Revelesen 3
3
V'nen iv'a asn sas iter a Sartis
1Sarei, ivr ti a, “Hilaha nakm pulul ani ipav'a asn ensel na sas iter a Sartis, kavr ti a, ‘Ki laha iv'i v'nenak, la M'im'iln isaru avv'i nkan Atua m'a msi isaru avrater asnk ha. Kana nrndu sei kani, karndu ti avr ti ksilv', v'eti km'a. 2Nakm pasp' kani ti sei iter uam, nut pa ti ipam'a, ipama kahua ml. Sena ti nala ti pariam iviviln arna nahn Atua. 3#Mat 24:43,44; Luk 12:39,40; Rev 16:15.Sena si lera nakm pav'ahur nut klev' v'nen p'as karni inap'ei. Pauadei ipahua, kavav nlm. V'eti ipavr ti nkahsp', Kana p'ama asnm ipanep'a dui na v'nv'nahien, laha mkarndu naran Kana p'ama asnm. 4Asnm'i, a Sartis, nahar m'ertu kinkin uam iak, tkv ihei arna klusar. Laha, hir apavv'el m'a Kana kavua klus tva, sena ti hir avviviln ani. 5#Avruh 32:32,33; Npin 69:28; Rev 20:12; Mat 10:32; Luk 12:8.M'ertu ipap'tir kahua kasiv' si udlani itukari, hin ipaua klus tva. Laha, Kana nkavala nahan arna puk na silv'ien, v'eti p'evrp'ep'a nahan arna nahn a Tatei m'er enselan.
6M'ertu drlnan iak, hin iparn sei M'im'iln P'as ivr anr sas.’
V'nen iv'a asn sas iter a Vilatelvia
7 #
Aisaia 22:22; Sup 12:14. Hilaha nakm pulul ani ipav'a asn ensel na sas iter a Vilatelvia, kavr ti a, ‘Ki laha iv'i v'nenak, la np'as, kav'i V'nen Dau, kav'i “Hin la iua kiian a Divt ha, Hin la iela liu, v'eti m'ertu kinkin ikap'leskari, kap'leskar liu, v'eti m'ertu kinkin ikaielei ha.” 8Kana nrndu sei kani. Parni, Kana ntiela sera liu iamk itapar arna nahm, m'ertu kinkin iarndu ti ipap'leskari. Sena ti nakm nut huam isusupa, v'eti kuada v'nenak, kaap'ep'n nahak. 9#Aisaia 49:23; 60:14; Aisaia 43:4.Parni, Kana p'en si ipamk asnr m'ertu avv'i sasan a Sitan. Hir avvr ti avv'i m'ertu a Isrel, v'eti ihei, avhap'il. Parni, Kana p'ani ti hir apavrama kaviaul kavsisihpu asn tlm, kavrndu ti nlap'as anh. 10Nakm kuada v'nen p'as iv'iv'en nut v'ahienak ip'arei inap'ei. Sena si lera, Kana p'euadah kalev'lah naran der ipaier nadep' udlani kandina m'ertu avlak arna nadep'. 11Parni, Kana p'ama ipalahml. Nakm pauada sei ktvlev' sarei ipahua, imahei ti m'ertu kinkin ipalev' manu p'asam. 12#Rev 21:2; Aisaia 62:2; 65:15.M'ertu ipap'tir kahua kasiv' si udlani itukari, Kana p'ani ti hin ipama kav'i nakal na nmah tamatan Atuak. Laha, hin ikaruh ml. Kana p'ulul a nahan Atuak aranan, m'a naha v'anu lilan Atuak, iv'i Serusalem m'dah, la ima dan eia asn Atuak ha. Laha, Kana p'ulul a nahak m'dah aranan.
13M'ertu drlnan iak, hin iparn sei M'im'iln P'as ivr anr sas.’
V'nen iv'a asn sas iter a Lautisia
14 #
V'nen 8:22. Hilaha, nakm pulul ani ipav'a asn ensel na sas iter a Lautisia kavr ti a, ‘Ki laha iv'i v'nenak, la nv'i Amen ha, kav'i V'nen Viviln, kav'i V'nen Dau, kav'i Pla si udlani Atua iani. 15Kana nrndu sei kani. Nrndu ti nakm kaahaha v'aha kaavuv. M'rn imp'as mau, imvr ti nakm mhaha v'aha mvuv. 16V'eti nakm klak arna p't nut uaki, kaahaha v'aha kaavuv. Sena si lera nlk ip'ap'r, nrn ti p'elusranh dan al navak. 17Nakm kvr ti a, “Siak ilil, nlav'r si p'sp'as istudau, si kinkin ml ihei nrn nam'er ani.” V'eti kaarndu ti krn istu, ti kv'i m'ertu a nadep' dau, kaahiak a sei, kv'i m'etapar kamlmal.
18Sena si lera, Kana nvr anh a ti pul kul asnk, la atal sarei al nep'v'en ha, a ti siam ipastudau, kaul klus tva, a ti pauei. Laha, mkamamih sena ti mkamalmal ml. Nakm pava m'atam a m'erasin iv'i pumat, a ti paledu sei. 19#V'nen 3:12; Isrel 12:6.M'ertu udlani nlap'as anr nv'ana hua m'er karpr, a ti p'klr ipaviviln. Sena si lera, nakm pap'tir ipahua kavav nlm. 20Parni, Kana np'tir asn karliu kaspspa liu. Ipavr ti m'ertu kinkin iparn drlk kaiela liu, Kana p'ama eim asnn, kahatat m'ei, laha hin ipahatat m'a Kana. 21M'ertu ipap'tir kahua kasiv' si udlani itukari, Kana p'em'ahu a ti ipalak m'a Kana arna napl p'asak, inep'a ti Kana ntp'tir sarei kasiv' si udlani kalak m'ei a Tetiak arna napl p'asan.
22M'ertu drlnan iak, hin iparn sei M'im'iln P'as ivr anr sas.’ ”
Currently Selected:
Revelesen 3: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
