Revelesen 2

V'nen iv'a asn sas iter a Evases

1Sarei, ivr ti a, “Nakm pulul ani ipav'a asn ensel na sas iter a Evases, kavr ti a, ‘Ki laha iv'i v'nenak, la nua msi isaru arna m'ldu lm'ak ha, kav'el arna p't nut na lait isaru aani a kul. 2Kana nrndu sei kani, karndu pariam m'a nut v'ahienam ip'arei inap'ei. Nrndu ti kaam'ahu a m'ertu stu, karndu ti nakm ktendina sera m'ertu la avvr ti avv'i apusel ha, v'eti ahavv'i apusel, katla sera ti avhap'il uaki. 3Nla ti kua si dv, v'ahienam ip'arei, kam'akar sena nahak, np'm iastu aranan. 4V'eti nla si iamk istu asnm, ktln sera vtmienam itauamu. 5Sena si lera, pav'ahur vtmienam itauamu, naran kdars. Pavav nlm kan parei ml kani itauamu. Ipavr ti ikahei, Kana p'ama asnm ipalahml, kalev'la laitam arna m'lnen, ipavr ti mkavav nlm. 6V'eti nla si p'as iamk asnm, klep'la pariar m'ertu avvr ti avv'i m'ertuan a Nikulas. Kana ml nlep'lei.

7 # Ap'u 2:9; Rev 22:2; Esikiel 28:13; 31:8. M'ertu drlnan iak, hin iparn sei M'im'iln P'as ivr anr sas. M'ertu ipap'tir kahua kasiv' si udlani itukari, hin Kana p'em'ahu a ti ipud nava nai na silv'ien, iter arna p't nut na v'anu p'asan Atua, iv'i Paratais.’

V'nen iv'a asn sas iter a Smirna

8 # Aisaia 44:6; 48:12; Rev 1:17; 22:13. Hilaha nakm pulul ani ipav'a asn ensel na sas iter a Smirna, kavr ti a, ‘Ki laha iv'i v'nenak, la ntauamu dau katauatah dau ha, katam'a sarei kasilv' ml. 9Kana nrndu sei kani karndu deram m'a ti siam ihei, v'eti nakm siam istudau. Nrndu ti m'ertu avsip'len kam'i kavvr ti avv'i m'ertu a Isrel, v'eti ihei, avv'i sasan a Sitan uaki. 10Madedrn a der udlani ipaiarh. Parni, a Sitan ipasran kam'i kinkin arna p'resin, a ti ipahlhala kam'i, der ipaier kam'i napn ipanal. V'eti nakm pap'tir arna v'ahienam dav'a ipaier naran pam'a. Sarei, Kana p'etau anh manu p'as na silv'ien.

11 # Rev 20:14; 21:8. M'ertu drlnan iak, hin iparn sei M'im'iln P'as ivr anr sas. M'ertu ipap'tir kahua kasiv' si udlani itukari, tv'el m'ien ikautakm ani.’

V'nen iv'a asn sas iter a Perkamus

12Hilaha nakm pulul ani ipav'a asn ensel na sas iter a Perkamus, kavr ti a, ‘Ki laha iv'i v'nenak, la nua tali lil aiati ihaan arna tv'eliel iru ha. 13Kana nrndu si kani karndu nut klak, iv'i nut a Sitan iv'i mlin nen. Nrndu ti kuada nahak ihua, kaaln v'ahien p'asak, naran Antipas ip'tir kavrp'ep'a mamh Kana. Hin arpi a p't nut nam'i, iv'i nut a Sitan ilak. 14#Nut Kaka 22:5,7; 31:16; TVH 23:4; Nut Kaka 25:1-3.V'eti nla si kinkin istu asnm, sena ti kam'i kinkin atlera avsapa v'nenan a Peilam, la iv'iv'en navanel an a Peilak a ti ipani ti m'ertu a Isrel apavtitihap'el ha kavr ti apavhan sei atvtu sarei asn aitul kavan si stu m'a tav'et. 15Kam'i kinkin ml avsapa v'nenar m'ertuan a Nikulas. Kana nlep'la si lera. 16Nakm pavav nlm. Ipavr ti ikahei, Kana p'ama asnm ipalahml kan naur m'er a tali lil idan al navak.

17 # Avruh 16:14,15; 16:33,34; Sun 6:48-50; Aisaia 62:2; 65:15. M'ertu drlnan iak, hin iparn sei M'im'iln P'as ivr anr sas. M'ertu ipap'tir kahua kasiv' si udlani itukari, Kana p'etu tim'ah tutuah ani a ti ipahani, iv'i mana, katu nav'et m'a ani, atulul sarei a naha m'dah aranan. M'ertu kinkin iarndu naha nen, v'eti m'ertu ilav'i uaki iparndaui.’

V'nen iv'a asn sas iter a Taiataira

18Hilaha nakm pulul ani ipav'a asn ensel na sas iter a Taiataira, kavr ti a, ‘Ki laha iv'i v'nenak, nv'i a Natn Atua, la m'atak iluluv'en kanep'a nap' ha, tlk inep'a aian v'il ier istudau. 19Kana nrndu si kani karndu vtmienam m'a pariam, karndu v'ahien p'asam m'a nut nlm ip'arei inap'ei, karndu ti parei kani hilaha ilil mau kasiv' itauamu. 20#1 Armlin 16:31; 2 Armlin 9:22,30.V'eti nla si kinkin istu asnm, sena ti nakm km'ahu a tav'et lera, iv'i a Sesepel. Hin ivr ti iv'i tav'et iv'i pruvet, kav'iv'en sei anr m'ertu na m'akarienak, karv'r a ti apavan si stu m'a tav'et kavhan sei atvtu sarei asn aitul. 21Laha, Kana ntu naran kinkin ani a ti ipavav nln karn istu sena si stu iani m'a dui, v'eti hin iavav nln. 22Pavrni, Kana p'ani ipam'atr arna pas, katu der lil anr m'ertu avan si stu m'ei, ipavr ti akavvav nlr kavrn istu sena si stuar. 23#Npin 7:9; Seremaia 17:10; Npin 62:12.Laha Kana p'erpr a natn apavram'a, laha sas udlani apavrndu ti Kana nv'i Hin la ntala sei iter arna v'ahienar m'a nlr m'ertu udlani ha. Laha p'etu kam'i udlani p'sev' ulien ipaviviln a pariam'i.

24V'eti kam'i m'er m'ertu uraur avlak a Taiataira la ahavsapa v'nen stu lera ha, avv'i nki ahavrndu pla si stuan a Sitan, inep'a nut avri inap'ei, Kana nkatu si dv kinkin uraur ml aranam'i. 25V'eti kam'i pavuada sei ktvlev' sarei ipahua dav'a ipaier naran Kana p'ama. 26#Npin 2:8,9.Laha m'ertu ipap'tir kahua kasiv' si udlani itukari, kauada pariak dav'a ti ipahiris, Kana p'etu nut hua ani a ti ipav'i mlin na v'anu udlani. 27“Laha, Hin ipav'i Mlinar, kaua napilaktan iv'i aian, kutakm anr inep'a nut ssv'en aani a vdrei imrmaur inap'ei, naran arpi.” A Tatei itu Kana nut hua inap'i lera. 28Laha, Kana p'etu msi ren ani. 29M'ertu drlnan iak, hin iparn sei M'im'iln P'as ivr anr sas.’ ”

Currently Selected:

Revelesen 2: nmb

Highlight

Copy

Compare