Revelesen 7

Atu makan Atua arna tana nahr m'ertu na m'akarienan Atua

1 # Seremaia 49:36; Taniel 7:2; Sek 6:5. Itauatah a si lera nla ensel iv'a avp'tir arna pna nadep' a nut iv'a, kavuada nalen iv'a arna nadep', kavani ti nalen ikatvtv ml arna nadep' v'aha arna nata v'aha arna nai kinkin iamk. 2Laha, nla ensel uraur iendan a nut neiel itpeia, kadav'a eia kaua sei itu mak iv'i nkan Atua la isilv' ha, kav'ara anr ensel iv'a lahara a nadl lil. Ensel lera Atua ittu sera nut hua anr a ti apavutakm a nadep' m'a nata. Ivri kavr ti a, 3#Esikiel 9:4,6.“Mdavutakm a nadep', nata, v'aha nai, ipaier naran p'vtu sera mak, iv'i nkan Atua, arna tana nahr m'ertu na m'akarienan Atua.”

4Laha, kana nrn ti avspanr m'ertu avtu mak aranar, avv'i 144,000 arna nl nam'elar m'ertu a Isrel udlani. 5Arna nl nam'elan a Suta avtu mak arna m'ertu avv'i tausen inal lman iru (12,000), nl nam'elan a Rup'en avvi tausen inal lman iru (12,000), nl nam'elan a Kat avv'i tausen inal lman iru (12,000), 6nl nam'elan Aser avv'i tausen inal lman iru (12,000), nl nam'elan a Navtali avv'i tausen inal lman iru (12,000), nl nam'elan a Manasa avv'i tausen inal lman iru (12,000). 7Nl nam'elan a Simiun avv'i tausen inal lman iru (12,000), nl nam'elan a Livai avv'i tausen inal lman iru (12,000), nl nam'elan a Isakar avv'i tausen inal lman iru (12,000). 8Nl nam'elan a Sepulun avv'i tausen inal lman iru (12,000), nl nam'elan a Susev' avv'i tausen inal lman iru (12,000), nl nam'elan a P'ensamin avv'i tausen inal lman iru (12,000).

M'ertu istudau avandan arna v'anu udlani avp'tir arna nah napl p'as

9Sarei, pavrni, nla m'ertu istudau m'ertu kinkin ikaspanr, avandan arna v'anu udlani, nl nam'el udlani, kavandan asnr m'ertu udlani, kavv'ana arna v'nen udlani, avp'tir arna nah napl p'as kavp'tir arna nah Net Sivsiv. Avua klus tva kavua ru m'tu al lm'ar, kavv'ara a nadl lil, kavvr ti a, 10“Atuad, la ilak arna napl p'as ha, m'a Net Sivsiv, Hir arlev'la nakd.” 11Ensel udlani avp'tirtalu a napl p'as, kavp'tirtalu anr elta udlani m'er sei iv'a isilv' hara, laha avrars arna nahr arna nah napl p'as, kavpatei Atua kavvr ti a, 12“Amen. Nakd p'vpatei Atuad dav'a ikahiris naran, kavvrp'ep'a si p'sp'asan m'a nut irndu si udlani inap'ei, kavvr ip'as ani, kavani ti nahan ipav'a eia, kavvrp'ep'a pari lilan m'a nut huan, Amen.”

13Laha, elta iamk asnr ivr a kana kavr ti a, “?M'ertu laha avua klus tva avv'i hir ak? ?Avandan ip'i?”

14 # Taniel 12:1; Mat 24:21; Mak 13:19. Nvr ani, kavr ti a, “Mlin, nakm krndaui.” Ivr a kana kavr ti a, “Hir avv'i m'ertu der lil itier sarar, katvsila sera klusar kavani ti itva a di Net Sivsiv. 15Sena si lera, hir avlak arna nah napl p'asan Atua kavan parian ren m'a lihat al nmah tamatan. Laha, Hin la ilak arna napl p'as ha ipalak m'er. 16#Aisaia 49:10.Hir akavrn nam'er, akavrn navar ml. Neiel ikanasr ml, v'aha si kinkin ikauv p'akr ml. 17#Npin 23:1; Esikiel 34:23; Npin 23:2; Aisaia 49:10; Aisaia 25:8.Sena ti Net Sivsiv, ip'tir a p't nut na napl p'as, ipap'aurr kav'av'ar apavrav'a asn naui na silv'ien itpeia dan al nadep'. Laha, Atua ipavala ui m'atar udlani.”

Currently Selected:

Revelesen 7: nmb

Highlight

Copy

Compare