Ap'u 50

1Sarei, a Susev' im'la arna nahn a tetian, katakal aranan, kasm pla nahn. 2Laha, a Susev' itu v'nen hua anr arm'ertu na parian, la avv'i tukta kavvr ti apavsiser p'akn a tetian ha; laha tukta avsisari. 3Ilev' napn inelv'a ti apavsiseri a tetian, inep'a ti ki lera iv'i napn na ti avsiser m'ertu nakl. Ardu a Itsip avliliak sanan napn inelsaru.

4Naran na ti avliliakan ihiris, a Susev' ivr anr arm'ertuan a Veru kavr ti a, “Ipavr ti kvlap'as a kana, nvrdaui, pavvr an a Veru, kavvr ti a, 5#Ap'u 47:29-31.‘A tetiak iani ti nturan a si kinkin. Hin kavr ti a, “Palei, hilaha, kana ntam'a. Patin kana al tah p'arei ntmhmah sarei arna nut a Kenan.” Sena si lera, nvrdaui, pavm'ahu a ti kana p'av'a katin a tetiak, sarei kam'alet ml.’ ”

6Laha, a Veru ivr ti a, “Pav'a auei katin a tetiam ipanep'a nut iani kturan ani inap'i.”

7Laha, a Susev' iv'a auei ti ipatin a tetian, arm'ertu na parian a Veru avsapei udlani, armlin na nmahan a Veru, m'er armlin na nadep' a Itsip. 8Nelnal udlani al nmahan a Susev' avrav'a m'er tv'aln, m'er arm'ertu al nmahan a tetian. Hir armardel papa uaki avliak m'alet, m'er sivsiv m'er pluk arna v'anu a Kusen. 9Kat m'er ardu na hus avv'el m'ei, avnelnal istudau kavv'el a nut iamk.

10 Naran avier nmah la Atat imhmah a uit a nln ha, a tv'eliel na Surtan, kavtakal eia ihua, tklien nen ilil ihuadau. Hin a Susev' itakal an a tetian napn isaru kaka. 11Naran ardu a Kenan, la avlak arna nadep' ha, avla tklien lera al nmahan Atat, avvr ti a, “Ki laha iv'i tklien lil asnr ardu a Itsip.” Sena si lera avtu naha nut lera iv'i Apel Misraim (Tkliena Itsip.) Nut nen iv'iv'a eia na nut a Surtan.

12Hir a natn dui avani inep'a ti hin itu v'nen hua asnr inap'ei. 13#Parei 7:16.Sena ti hir a natn avrmani kavuirv'a arna nadep' a Kenan kavtini al navap arna nadep' a Mahpila, la a Epraham iuli m'a nadep' asn Ivrun iv'i dui a Het ha; nut nen itauamu a Mamre kav'i utan a Epraham a ti apavtintin m'ertu aranan. 14Naran a ti a Susev' itin sarei a tetian, im'alet ml a Itsip m'er tv'aln m'er arm'ertu udlani la avsapei ti apavtin a tetian ha.

A Susev' iv'ana mhmah m'er tv'aln

15V'eti naran na ti artv'aln a Susev' avla ti a tetiar itam'a sarei, avvr ti a, “Nsarei a Susev' ipalep'la nakd katum'alet a si stu nvan ani tituei.” 16Laha, avtep'a v'nen iv'a asn a Susev' kavr ti a, “A tetiam ittu v'nen hua sarei a kam'em' kadam'a, kavr ti a, 17‘Kam'i pavvr an a Susev' kavvr ti a, “Nvrdaui, pamhmah a si stuar tv'alm m'a si avani iap'as, sena ti avan si stu anh.” ’ Hilaha nvmiman anh, pamhmah a si stuar arm'ertu na parian Atuan a tetiam.” Naran avvr si lera ani, a Susev' itakal.

18Artv'aln avrav'a kavm'la arna nahn kavvr ti a, “Palei, kam'em' hilaha nvv'i m'ertu na pariam.”

19V'eti a Susev' ivr anr kavr ti a, “Mavdedrn ki. ?Kvv'ah ti nlak a m'lnen a Mlin Eia? 20Kam'i kvv'ah ti pavutakm a kana, v'eti a Mlin Eia iani ima kav'i si p'as, sena ti ipamhmah a silv'ienar m'ertu ipanelnal, la avsilv' dika sena sei ittu sera hin ha. 21Sena si lera hilaha mavdedrn, kana p'ep'aur kam'i m'er armardelam'i.” Inap'i lera iv'ana mhmah m'er kani nlr ip'as.

M'ienen a Susev'

(Isrel 11:22)

22Hin a Susev' m'er arm'ertu na nmahan a tetian avlak arna nut a Itsip. Paian a Susev' itnelnal itv'amk pln inal (110). 23Hin a Susev' ilar a natn a Ivrem kalar a m'hip'n, kalar a natn a Mahir la iv'i a natn a Manasa ha, kataur arna tln.

24Hin a Susev' ivr anr tv'aln kavr ti a, “Kana p'am'a, v'eti a Mlin Eia ipama asnm'i kalev'la kam'i arna nadep' laha kauirv'a kam'i arna nadep' la ituran ani asn a Epraham, Aisak m'ei a Sikup ha.” 25#Avruh 13:19; Susua 24:32; Isrel 11:22.Laha, a Susev' iani ti a natn a Isrel avturan kavvr ti a, “A Mlin Eia ipama asnm'i kamhmah a kam'i pr. Naran lera, pavua suk dan atlaha (kavuirv'a a Kenan).” 26Hin a Susev' im'a naran paian inelnal iv'amk pln inal (110). Laha, avsiser p'akn kavtaui al pukis a Itsip.

Currently Selected:

Ap'u 50: nmb

Highlight

Copy

Compare