Revelesen 1

Tertauamu na v'nen

1V'nen laha a Iesu Kristu ivrp'ep'ei, la Atua ittu sarei ani ha, a ti ipav'iv'en anr m'ertu na m'akarienan sei ipatu hin ipalahml. Iv'iv'en si lera katep'a enselan ima asnk, nv'i a Sun, kav'i dui na m'akarienan. 2Nvrp'ep'a v'nenan Atua, m'a sei a Iesu Kristu ivrp'ep'ei, kavr si udlani nlei. 3M'ertu iv'ana arna v'nen laha, m'er m'ertu avrn v'nenan Atua laha, kavuada sei nulul ani aranan, hir apavrn ipap'as, sena ti naran nen itmima.

A Sun ivr ip'as a sas isaru arna nut a Esia

4 # Avruh 3:14; Rev 4:5. Kana nv'i a Sun, nulul a ruplet laha ipav'a asn sas isaru iter arna nut a Esia.

Hin la ilak hilaha, kalak tituei, kalak uam arna naran ipama ha, nrn ti Hin ipatu vtmienan m'a tamatan a kam'i, Hin m'er M'im'iln isaru avlak arna nahn asn napl p'asan. 5#Aisaia 55:4; Npin 89:27.M'ei a Iesu Kristu, iv'i V'nen duan Atua, kav'i M'ertu ithal arna m'ien itauamu dau, kav'i Mlinar mlin udlani arna nadep'.

Hin ilap'as a nakd, kasilelua si stuad a din uaki. 6#Avruh 19:6; Rev 5:10.Kani ti nvrama kavv'i mlin, kavv'i pris asn Atua, iv'i a Tetian. Nakd p'vani ti nahan ipav'a eia. Hin iv'i Mlin, nut huan ipaiak dav'a ikahiris naran. Amen.

7 # Taniel 7:13; Mat 24:30; Mak 13:26; Luk 21:27; 1 Tes 4:17; Sek 12:10; Sun 19:34,37; Sek 12:10; Mat 24:30. Pavlei, Hin ipama arna p'knaran, m'ertu udlani apavlei a m'atar. Aau, m'ertu udlani la avvei ha, apavlei. Laha, m'ertu arna v'anu udlani arna nadep' apavtakal sanan. Aau, ipanap'i lera. Amen.

8 # Rev 22:13; Avruh 3:14. A Mlin Eia ivr ti a, “Kana nv'i Alva kav'i Umika, nv'i pla si udlani kav'i ual si udlani. Kana nlak hilaha, kalak tituei, p'elak uam arna naran ipama. Kana nut huak ilil kasiv' si udlani.”

A Sun ila Net M'ertu

9Kana nv'i a Sun, kav'i tv'elm'i, kap'lt m'a kam'i arna der, kap'tir m'a kam'i arna v'anuan a Kristu, katrahi. Kana nlak arna v'anu iamk, nahan iv'i Patmus, sena ti nvrp'ep'a v'nenan Atua kav'iv'en nahan a Iesu Kristu. 10Arna napnan a Mlin Lilad, M'im'iln P'as ima aranak. Laha, nrn nadl lil a tahk, inep'a drl natav, ivr ti a, 11“Kana nv'i Alva kav'i Umika, ntauamu dau katauatah dau. Nakm pulul a si udlani klei arna puk ipamk, katap'ei ipav'a asn sas isaru iter arna nut a Esia, ipav'a a Evases, a Smirna, a Perkamus, a Taiataira, a Sartis, a Vilatelvia m'ei a Lautisia.”

12Laha, nvavp'la kana a ti p'ela ti hin ak iv'ana m'a kana, kala lait isaru aani a kul. 13#Taniel 7:13; Taniel 10:5.Laha, arna p't nut na lait isaru lera, Dui iamk ip'tir inep'a Net M'ertu. Iua klus iamk ip'arei kaier tln, kav'u sitrav iv'i kul arna mrn. 14#Taniel 7:9.#Taniel 10:6.Ptn m'a niln itva istudau, kanep'a nil sivsiv v'aha m'elidu. M'aten inep'a nap' iluluv'en. 15#Esikiel 1:24; 43:2.Tln ier inep'a aian v'il naran aali al nep'v'en, drln inep'a tna nahu na nata ilil. 16Arna m'ldu lm'an iua msi isaru. Tali lil aiati ihaan arna tv'eliel iru idan al navan. Nahn ier inep'a neiel ien lihalm'au. 17#Aisaia 44:6; 48:12; Rev 2:8; 22:13.Laha, naran nlei, nrs asn tln inep'a ti ntam'a. Sarei, itu m'ldu lm'an aranak kavr a kana, kavr ti a, “Madedrn, Kana ntauamu dau katauatah dau. 18Kana nv'i M'ertu la nsilv' ha. Ntam'a sarei, v'eti palei, nsilv' ml dav'a ikahiris. Amen. 19Kana nua kii na nut m'ertu im'a, kaua kii na m'ien. Nakm pulul a si udlani klei, sei itu hin hilaha, m'a sei ipatu hin ipatauatah. 20Msi isaru klei arna m'ldu lm'ak, m'a lait isaru aani a kul, iv'iv'en sei itutuah. Msi isaru iv'i ensel na sas isaru, lait isaru klei, iv'i sas isaru lahara.”

Currently Selected:

Revelesen 1: nmb

Highlight

Copy

Compare