Avruh 34

A Musis ilev' nav'et iru ml

(Tv'el V'nen Hua 10:1-5)

1Laha, a Mlin Eia ivr an a Musis, kavr ti a, “Patr nav'et aparru ml aparnep'a sarar arki artauamu. Laha, Kana p'ulul a v'nen aranar, ipav'i v'nen la iter aranar arki artauamu, la nakm krdapaprr ha. 2Laha, pandedp'h m'etav'aran, kadama eia arna ptha lil iv'i Sainai. Sarei, pap'tir asnk arna ual ptha lil. 3M'ertu kinkin ikasapah, amala m'ertu kinkin arna nut kinkin arna ptha lil. Mam'ahu a ti arsivsiv v'aha arpluk apavmima asn ptha lil kavud nina.” 4Sarei, a Musis itr nav'et arru arnep'a sarar arki, la itrr itauamu ha. Sarei, a Musis ithal ren kam'i arna ptha lil iv'i Sainai, inep'a nut a Mlin Eia itvr sarei ani inap'ei. Laha, iuar nav'et arru lahara al lm'an.

5Laha, a Mlin Eia ima auei al p'knaran kap'tir asnn atlera, kavrp'ep'a nahan a Mlin Eia. 6#Avruh 20:5,6; Nut Kaka 14:18; TVH 5:9,10; 7:9,10.Laha, a Mlin Eia imima asnn, kavrp'ep'a v'nen laha: “A Mlin Eia, a Mlin Atua, irn istu a m'ertu, kan si p'as a m'ertu, kauada nln ip'arei, kalini a si p'as m'a v'nen dau. 7Irn istu anr m'ertu avsiv' tausen dav'a, imhmah anr m'ertu arna si stu avani, naran ahavsapa v'nen huan, kavan si stuet. V'eti ikarn istu anr m'ertu la ahavviviln ha, v'eti iparp a tatei sena si stuan, ipaier a natn, kaier a m'hip'n, kaier a natn a m'hip'n, kaier a m'hip'n a m'hip'n.”

8Laha, a Musis irakn a ti ipaiaul kan ptn iv'a a nadep' kapatei a Mlin Eia. 9Laha, ivr ti a, “Ipavr ti pap'a kana, karn ip'as a kana, U Mlin Eia, a Mlin Atuak, ntu tamat anh, palak asnm'em', sena ti kam'em' udlani nvv'i pthua. Pamhmah a kam'em' arna si stuam'em', kauada kam'em' a ti p'vv'i nkam.”

10Laha, a Mlin Eia ivr ti a, “Palei, Kana p'en turanien ipamk. Arna nahr arm'ertuam udlani p'en sei apavtah ani ipastudau. Sei inap'i lera adamulelei arna nadep' ka, v'aha arna v'anu kinkin. Laha, arm'ertu udlani la klak asnr ha apavla parian a Mlin Eia, sena ti ipav'i si ipamk p'ani m'ah, m'ertu apavlei kavdedrn ani ipastudau.

A Mlin Eia iv'ana hua m'er, a ti amavpatei atua uraur

(Tv'el V'nen Hua 7:1-5)

11Pav'ahur mamh sei p'evr anh dika, palei, p'etp'av'r arm'ertu Amur, m'er arm'ertu a Kenan, m'er arm'ertu a Het, m'er arm'ertu a Peres, m'er arm'ertu a Hivai, m'er arm'ertu a Sepus. 12Pav'ahah, imahei ti, naran kaier nadep' la kv'el kadav'a asnn ha, pan turanien m'er arm'ertu avlak arna nadep' lera, kani ti ipav'i nam'et a p't nut na kam'i. 13#TVH 16:21.V'eti putakm a nev'etetar kalev'lar, kakaprr aitular la avp'tir al nadep' ha, katrpaprr aitul la avani a nai ha. 14Mapatei atua uraur kinkin, sena ti nahan a Mlin Eia iv'i P'ausus (sena ti iv'i Atua ip'ausus arm'ertuan). 15Pan si lera, imahei ti pan turanien m'er arm'ertu avlak arna nadep' lera, sarei apavnep'a sera tav'et na navanel m'er atuar, kavrpep'n si slm kavtau asn atuar, sarei ti ki iamk ipav'ara anh, laha pahan sei atvtrp'n sarei kavtau an atuar, 16sarei, palev' a natr tav'et sanar a natm dui, kani ti a natm dui apavnep'a tav'et na navanel m'er atuar.

17 # Avruh 20:4; Livai 19:4; TVH 5:8; 27:15. Mavan atua kinkin m'a kul sanam'i.

A Mlin Eia itu tim'ah lil itl a ti apavsapei nakl

(Avruh 23:14-19; Tv'el V'nen Hua 16:1-17)

18 # Avruh 12:14-20; Livai 23:6-8; Nut Kaka 28:16-25. Pan Tim'ah Lil na P'ret Iis Nen Ihei. Pahan p'ret iis nen ihei napn ipasaru, inep'a nut nvr anh inap'ei, arna nal nahan iv'i Apip, sena ti arna nal lera iv'i Apip kruh arna v'anu a Itsip.

19 # Avruh 13:2. Patau a netm'i titiamu udlani apavv'i nkan a Mlin Eia, la aviela naten na mardel ha. Patu titiamu na si slmam'i udlani, dui nen ipav'i nkan a Mlin Eia, ipavr ti iv'i pluk v'aha sivsiv. 20#Avruh 13:13.V'eti pulla net titiamu a tuki katu m'lnen ipav'i net sivsiv. V'eti ipavr ti kaarn ti pullei, pakapr natavnan ipam'a. Laha, pulla dui titiamu udlani. M'ertu kinkin ikahma arna nahk v'eti iaua si ki al lm'an.

21 # Avruh 20:9,10; 23:12; 31:15; 35:2; Livai 23:3; TVH 5:13,14. Pam'akar napn ipalm'sei, v'eti arna saru na napn parnrnh, naran na ti apalu sei m'a naran na ti apahl sei, parnrnh uam.

22 # Livai 23:15-21; Nut Kaka 28:26-31; Livai 23:39-43. Sarei, pan Tim'ah Lil na Napn Anar Uit, naran kuirma sei kalav'i itauamu la ktlaui al pitvet ha. Sarei, pan tim'ah iv'i Tim'ah Lil na Nmah Tvtv. Pani naran pai iamk ithiris.

23Arna pai ipamk nakl, ardu udlani a Isrel apavp'tir ipav'atl arna nahn a Mlin Eia, iv'i a Mlin Atua a Isrel. 24Sena ti Kana p'etp'av'r arm'ertu na v'anu udlani, kani ti dariam apavlil mau. Naran kv'el eia a ti pap'tir arna nahn a Mlin Eia ipav'atl arna pai iamk, m'ertu kinkin ikarn ti ipalev' nadep'am.

25 # Avruh 12:10. Mam'n di sei ktrp'n sarei katau asnk m'a p'ret iis nen ihei. Maln sei ktrp'n sarei katau asnk naran kan tim'ah lil iv'i Pasuva ipaier m'etav'aran.

26 # TVH 26:2; TVH 14:21. Palev' sei khli itauamu al pitvetam arna v'anuam kauirma al nmahan a Mlin Eia iv'i Atuam. Matahpa net nani m'a m'ilikan a unian.”

A Mlin Eia itu nav'et na v'nen hua an a Musis

27Laha, a Mlin Eia ivr an a Musis, kavr ti a, “Pulul a v'nen laha, sena ti avv'i v'nen avv'iv'en ti nten sera turanien iamk m'ah m'er arm'ertu a Isrel.” 28Sarei, ilak atlera m'ei a Mlin Eia napn inelv'a (40), ren m'a lihat, iahan p'ret kinkin, iam'n nauei kinkin. Laha, a Mlin Eia iulul a v'nen hua inal arna nav'et, avv'i v'nen na turanien.

29 # 2 Kurin 3:7-16. Laha, a Musis isasr arna ptha lil iv'i Sainai kauada nav'et na v'nen hua al lm'an. V'eti, naran isasr arna ptha, iarndu ti p'akn arna nahn inep'a ti iv'en inep'a neiel, naran a Mlin Eia iv'ana m'ei. 30Sarei, naran a Erun m'er arm'ertu udlani a Isrel avlei a Musis, avla ti p'akn arna nahn inep'a ti iv'en inep'a neiel, avdedrn a ti apavmima asnn. 31Laha, a Musis iv'ara anr, sarei, a Erun m'er armlinar arm'ertu udlani avm'alet asnn, laha, a Musis iv'ana m'er. 32Sarei, arm'ertu udlani a Isrel avmima asnn. Laha, iv'ana hua m'er, kavrp'ep'a si udlani a Mlin Eia itvr sarei ani arna ptha lil iv'i Sainai. 33Inap'i lera, a Musis itu kalik iamk a ti ipatavkar nahn naran iv'ana m'er, dav'a ti ihiris. 34V'eti naran iv'a eim a ti ipav'ana m'ei a Mlin Eia, ilev'la kalik lera, dav'a ti ima av'aran ml. Sarei, ima av'aran kav'ana m'er arm'ertu a Isrel ml, kavrp'ep'a si udlani a Mlin Eia ivr ani. 35Laha, arm'ertu a Isrel avla nahn a Musis, kavla ti p'akn arna nahn inep'a ti iv'en inep'a neiel. Laha, a Musis itu kalik a ti ipatavkar nahn ml, ier naran ti ipav'a kav'ana m'ei a Mlin Eia ml.

Currently Selected:

Avruh 34: nmb

Highlight

Copy

Compare