Matiu 19
19
P'kl ti dui ipasran tav'etan
(Mak 10:1-12; Luk 16:18)
1Naran a Iesu ihiris a v'nen lera, iln nut a Kalili kadav'a arna nut a Sutia iter a tv'eliel a nauei a Surtan. 2Laha, m'ertu istudau avsapei, laha Hin imhmah anr atlera.
3Laha, arvarisi avrama asnn a ti apavandinei, kavvr ani kavvr ti a, “?Iviviln a ti dui ipasran tav'etan sena si kinkin uaki?”
4 #
Ap'u 1:27; 5:2. Ivrpranr kavr ti a, “?Kam'i kaavla nut Paivul ivr ti arna naran na ap'u, Atua ien dui ma tav'et? 5#Ap'u 2:24.Kavr ti a, ‘Sena si lera, dui ipaln a tetian m'ei a unian kap'lt m'ei a naun, karma karamk arna p'akr.’ 6Laha, aharv'i m'ertu iru ml, v'eti aramk arna p'akr. Sena si lera, sei Atua itup'ltani, m'ertu ikatupri.”
7 #
TVH 24:1-4; Mat 5:31. Arvarisi avvr ani kavvr ti a, “?Inap'i hin a Musis itu v'nen hua a ti ipulul a ruplet pr, kavr ti ipasran tav'etan, sarei kasrani?”
8Ivr anr kavr ti a, “A Musis im'ahu a ti pavsran tav'etam'i sena ti nlm'i ihua, v'eti naran na ap'u, ianap'i lera. 9#Mat 5:32; 1 Kurin 7:10,11.V'eti Kana nvr a kam'i, ipavr ti dui kinkin isran tav'etan naran iav'nah dui uraur, kam'arit m'a tav'et uraur ml, hin iv'nahi uaki, v'aha ipavr ti dui kinkin im'arit m'a tav'et dui uraur itsran sarei, hin iv'nahi uaki.”
10Arm'ertuan avvr ani kavvr ti a, “Ipavr ti ipanap'i lera asn dui m'a tav'etan, ip'as mau a ti amam'arit.”
Dui kinkin ahavm'arit
11V'eti ivr anr kavr ti a, “Iav'i dui udlani avrndu ti apavuada v'nen lera, v'eti hir uaki Atua itu nut hua anr. 12Sena ti dui kinkin akavm'arit sena ti aviak inap'i lera, dui kinkin avv'i tamav sena ti atrr, dui kinkin ahavm'arit sena v'anu eia. Dui avrndu ti apavuada v'nen lera, apavuadei pr.”
A Iesu itu tamat katu lm'an arna mardel papa
(Mak 10:13-16; Luk 18:15-17)
13Sarei, avuirma mardel papa kinkin asnn a ti ipatu lm'an aranar katu tamat, v'eti arm'ertuan avv'ana hua m'er. 14V'eti a Iesu ivr ti a, “Pavm'ahu a ti mardel papa apavrama asnk, mavrkarr, sena ti v'anu eia iv'i nkar m'ertu avnap'i lera.” 15Sarei, itu lm'an aranar, kav'el kaln nut lera.
Malakal iamk sian istudau
(Mak 10:17-22; Luk 18:18-23)
16Laha, pavrni, dui iamk ima asnn kavr ani, kavr ti a, “?Tisa P'as, p'en si p'as v'ata a ti p'elev' silv'ien ikahiris naran?”
17Ivr ani, kavr ti a, “?Inap'i hin kvr ti Kana np'as? M'ertu kinkin ihei ip'as, v'eti nki iamk uaki, iv'i Atua. V'eti ipavr ti nakm krn ti paier silv'ien p'as, pasapa v'nen huan Atua.”
18 #
Avruh 20:13; TVH 5:17;
Avruh 20:14; TVH 5:18;
Avruh 20:15; TVH 5:19;
Avruh 20:16; TVH 5:20. Ivr ani, kavr ti a, “?V'nen hua v'ata?” A Iesu ivr ti a, “Marpep'n m'ertu, mav'nah tav'et, mav'nah sei, mahap'il m'a tv'alm.
19 #
Avruh 20:12; TVH 5:16;
Livai 19:18. Pani ti nahar a tetiam m'ei a uniam ipav'a eia, palap'as a tv'alm inep'a ti iv'ih.”
20Malakal lera ivr ani, kavr ti a, “Kana nsapa si lera udlani, naran nsusupa dav'a ier dika. ?V'ata ml iter uam asnk?”
21A Iesu ivr ani, kavr ti a, “Ipavr ti krn ti paviviln arna nahn Atua, pav'a kulul a siam udlani katau anr m'ertu siar ihei, dav'a ti siam ipastudau arna nut eia. Sarei, pama kasapa Kana.”
22V'eti naran malakal lahara irn si lera, iv'el karuh karn istu, sena ti sian istudau.
Atua irndu ti ipan si udlani
(Mak 10:23-31; Luk 18:24-30)
23Sarei, a Iesu ivr anr arm'ertuan kavr ti a, “Nvrdaui, nvr a kam'i, ihua a ti m'ertu sian istudau ipav'a arna v'anu eia. 24Nvr a kam'i ml, Ihua a ti kam'el ipav'a al pt nitel, v'eti ihua mau a ti m'ertu sian istudau ipav'a arna v'anuan Atua.”
25Naran arm'ertuan avrn si lera, avrdus nlr ani istudau kavvr ti a, “?Ipavr ti inap'i lera, ak iviviln a ti Atua ipalev'lei?”
26V'eti a Iesu ip'ar kavr anr kavr ti a, “Si lera m'ertu ahavrndu ti apavani, v'eti Atua irndu ti ipan si udlani.”
27Sarei, a P'ita ivr ani, kavr ti a, “Palei, kam'em' ntvln sera si udlani kavsapah. ?Atua ipatu v'ata a kam'em' sanan?”
28 #
Mat 25:31;
Luk 22:30. A Iesu ivr anr kavr ti a, “Nvrdaui, nvr a kam'i, naran Atua ipan si udlani ipam'dah ml, Kana nv'i Net M'ertu p'elak arna napl na si p'sp'asak. Laha, kam'i la ktvsapa sera Kana ha, pavlak arna napl p'as ipanal lman iparu (12) kavv'ana hua m'er nl nam'el inal lman iru (12) a Isrel. 29M'ertu udlani iln nmahan v'aha tv'aln, a v'nn, a tetian, a unian, a naun, a natn v'aha nadep'an, sena nahak, hin ipalev' si lera udlani ml ipav'anelnal ipav'amk (100) kalev' silv'ien ikahiris naran. 30#Mat 20:16; Luk 13:30.V'eti m'ertu istudau avtauamu apavtauatah, m'ertu avtauatah apavtauamu.
Currently Selected:
Matiu 19: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia