Revelesen 6

Luk iamk--Hus tva ien naur karp nut istudau

1 Laha, nla Net Sivsiv iela luk iamk, karn ti nki iamk asnr sei iv'a la avsilv' hara iv'ana inep'a nav'l iv'l, kavr ti a, “Pama kalei.” 2#Sek 1:8; 6:3,6.Sarei, pavrni, nla hus tva iamk kala dui ilak aranan iua tenpauei. Atu manu p'as ani, laha hin iv'el a ti ipan naur karp nut istudau.

Tv'el luk--Hus m'im'iel iv'el a ti ipalev'la tamat arna nadep'

3Laha, naran iela tv'el luk, nrn tv'el sei isilv' ivr ti a, “Pama kalei.” 4#Sek 1:8; 6:2.Sarei, nla hus uraur, iv'i m'im'iel, iv'el. Atu nut hua a dui ilak aranan a ti ipalev'la tamat arna nadep', a ti m'ertu apavrpep'n hir, katu tali lil ani.

Nitla luk--Hus m'tm't iani ti uliena tim'ah arna nadep' ilil dau

5 # Sek 6:2,6. Laha, naran iela nitla luk, nrn nitla sei isilv' ivr ti a, “Pama kalei.” Sarei, pavrni, nla hus iamk, iv'i m'tm't, kala dui ilak aranan iua skel al lm'an. 6Laha, nrn nadl iamk idan arna p't nut nar sei iv'a avsilv' hara, kavr ti a, “Panikin na uit iamk aani ipav'i p'ret, ulien nen iv'i ruplet iru, panikin na pali iamk ulien nen iv'i ruplet iru. Mautakm a ueil m'a naui m'iel.”

Niv'a luk--Hus ihahalauas. M'ien ilak aranan

7Laha, naran iela niv'a luk, nrn niv'a sei isilv' ivr ti a, “Pama kalei.” 8#Esikiel 14:21.Sarei, pavrni, nla hus iamk ihahalauas, kala dui ilak aranan, nahan iv'i M'ien, kala ti mlin na nut m'ertu im'a isapei. Atu nut hua anr a ti aparp m'ertu ipamk arna nki ipav'a nakl arna nadep'. Aparpr a talei m'a m'em'erien m'a m'ien m'a si dm avlak arna nadep'.

Nilm'a luk--M'im'ilr m'ertu atrp sarar sena ti avuada v'nenan Atua, avv'ara eia

9Naran iela nilm'a luk, nla m'im'ilr m'ertu atrp sarar sena ti avuada v'nenan Atua kavp'tir kavvrp'ep'ei. M'im'ilr lera avlak a nv' nev'etet. 10Kavv'ara eia a nadl lil kavvr ti a, “U Mlin Lil, Nakm kp'as kav'i v'nen dau. ?Kam'em' p'vtrahh ipaier v'aran a ti pav'ana hua m'er m'ertu avlak arna nadep', kutakm anr sena ti avani ti dim'em' irarev'?” 11Laha, atup'sev' a klus tva anr udlani, kavr anr kavr ti apavrnrn hir ipasusupa ipaier naran apavrpep'n sera m'ertu udlani ipanap'ar avv'i m'ertu na m'akarienan Atua, kavv'i tv'alr.

Lm'sei na luk--P'knaran iruh

12 # Rev 11:13; 16:18; Aisaia 13:10; Suil 2:10,31; 3:15; Mat 24:29; Mak 13:24,25; Luk 21:25. Laha, nlei naran iela lm'sei na luk. Sarei, pavrni, nami imi ilil, neiel ima kadam't inep'a selpak aani a nila p'ak nani m't, nal ima kanep'a nadei. 13#Aisaia 34:4.Msi arna p'knaran avrars arna nadep', inep'a ti nava p'alak iam'am'd irs a nadep' naran nalen lil irpi. 14#Rev 16:20.Laha, p'knaran iruh, inep'a nut alelha pas inap'ei. Ptha udlani m'a v'anu papa udlani avruh a m'lnar. 15#Aisaia 2:19,21.Laha, mlin lilil udlani arna nadep', m'er m'ertu lilil, m'ertu siar istudau, mlinar m'rnur m'er m'ertu nut huar ilil, m'ertu na m'akarien udlani m'er m'ertu dau udlani, avtutuah al navap kavtutuah a tah nav'et iter arna ptha. 16#Usia 10:8; Luk 23:30.Kavvr a ptha m'a nav'et kavvr ti a, “Pavrars aranam'em' kavtutuan kam'em' sena nahn a Mlin ilak arna napl p'as, kavtutuan kam'em' sena nl rera Net Sivsiv. 17#Suil 2:11; Mal 3:2.Sena ti itier sera napn lil na nl reran. ?Hin ak irndu ti ipap'tir?”

Currently Selected:

Revelesen 6: nmb

Highlight

Copy

Compare