AJE 1

Boo we tiŋ mani Manwur no

1Nen naw ma taŋgu ti few ma de hiiraʼ nen kiŋgi ma de ɓog maga Dariyus de joŋ waŋ mono, Manwur kal wãã wããre ne ne Sorobabel je ni Seyaltiyel je wãã re prog ma Judan wo de Josuwe je ni Yehosadag je moobe ma siɗ jagn jag Aje je ndar nen wããre Baa gon ga : 2Manwur Pantway wãã doo kay nono gana : Jar sen la wãɗ wo ga wur bay de age wa ɗa, diŋ wur maga à hay nen ferge boo tiŋ Baan nen ɓe mono. 3Doo kay no so no Manwur raw wãã wããre jag Aje je ndar nen wããre Baa gon ga :

4De maga tiŋ mani Manwurn go de ɓlagge mono,

Wur yaŋ mbe maga nday nà ɓil tiŋ ma de ʼwũy ɓil wo go de woore an gà pa yawla?

5Manwur Pantway wãã patala so ga :

Ɗig we ti seele ɓayn de el ɗa!

6Nday hay joʼ debaŋ day nday we le meʼ ẽ.

Nday re mbay, ane nday bay wuɗgi wa.

Nday jo mbay, ane se bay go ii jwaale ɓay wa.

Nday her mbay õõbe wo see ɓay, ane see ɓay bag wùu gà.

Je yãɗ solay ti fewn yããn le ɓil ndar maga go tul were nono.

7Manwur Pantway wãã doo kay nono ga :

Ɗig we ti seele ɓayn de el ɗa!

8Ɗii we ti húulì, wo we le caa koo!

Ni nday boo we tiŋ no.

Ɓil ɓi fruy yaŋ go wer ɓe day ndi daʼ togoɗge yaŋ wer ɓe lay.

Wããn diŋ Manwuri.

9Nday hay kaŋ ɗiggi ɓay ti fẽẽre debaŋ, koɗa nday daʼ nà meʼ tuu.

Nday hay a go de ɓe liŋ, ama ndi raw fug leege go ne hẽn ti.

Diŋ wer mayla? Diŋ wer maga tiŋ mani ɓin go de ɓlagge,

Day wosela ɓuy de ɗeege nà diŋ ti tiŋ ɓe mono.

Kay diŋ jag Manwuri.

10Diŋ wersen so ga ngel ma ciŋ laa ra baa ne nday gà

Sir laa dayge joŋ fẽẽre wo gà lay mono.

11Ndi hay ɗe kay le ne sirn ti, ne húulìn wo ti,

Ne coore blen ti, ne yii ma defayn ti, ne noon ti,

Ne fẽẽre maga nday daʼ ra le pay mo ɓuy ti,

Ne je tabayn wo horogn ti,

Ne joŋre ma doo ɓayn wo ti lay.

12Sorobabel je ni Seyaltiyel no, Josuwe je ni Yehosadag je moobe ma siɗ jagn wo de te jar ma ɓuyn raw wo yãã jag Manwuri, Baa ɓaaran taw taw doo wããre mani Aje je ndar nen wããre Baa go nono, doo jag peele maga Manwuri, Baa ɓaaran hay hãn ne hẽn jag nono day jarn raw wo joŋ hẽẽne pel Manwuri. 13Aje je peele Manwurn kal fer wããre ne jarn wo taw taw doo jag peele maga Manwur hay hãn ne hẽn jag nono gana : Ndi yaŋ de ɓay. Kay diŋ jag Manwuri. 14Manwur kal buŋ ti Sorobabel je ni Seyaltiyel je ma wãã re prog ma Judan go, buŋ ti Josuwe je ni Yehosadag je moobe ma siɗ jagn go, buŋ ti te jar ma ɓuyn wo go lay. Saara raw yaʼge lagge jag joŋre tiŋ mani Manwur Pantway, Baa ɓaaran 15ti naw ma de doo ɓog ti naa nen few ma de hiiraʼ nen kiŋgi ma de ɓog maga Dariyus de joŋ waŋ mono.

Currently Selected:

AJE 1: TUP

Highlight

Copy

Compare