Avruh 35
35
Sei apavani arna Sapat
1Laha, a Musis iani ti arm'ertu udlani a Isrel avrama kavp'lt asnn, kavr anr, kavr ti a, “V'nen laha avv'i v'nen hua a Mlin Eia ittu sarei a nakd, a ti p'vani: 2#Avruh 20:8-11; 23:12; 31:15; 34:21; Livai 23:3; TVH 5:12-14.Pavm'akar napn ipalm'sei kavan pariam'i udlani, v'eti saru na napn ipav'i napnet asnm'i, kav'i Sapatan a Mlin Eia. Ipavr ti m'ertu ien pari kinkin aranan, aparpep'ni. 3Maviviv nap' kinkin arna nl nam'elam'i arna napn iv'i Sapat.”
Arm'ertu a Isrel apavuirma sei kavtau an Atua
(Avruh 25:1-9; 39:32-43)
4Laha, a Musis iv'ana m'er arm'ertu udlani a Isrel la avp'lt a nut iamk ha, kavr anr, kavr ti a, “Si laha iv'i sei a Mlin Eia iv'ana hua m'a nakd a ti p'evani. Ivr ti a, 5‘Kam'i pavuirma sei kavtau an a Mlin Eia. Ipavr ti nl m'ertu kinkin irni, ipauirma sei katau an a Mlin Eia. Ipauirma kul, v'aha silva, v'aha aian v'il, 6tret iplu, v'aha im'ielm't, v'aha im'iel, v'aha kalik p'as, v'aha nil nani, 7v'aha nila p'ak pua na sivsiv, avtu kala aranan a ti im'iel, v'aha nila p'ak sikau, v'aha nai nahan iv'i akeisa, 8v'aha ueil sena lait, v'aha ru nai kinkin m'in p'as iak a ti apan ueil a ti apatau arna p'ak m'ertu, v'aha sei aali, m'in ip'as, 9v'aha nav'et p'as nahan iv'i uniks, v'aha nav'et p'sp'as uraur a ti apataui arna klus nahan iv'i ivut, m'ei arna sat na v'nen hua.
Sei apavtaui al Nmah Kanuis na Tamatan Atua
(Avruh 39:32-43)
10Hin ak irndu mamh navanel a ti ipan sei asnm'i ipama kan si udlani a Mlin Eia itvrp'ep'a sarei a ti pavani. 11Apavan nmah kanuis na tamatan Atua, kavan nmah nen m'a sei itukari nakl, m'a rin na kul a ti apavuada kalik p'arei udlani, m'a nakal, m'a nai p'arei sena nakal, m'a nakal p'arei, m'a sei apadren nai a nln. 12Sarei ml, apavan pukiset na turanienan Atua, m'a nai aparmani m'ei, m'a napl na vtmien, m'a kalik p'as ipatukar nutet, 13kavan tiv' na nahn Atua, m'a nai aparmani m'ei, m'a si udlani apauadei a ti apam'akar m'ei, m'a p'ret na nahn Atua.
14Sarei, apavan lait aani a kul p'as, m'a si udlani auadei a ti apam'akar m'ei, m'a nap' nen (al dis papa), m'a ueil sanan. 15Apavan tiv' na sida p'as aali, m'a nai aparmani m'ei, m'a ueil la apavisani arna m'ertu ha, m'a sida p'as nen, m'a kalik p'arei ip'eset iv'i liu na nmah kanuis na tamatan Atua. 16Sarei ml, apavan tiv' na si slm aali katau an Atua, kavan si lahara apatu nap' a sei aranan, iv'i aian v'il kanep'a nit na tilau hara. Apavan nai aparmani m'ei, m'a si udlani auadei a ti apam'akar m'ei, m'a dis lil, m'a tlr nakl. 17Sarei ml, apavan kalik p'arei p'as sena nut m'ertu avp'tir nakl, m'a nakal nen, m'a sei apadren nai a nln, m'a kalik p'arei ipav'i liu na nut lera. 18Apavan nil a ti apavuada mamh nahau na nmah kanuis na tamatan Atua, m'a nki apavuada nakal la kalik p'arei ipalal aranan ha. Sarei, apavan nahau nen. 19Apavan klus m'ertu apavuei naran apavm'akar al nutet. Apavv'i klus p'sp'as sanan a Erun iv'i pris, kavv'i klusan a natn dui, a ti apavpatei Atua arna parei na pris.’ ”
Arm'ertu avuirma sei kavtau an Atua
20Laha, arm'ertu udlani la avp'lt asn a Musis ha avruh asn a Musis. 21Sarei, m'ertu kinkin iv'ahuri a nln, karn ip'as a ti ipani, iuirma sei a ti ipatau an a Mlin Eia, a ti parei a ti apavan nmah kanuis na tamatan Atua ipav'el, m'a sei apavan parei m'ei, m'a klus p'sp'as nakl. 22Laha, avrama, ardu m'er artav'et, nki la avrn ip'as a nlr a ti apavrama ha, kavuirma lulu, m'a hapir, m'a rin, m'a neiau ururaur. Inap'i lera, arm'ertu udlani avuirma sei iv'i kul kavtau an a Mlin Eia. 23Sarei, ipavr ti m'ertu kinkin iak a tret iplu v'aha im'ielm't v'aha im'iel, v'aha iak a kalik p'as v'aha nil nani, v'aha nila p'ak pua na sivsiv avtu kala aranan a ti im'iel, v'aha nila p'ak sikau, hin iuirma kataui.
24M'ertu iak a silva v'aha aian v'il, iuirma kataui a ti ipav'i nkan Atua. Ipavr ti m'ertu kinkin iak a nai nahan iv'i akeisa, a ti arm'ertu apavm'akar al nmah kanuis na tamatan Atua, iuirma kataui. 25Sarei, artav'et udlani la avrndu mamh ti apavv'et sei ha, avani, kavuirma kalik avani, iplu, kam'ielm't, kam'iel, iv'i kalik p'as. 26Sarei ml, artav'et la v'ahienar ip'as ha avm'akar kavv'et kalik m'a nil nani. 27Arm'ertu lilil nakl avuirma nav'et p'as nahan iv'i uniks, m'a nav'et p'sp'as uraur a ti apavtaui arna klus nahan iv'i ivut, m'ei arna sat na v'nen hua, 28kavuirma ru nai kinkin m'in p'as iak m'a ueil sena lait, m'a ueil apatau arna p'ak m'ertu, m'a sei aali, m'in ip'as. 29Laha, arm'ertu a Isrel avuirma sei a ti apavtau an a Mlin Eia, m'ertu kinkin iatp'r. Ardu m'a tav'et udlani la nlr irn ip'as ani ha avuirma sei sena parei udlani a Mlin Eia itvr sarei a ti apavani, la avua lm'an a Musis ha.
A Mlin Eia iv'ara an a Pesalil m'ei Ahuliap
(Avruh 31:1-11)
30Laha, a Musis ivr anr arm'ertu a Isrel, kavr ti a, “Palei, a Mlin Eia itv'ara sarei an a Pesalil, a natn a Uri, iv'i a natn a Ur, arna nl nam'elan a Suta, 31kani ti ilini a M'im'iln P'asan Atua, kattu v'ahien p'as ani, kani ti irndu sei istudau, kani ti irndu mamh ti ipam'akar kan sei istudau. 32Irndu ti ipan sei apala ti ip'eset nakl. Im'akar m'a kul, m'a silva, m'a aian v'il. 33Irndu ti ipatr mamh nav'et p'sp'as nakl, katu mamahr a ti apala ti avp'as. Irndu mamh ti ipatr nai ipap'as, kam'akar m'a sei istudau.
34A Mlin Eia ittu sarei a nln a ti ipav'iv'en sei a m'ertu. Tv'aln ipav'i Ahuliap, a natn Ahisamak, arna nl nam'elan a Tan. 35A Mlin Eia iten sarei a ti arrndu mamh navanel a ti aparan parei istudau, karulul a v'nen arna nav'et v'aha nai, karv'ahur mamh navanel a ti apan sei nakl, karrndu mamh ti aparan kalik p'arei p'as m'a tret iplu, v'aha im'ielm't, v'aha im'iel. Arm'akar ip'as m'a kalik p'as, karv'et sei ip'as. Inap'i lera, aparv'iv'en sei a m'ertu, a ti apavan parei udlani, kavv'ahur mamh navanel a ti apavan si p'sp'as nakl.
Currently Selected:
Avruh 35: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
