Matiu 20
20
A Iesu isran v'nen ivrur m'ertu avan parei al pitvet na nahau na krep
1Sena ti v'anu eia inep'a sera mlin na naml iamk. Hin iv'a m'etav'aran nrnren a ti ipalev' dui kinkin apavan parian al pitvetan, iv'i nahau na krep. 2Laha, avm'ahu a ti apavan parian, ulien nen ipav'i vatu iv'i tausen iamk (1,000) arna napn ipamk. Sarei, itap'er avrav'a al pitvetan na nahau na krep. 3Dav'a, ihih m'etaneiel isav'et, iv'a ml kala dui kinkin uraur avp'tir vn arna nut aulul a sei. 4Laha, ivr anr kavr ti a, ‘Kam'i pavrav'a ml kavm'akar al pitvetak, laha kana p'ul kam'i ipaviviln.’ Laha, avrav'a. 5Dav'a ihih m'etaneiel inal lman iru, iv'a ml, kadav'a ml ihih m'etaneiel itl knarev', kani inap'i lera ml. 6Sarei, ihih m'etaneiel ilm' knarev', iv'a ml, kapasla dui kinkin avp'tir vn, kavr anr kavr ti a, ‘?Inap'i hin kvp'tir vn atlaha dav'a hin nut ipam't?’ 7Avvr ani kavvr ti a, ‘Sena ti dui kinkin iahma kalev' kam'em' a ti p'van parian.’ Ivr anr kavr ti a, ‘Kam'i ml pavrav'a al pitvet na nahau na krep, laha kana p'ul kam'i ipaviviln.’
8 #
Livai 19:13; TVH 24:15. Dav'a naran nut iv'i knarev' dau, dui la iv'i mlin na pitvet na nahau na krep hara ivr a mlin na parei kavr ti a, ‘Pav'ara anr arm'ertu na m'akarienak udlani kulr. Pul nki avrama itauatah ipatauamu, dav'a ipaier nki avrama itauamu.’ 9Naran dui ilav'r arna m'etaneiel ilm' knarev' avrama, itu vatu iv'i tausen iamk (1,000) iamamk anr udlani. 10Dav'a naran nki ilav'r itauamu avrama, avv'ah ti ipulr ipalil mau aranar, v'eti iulr udlani inap'amk, iv'i vatu iv'i tausen iamk (1,000) iamamk anr uaki. 11Laha, naran avlev' nav'etar avv'ana kavmlendina dui ip'aur nmah, 12kavvr ti a, ‘Ardu laha avm'akar m'etaneiel iamk uaki, v'eti kulr inap'amk m'a kam'em' la nvm'akar dav'a naran neiel ihua ihuadau dav'a ier knarev' ha.’ 13V'eti ivrpranr kavr a hir ki iamk kavr ti a, ‘Tv'alk, kana nautakm anh. ?Kdam'ahu sarei asnk a ti p'ulh a vatu iv'i tausen iamk (1,000), v'aha? 14Palev' nav'etam kadahau. Kana p'ul dui itauatah lera ipanap'ah uaki. 15?Kaav'ah ti iviviln a ti p'en sei kana nrni uaki arna sei iv'i nkak? ?Inap'i hin klep'la kana sena ti kana nen si p'as?’ 16#Mat 19:30; Mak 10:31; Luk 13:30.Sena si lera, m'ertu avtauatah apavtauamu, v'aha m'ertu avtauamu apavtauatah, sena ti Atua iv'ara anr m'ertu istudau, v'eti iv'lair m'ertu avdakr uaki.”
A Iesu ivri ml iv'i v'atl nen, kavr ti ipam'a kathal ml arna m'ienen
(Mak 10:32-34; Luk 18:31-34)
17Dav'a naran a Iesu iv'a eia a Serusalem kalev' m'ertuan arnal lman iru (12) arna navanel, hir uaki avududl, kavr anr kavr ti a, 18“Pavrni, p'vrav'a eia a Serusalem, laha apatu Kana, nv'i Net M'ertu, al lm'ar arpris lil, m'er artisa na v'nen hua, laha hir apavv'ana hua m'a Kana kavvr ti nkam'a pr. 19Kavtu Kana al lm'ar v'anudl a ti hir apavsip'len Kana, kavrp Kana a nahau dav'a kavtu Kana arna su lamu. V'eti p'ethal ml arna nitla napn.”
A uniar a Sim'is m'ei a Sun imiman ti aparlil isiv' nelnal arna v'anuan a Iesu
(Mak 10:35-45)
20Laha, a unian a natn a Sep'eti arru ima asn a Iesu m'er a natn dui arru hara, kasisihpu asnn kamiman si kinkin ani.
21Laha, a Iesu ivr ani, kavr ti a, “?Krn v'ata?” Ivr ani, kavr ti a, “Pam'ahu a ti a natk arru laha, tv'aln ipalak arna m'ldaum, tv'aln arna m'ir nam arna v'anuam.”
22V'eti a Iesu ivrpranr kavr ti a, “Kam'i kaarrndu sei krmimani. ?Kam'i parm'nm'ndau al panikin la Kana p'em'nm'n a nln ha, v'aha parpaptais arna paptais Atua ipatu Kana?” Arvr ani karvr ti a, “Aau, nrrndu ti p'erani.”
23Ivr anr kavr ti a, “Krvrdaui, parm'nm'n al panikinak karpaptais ipanep'a Kana, v'eti Kana nkam'ahu a ti dui ipamk ipalak arna m'ldauk, tv'aln arna m'ir nak, v'eti a Tetiak uaki ipatu si lera anr m'ertu hin itv'li sarar sanan.”
24Naran m'ertuan arnal avrn si lera, nlr irer anr tv'alr arru. 25#Luk 22:25,26.V'eti a Iesu iv'ara anr a ti apavrama asnn, kavr ti a, “Kam'i kvrndu ti mlin lilar v'anudl avhua arna nut huar, dui lilar avtp' m'ertu a ti apavlak a nv'r. 26#Mat 23:11; Mak 9:35; Luk 22:26.V'eti ikanap'i lera asnm'i. Ipavr ti dui kinkin asnm'i irn ti ipalil, hin ipav'i dui na m'akarienam'i. 27Dui irn ti ipav'i mlin asnm'i, ipama pr kav'i dui na m'akarienam'i. 28Inep'a Kana, nv'i Net M'ertu, nahma sena ti m'ertu apavan pariak, v'eti Kana p'en pariar katu silv'ienak a ti p'ulla m'ertu ipanelnal.”
M'etapis iru arledu sei ml
(Mak 10:46-52; Luk 18:35-43)
29Naran avln nut a Seriku, nelnal avstudau avsapei. 30Laha, pavrni, m'etapis arru karlak a tv'eliel na navanel. Naran arrn ti a Iesu iv'siau arv'ara eia karvr ti a, “U Mlin, kv'i a Natn a Divt, parn istu a kam'em'.”
31Laha, nelnal avv'ana hua m'er kavvr ti aparp'n hir. V'eti hir arv'ara eia mau, karvr ti a, “U Mlin, kv'i a natn a Divt, parn istu a kam'em'.”
32Laha, a Iesu ip'tir kav'ara anr kavr ti a, “?Krrn ti p'en v'ata asnm'i?”
33Arvr ani karvr ti a, “Mlin, nrrn ti pani m'etam'em' ipaledu sei.”. 34Laha, a Iesu irn istu anr kaier m'atar. Iv'amk m'a ti arla karledu sei ml, karsapei.
Currently Selected:
Matiu 20: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia