ESAY 21
21
Babilon leʼ go gesiŋ
1Re ti puuli ma ɓil maarog no.
Je ɓug jarn a le nà ti puuli no,
ti puuli ma joŋ hẽẽne ne jarn doo swìl maga
naa le ɓil Negef no mono.
2À naa nen re ma de ɓlagge debaŋ ne ndi ga :
Je cogob lag cogobe,
je frum jarn frum jar go.
Elam, uri, wo mbo so!
Sir Medi, kaŋ mbo ne jar jag so!
Ndi day nà caa wer ndumgin wo go.
3Diŋ wersen sag ɓi leʼ me go cege,
ɓil ɓi leʼ me go cege doo wãy maga de biŋgi nono.
Ndi bay laa sug wa doo see ɓi maga baŋ go mono,
nen ɓi bay koge wa doo see ɓi maga daɗ mono.
4Jiili ɓi daŋ go,
hẽẽne go de caa ndi.
Ngel suŋ ɓi maga ndi de fruygi ti ɓe mono,
Baa koln go diŋ ngel suŋ ma joŋ hẽẽne.
5À kaŋ tabul ma regen go,
jar gor ngeln wo go de lagge lag de pũygi.
À re, à jo kola à wãã we yaw ga :
Pud we go ciŋ nday weere waŋre no!
Tag we noo ne kroŋ no!
6Werga Waŋkluu hay wãã wããre me doo kay nono ga :
See, wo oo je gor ngele,
day á mo sii ge fen maga se kon ge go.
7Á ko jar nà ti pus durgi blaʼ,
jar ti piiri ɓog ɓog blaʼ ti gerhẽẽ ɓog ɓog blaʼ,
ti yoŋyoŋ wo blaʼ ni á mo ko ra go twore ko,
mo kaŋ nen ɓe de ele.
8Je ma gor ngel raw ngar jag doo mingir ga :
Waŋ ɓi no, ndi yaŋ mbi odge tum tum nen
síilí ti tiŋ ma de gẽẽre no,
tum de suŋ ndi yaŋ mbi ti ngel joŋre ɓi no.
9Ko we, jar piiri wo le de age,
jar piiri wo go de car ge ɓog ɓoge.
Se fer wãã wããre pa day ga :
Babilon leʼ we go gesiŋ, á leʼ we go gesiŋ!
À hrag nen fodo baa ɓen wo go gesiŋ krus krusi!
10Nday jar ɓi maga
à hay ɓum nday doo coore ti yaage mani ɓin mono,
ndi sii fen maga ndi hay laan jag Manwur Pantway,
Baa ma Israyel we go ne nday.
Re ti Duma
11Re ti ɓi leege Duma.
À ʼwaa war le me Seyir ga :
Je gor ngele,
ngel suŋn bà nà ẽla?
Je gor ngele, ngel suŋn bà nà ẽla?
12Je gor ngeln kal yiŋ jag ga :
Ngel le go de teege day ngel suŋ le de age lay.
Hayga nday da we ga nday wii jag ɓi no,
ni nday wii mbay.
Coo we ni nday a le.
Re ti sir Arabi
13Re ti sir Arabi.
Nday nà ge yaŋ go yooway ma Arabin wo,
nday jar Dedan ma raŋge wer kããra ngaɓa no!
14Ɗa we bii wo ne jar maga wo jwale mono.
Jar ma ɓil sir Teman caa wo pel jar maga ɗee wo go de hoole.
15Werga á ɗee wo go doo moslamren wo,
doo moslam ma bay fra ti no,
doo waa maga go de kaŋge ti toŋ mono,
doo põõre maga durgi kaŋ ra ne jar ti mono.
16Werga Waŋkluu hay wãã wããre me doo kay nono ga :
Kiŋgi gwaʼ ni boŋ doo kiŋgi mani je joŋ joŋre ti suŋgun
no ɗa pa day togoɗge mani Kedar maŋ jag go ni no maʼ no.
17Jar jwag waa ma de egre po gwaʼ ge wo ne
yemeg koɗ yoo jar ni Kedar wo werga Manwuri,
Baa ma Israyeln hay wããn go.
Currently Selected:
ESAY 21: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
