AJE 2
2
Boo we tiŋ no, ndi yaŋ de ɓay
1Nen naw ma de doo ɓog ti boŋ nen few ma de renamn mono, Manwur raw wãã wããre jag Aje je ndar nen wããre Baa gon gana : 2Wii Sorobabel je ni Seyaltiyel je wãã re prog ma Judan wo de Josuwe je ni Yehosadag je moobe ma siɗ jagn wo de te jar ma ɓuyn wo day riŋ ra so ga :
3Wose de gwaʼge tenen yoo ɓay ga hay ko woore tiŋ ma taŋgun we la?
Day nday kon patala nà koge la?
A yaŋ mbe diŋ mopo nen ɓay pa yawla?
4Patalam no, teŋ nen ɓo, ndo Sorobabele!
Kay diŋ jag Manwuri.
Teŋ nen ɓo, ndo Josuwe je ni Yehosadag je moobe ma siɗ jag no!
Teŋ we nen ɓay nday jar ma ɓil sirn ɓuy!
Kay diŋ jag Manwuri.
Joŋ we joŋre werga ndi yaŋ de ɓay!
Kay diŋ jag Manwuri.
5Wer wããre maga ndi hay tay jag le de ɓay de ɓe ti wur maga nday laa le go Ejipte mono,
Nenterse ɓin yaŋ yoo ɓay.
Hẽẽne mo joŋ nday wa!
6Werga, Manwur Pantway wãã doo kay nono gana :
Ge ni ɓaale boŋ pa, ndi fĩɗ gi ngel ma ciŋ wo yaŋ de tamsiri
Ndi glum gi nen maarog wo yaŋ de ngel ma de heeg no.
Wur ɓen go de kosge yaw.
7Ndi glum gi yoo wer jar wo yaŋ wo go ɓuy,
Day horog maga wer jar ɓuy slag wo nen ti ɓaara mo ɓuy
jar tay ge wo ra yaŋ le go,
Day ndi baa ge ɓil tiŋ se kaʼn la yaŋ go de togoɗge.
Wããn diŋ Manwur Pantway.
8Solayn diŋ ma ɓi, boo biŋnin diŋ ma ɓi lay.
Kay diŋ jag Manwur Pantway.
9Togoɗge tiŋ se ma blamn la joŋ ge debaŋ de daŋ togoɗge tiŋ ma taŋgu no.
Wãã diŋ Manwur Pantway.
Ndi hã ge jam yaŋ ti ngel se taʼ la no.
Kay diŋ jag Manwur Pantway.
Ɗig we ti seele ɓay no
10Nen naw ma de doo ɓog ti naa nen few ma de kaawaʼ nen kiŋgi ma de ɓog maga Dariyus de joŋ waŋ mono, Manwur raw wãã wããre ne Aje je ndar nen wããre Baa gon gana :
11Manwur Pantway wãã doo kay nono ga : Wii we jag jar siɗ jag wo ti jag liŋgi re ma kayn ɗala. 12Hayga jobo kuu này maga à hay geln go sagsag ne Baa we ti jag õõbe ɓe, day se raw duʼ hoole noga rege po yii wo de noo po, noga fen rege po hãy de jag õõbe sen no, fen sen kol go sagsag ma Baa lay yawla? Jar siɗ jagn kal wo yiŋ jag ga bay wa. 13Aje fer wãã wããre pa day gana : Hayga jobo kol we go de ɗag werga se baa doo see húulí mopo, day raw duʼ fẽẽre sen wo no, saara kol go de ɗag lay yawla? Jar siɗ jagn raw wo ferge ga a kol wo go de ɗage.
14Aje fer wãã wããre pa day ga :
Jar sen wo, wer jar sen wo la wo pel ɓi nà doosen no lay so no.
Kay diŋ jag Manwuri.
Joŋre ma doo ɓaaran wo de fẽẽre maga a hãn wo ne ndi ti ngel la ni mono,
Wo go de ɗag doosen no lay no.
Ko we see ɓayn ni
15Ɗig we patala ti fen maga de tĩĩ joŋge wara,
Day raw ge wo pel blam ɓe ni pa mono.
Go taŋgu maga à bay kaŋ húulì ciŋ ti kẽẽ ma boo tiŋ Baan wa ɗa mono,
16Re mayse hay a we ti mo la?
De maga jobo wo kiɗ hãn coore ble ti boole ɓe doo ɓog mono,
Se daʼ ni diŋ hãn hwale.
De maga jobo wo ti ngel yuu yii de kaŋ ɗiggi ga se daʼ lidir yaŋ ni doo dwee mono,
Se wo daʼ ge ni doo ɓog tuu.
17Ndi hay hã pũũri ne nday de yõõre,
De bir wo de húulì-baa maga laa mono.
Ndi hay joŋ bon ɓay ti joŋre ma doo ɓay wo,
De sen ɓuy nday fer le see ɓi gà.
Kay diŋ jag Manwuri.
18Ɗig we ti fen maga de tĩĩ joŋge wara day raw ge wo pel blam ɓe ni pa mono.
Hãã le ti naw ma de doo ɓog ti naa nen few ma de kawaʼ no,
Hãã le ti wur maga à ɓoʼ wer tiŋ mani Manwur mono,
Ɗig we ti seno!
19Mbèere mopo yaŋ mbe ɓi boole pa yawla?
Hayba pay tlalum no, koo hõõ no,
Koo grenadiye wo de koo olifiyen wo draʼ leʼ wo meʼ gà lay.
Ane, caa jag wara, ndi kaŋ ge bosaʼ yaŋ ne nday ti.
Ndo Sorobabel ndo diŋ je ɓi no
20Manwur kal wãã wããre ne Aje ma de ɓog nen naw se ma de doo ɓog ti naan pa doo kay nono ga :
21Wãã wããre ne Sorobabel je wãã re prog ma Juda no day riŋn ga :
Ndi glum gi ngel ma ciŋ wo yaŋ go de tamsiri.
22Ndi srog ge pale waŋre wo yaŋ go gesiŋ.
Ndi taw ge egre sir waŋre ma ti wer jar wo yaŋ go.
Ndi ɓlag ge pus durgin wo de jar ma ɗidgi ti ɓen wo yaŋ go.
Ndi laa ge piirin wo de jar ɗid ragen wo yaŋ go gesiŋ.
Wosela ɓuy daʼ ge húulí jag moslam ma doo hẽn ɓe doo ga tuu.
23Kay diŋ jag Manwur Pantway :
Ti wur sen mono, ndi gel ge ndo Sorobabel je ni Seyaltiyeln yaŋ go,
Ndo wejõõ ɓi no.
Kay diŋ jag Manwuri.
Ndi kol ge ndo yaŋ diŋ nen fen ɓi maga go ni no boŋ no,
Werga ndi hay gel ndo go.
Kay diŋ jag Manwur Pantway.
Currently Selected:
AJE 2: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
