Matiu 18
18
?Hin ak iv'i ter lil arna v'anu eia?
(Mak 9:33-37; Luk 9:46-48)
1 #
Luk 22:24. Arna naran lera arm'ertuan avrama asn a Iesu kavvr ti a, “?Hin ak ilil mau arna v'anu eia?”
2A Iesu iv'ara a mardel pa iamk ima asnn kataui ip'tir a p't nut nar, kavr ti a, 3#Mak 10:15; Luk 18:17.“Nvrdaui nvr a kam'i, ipavr ti kam'i mkavvav nlm'i kavrama kavnep'a mardel pa, mkavrav'a arna v'anu eia. 4Sena si lera, ipavr ti m'ertu kinkin ipani ti hin ipav'a a nadep' kanep'a mardel pa laha, hin ipalil mau arna v'anu eia. 5M'ertu kinkin ipalev' mardel pa ipamk ipanap'i laha arna nahak, hin ilev' Kana.
Si udlani la iani ti m'ertu ipars kan si stu ha
(Mak 9:42-48; Luk 17:1,2)
6V'eti m'ertu kinkin ipani ti mardel pa inap'i laha, la iv'ah Kana ha, ipars arna v'ahien p'asan, ip'as mau a ti apalida nav'et lil arna natavnan kasrani ipatpl al p't nata. 7U, der ipaier m'ertu avlak arna nadep' sena ti avani ti m'ertu apavrars arna v'ahien p'asar. Sena ti iktu hin pr a ti apani ti m'ertu ipars arna v'ahien p'asan, v'eti der ipaier m'ertu la iani ti m'ertu uraur irs ra.
8 #
Mat 5:30. Sena si lera, ipavr ti lm'am v'aha tlm ipani ti pars arna v'ahien p'asam, patrusi kasrani. Ip'as mau a ti palev' silv'ien p'as kav'i tlamk v'aha sparasp, isiv' ti lm'am iparu v'aha tlm iparu v'eti apasranh al nep'v'en ikahiris naran. 9#Mat 5:29.V'aha ipavr ti m'atam ipani ti pars arna v'ahien p'asam, palev'lei kasrani. Ip'as mau a ti palev' silv'ien p'as kav'i m'etamk isiv' ti m'atam iparu v'eti apasranh al nep'v'en.
A Iesu isran v'nen ivrur sivsiv imln
(Luk 15:3-7)
10 #
Luk 19:10. Pavv'ah kam'i ti mavsip'len mardel pa ki ipamk ipanep'a ki laha, sena ti Kana nvr a kam'i ti arna nut eia enselar avp'a nahn a Tetiak ilak eia nakl. 11Sena ti Kana nv'i Net M'ertu nma a ti p'elev'lar m'ertu avmln.
12?Inap'i? ?Ipavr ti dui iamk sivsivan inelnal iv'amk (100), v'eti nki iamk iv'el kamln, kaavv'ah ti ipaln nki inelsav'et pln isav'et (99) lahara kadav'a arna ptha katala nki imln? 13Laha, ipavr ti ipapaslei, nvrdaui nvr a kam'i, hin iparn ipap'as mau sena sivsiv lera, ipasiv' nki inelsav'et pln isav'et (99) la ahavmln hara. 14V'ahienan a Tetiam'i ilak eia inap'i lera. Hin iarn ti mardel pa ki ipamk inep'a ki laha ipamln.
?Apan v'ata m'a tv'alm ien si stu anh?
(Luk 17:3)
15 #
Luk 17:3. Ipavr ti tv'alm ipan si stu anh, pav'a kavrp'ep'a si stuan ani, kam'i parru uaki. Ipavr ti hin iparn v'nenam, ktlev'm'alet a tv'alm ml. 16#TVH 19:15.V'eti ipavr ti iarn v'nenam, palev' m'ertu ipamk v'aha iparu aparv'i v'nenam, sena ti m'ertu iru v'aha itl apavp'lt a ti apavrndu mamh v'nen udlani. 17V'eti ipavr ti iarn ti iparn v'nenar, pavr a sas. V'eti ipavr ti iarn ti iparn v'nena sas, pam'ahu ani a ti hin ipanep'a v'anudl v'aha dui ilev' takis nakl.
18 #
Mat 16:19; Sun 20:23. Nvrdaui nvr a kam'i, si udlani kam'i pavvrkari arna nadep', apavrkari arna nut eia, v'aha si udlani kam'i pavm'ahu ani arna nadep', apam'ahu ani arna nut eia.
19Nvr a kam'i ml, a ti ipavr ti kam'i ki parru arna nadep' parp'lt arna v'ahienam'i sena si kinkin la partu tamat sanan ha, a Tetiak ilak eia ipan sei krmimani. 20Sena ti arna nut m'ertu arru v'aha artl avp'lt arna nahak, Kana niak a p't nut nar.”
A Iesu isran v'nen ivrur dui iamhmah a m'ertu
21 #
Luk 17:3,4. Sarei, a P'ita ima asnn kavr ti a, “?Mlin, ipavr ti tv'alk ipan si stu kinkin a kana, kana p'emhmah ani ipav'av'a? Ipav'asaru?”
22 #
Ap'u 4:24. A Iesu ivr ani, kavr ti a, “Navr anh a ti ipav'asaru uaki, v'eti ipav'anelsaru ipav'asaru (70 x 7). 23Sena si lera, v'anu eia inep'a sera mlin lil kinkin iamk, irn ti apala kaunar m'ertu na m'akarienan. 24Naran iladina kaunar, avuirma dui iamk asnn, kaunan iv'i talen iv'i tausen inal (60,000,000,000 vatu). 25V'eti hin ikauldri, laha, mlinan itu v'nen a ti apulul anr m'ei a naun, armardelan m'a sian udlani, sarei, ipul kaun nen. 26V'eti dui na m'akarienan lahara irs kasisihpu asnn kapatei, kavr ti a, ‘Mlin, patrah kana. Kana p'ul kaunak udlani uam.’ 27Laha, mlina dui na m'akarien lahara irn istu ani kavr ti ikaul kaunan ml, kam'ahu a ti ipahau.
28V'eti dui na m'akarien lahara iv'el kapasla dui na m'akarien uraur ml. Hin ikaun asnn 100,000 vatu. Laha, iuadei kapahsda natavnan kavr ti a, ‘Pul kaunam.’ 29V'eti dui na m'akarien uraur irs kasisihpu asn tln kamiman ani ihua kavr ti a, ‘Patrah kana, dav'a p'ul udlani.’ 30V'eti ivr ti ikahei, kalav'i kasrani al p'resin, ipalak ipaier naran ipul kaunan udlani. 31Naran dui na m'akarien uraur avla ti si lera itu hin, avrn istu istudau kavrav'a asn mlinar kavvrp'ep'a si udlani ani. 32Laha, a mlin iv'ara a dui na m'akarienan lahara ml kavr ti a, ‘U, nakm kv'i dui stu iamk. Kana nm'ahu a ti mkaul kaunam ml, sena ti kmiman a kana ihua. 33?Inap'i hin kaarn istu a tv'alm inep'a nut kana ntrn istu sarei anh inap'ei?’ 34Laha, mlinan nln irer, kataui al lm'a m'ertu a ti apavanp'ilani ipaier naran ipul kaunan udlani.
35A Tetiak ilak eia ipani ipanap'i lera a kam'i, ipavr ti mkavmhmah a tv'elm'i arna nlm'i sena si stu avan a kam'i.”
Currently Selected:
Matiu 18: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia