Ap'u 49
49
A Sikup iv'ana m'er a natn naran itv'i ti ipam'a
1Laha, a Sikup iv'ara anr a natn udlani kavr anr kavr ti a, “Pavp'lt udlani a nut ipamk a ti kana p'evrp'ep'a sei ipaier kam'i arna napn ipatauatah.
2Pavp'lt a nut ipamk kavv'rn, kam'i la kvv'i a natn a Sikup ha, kavv'rn a Isrel, nv'i a tetiam'i.
3Rup'en, nakm kv'i titiamu nar a natk, kv'i nut huak m'a pla nut hua nak. Kv'i dui p'as lil kinkin iamk, nut huam ip'as istudau. 4V'eti knep'a sera nauei irarev' ihua kutakm sei, nakm mkav'i dui lil, sena ti kv'a arna pasan a tetiam kam'atr m'ei a naun, kutakm a pasan a tetiam.
5A Simiun m'ei a Livai arv'i tiamk, hir arru arua taliar apartrp'n m'ertu ani. 6Arna v'ahienak nkap'lt m'er arna p'klr avtutuani, ha, a nlk nkasapar a nut avlakp'lt ani, sena ti naran nlr irer avrp dui iamk; naran avukl hir avtrus nihap'h a pluk. 7Nlep'la nl rerar sena ti ihua parndau, nlep'lei sena ti ihua ilil kutakm a m'ertu. Kana p'ani ti apavruh arna nutan a Sikup kavamkma arna nut a Isrel.
8Suta, tv'alm udlani apavpatah, nakm pauadar natavnar arm'ertu ahavlap'as anh, hir a natn a tetiam apavsisihpu asnm. 9#Nut Kaka 24:9; Rev 5:5.A Suta iv'i a net laiun; natk, khap'n sera sei kam'alet ml, irv'rv' sera hin ti katup'la hin. ?Hin ak ihua ti ipasp'alei? 10Hin a Suta ipaua napilaktan a mlin, kataui a p't nut na tln naran iliak, dav'a dav'a ipaier naran a Sailu ipama. Arm'ertu udlani apavlakp'lt ani asnn. 11Ilida net tuki m'a nahau na krep, nki inep'a ti ilap'as ani, kasila klusan al naui m'iel kasila heian al ui krep. 12M'aten ipam'iel sena naui m'iel, lun ipatva m'a m'ilik.
13A Sepulun ipalak asn nata; hin ipav'i nut nauak apavsran aka. Mak na utan ipaier nut a Saitun.
14A Isakar inep'a sera tuki sun ilil, im'atr a p't nut na naml na sivsiv. 15Naran ila ti nut irnren, hin irn ip'as ilil kala ti nadep' iv'i hin, iani van iv'a a nadep' a ti ipaua si dv kam'ahu a ti ipav'i dui na m'akarien.
16A Tan ipap'aurr arm'ertuan, ti apavnep'a v'anu uraur a Isrel. 17A Tan ipanep'a sera nmat a tv'eliel na navanel, ipav'i nmat stu hua, ipaha plh tl hus, a nut na ti ipasran m'alet a dui iuei. 18Kana ntrahah a ti pamhmah a kana, Mlin Lil.
19Arm'ertu avv'nv'nah apavrama ti apavrp a Kat, v'eti hin ipavav hin katp'av'r ipatauatah.
20Nadep'an Aser ipatu tim'ah p'as, ipalev' tim'ah p'as iviviln a mlin.
21A Navtali inep'a sera si dm iv'i tia ivrvr iulnp'la hin uaki naran ivrvr, kan v'nen ip'eset.
22A Susev' inep'a sera tlkar nai navan iak, iv'i rana nai navan iak asn nauei; ranan ivrvr eia kasiv' naml. 23Ardu na tenpaui avutakm ani kavluei kavlep'lei istudau. 24V'eti tenpauian iter ihua. Lm'an a Mlin Eia iv'i Atua huan a Sikup ien lm'an ihua. Atua nen ip'aur Isrel inep'a sera dui na sivsiv. 25Inep'a ti iv'i Atuan a tetiam, ipasr lm'am. Nut huan ilil, ipamhmah anh m'a mhmahien iendan eia, mhmahien iendan a nv' nadep', mhmahien na nunu m'a naten na mardel. 26Mhmahienan a tetiam isiv' udlen mhmahienar arm'ertarep'ak, ipaier si p'sp'as udlani arna ptha ikahiris naran. Apavrater arna ptn a Susev', arna nut eia na ptn a dui itupapr a tv'aln.
27A P'ensamin iv'i lip'ah didi la ispapr sei avv'i svsen ha. M'etav'aran ipahan sei ituada sarei, lihat ipasvsen sei avlav'i atah naur.”
28Ki udlani lera avv'i v'anu inal lman iruan a Isrel. Si lera a tetiar iv'ana m'er kamhmah anr. Imhmah anr udlani iviviln a mhmahienan.
29Sarei, itu v'nen hua anr, kavr anr kavr ti a, “Hilaha arna m'ien kana p'av'a ml kap'lt m'er m'ertuak. Pavtin kana m'er a tetiak al navap arna nadep'an Ivrun iv'i dui a Het, 30#Ap'u 23:3-20.al navap la iter arna nadep' a Mahpila ha, la itauamu a Mamre arna nadep' a Kenan ha, la Epraham iuli m'a nadep'an Ivrun iv'i dui a Het ha, ti ipav'i nkan, nut na ti apatintin m'ertu aranan. 31#Ap'u 25:9,10; Ap'u 35:29.Atlera iv'i nut avtin Epraham m'ei a Sera la iv'i a naun ha. Iv'i nut avtin Aisak m'ei a Ripeka iv'i a naun, kav'i nut kana ntin a Lia. 32Kana nulla nadep' m'a navap iter aranan asnr ardu avv'i m'ertu a Het.” 33#Parei 7:15.Naran hin a Sikup ittu sera v'nen hua anr a natn dui, katup'lten tln kasrani arna pas sarei ti silv'ienan ihiris, kadav'a kap'lt m'er arm'ertarep'an.
Currently Selected:
Ap'u 49: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
