋ go,
à caan ge go day se wãã ge mopo gà.
Á ɓlag ge fẽẽre põõre maga hay wo ti ɓe
wo yaŋ go werga Manwur wããn go.
Currently Selected:
ESAY 22: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
