Avruh 33
33
A Mlin Eia ivr ti apavln nut a Sainai
1 #
Ap'u 12:7;
Ap'u 26:3;
Ap'u 28:13. Laha, a Mlin Eia ivr an a Musis, kavr ti a, “Pav'el kadav'a eia, nakm m'er arm'ertu la ktlev'la sarar arna v'anu a Itsip ha. Pav'a arna nadep' ntturan sarei ti a Epraham m'ei Aisak m'ei a Sikup apavlav'i, inep'a nut ntvr sarei inap'ei, kavr ti a, ‘P'etu nadep' laha an a natm udlani apavtauatah anh.’ 2Laha, p'etep'a Enselak ipatauamu anh, p'etp'av'r arm'ertu a Kenan, arm'ertu Amur, arm'ertu a Het, arm'ertu a Peres, arm'ertu a Hivai, m'er arm'ertu a Sepus. 3P'etau anh v'anu ipamk ipalini a m'ilik m'a ns sukapak. V'eti Kana nkav'el a p't nut na kam'i, sena ti kvv'i pthua, imahei ti p'erpep'n kam'i arna navanel.”
4Laha, naran arm'ertu avrn v'nen hua lera, avtakal, m'ertu kinkin iahs neiauan arna p'akn, 5sena ti a Mlin Eia itv'ana sarei m'ei a Musis, kavr ti a, “Pavr anr arm'ertu a Isrel, kavr ti a, ‘Kam'i kvv'i pthua, p'ama a p't nut na kam'i ipav'amk kutakm a kam'i kahiris a kam'i. Sena si lera, pavlev'la neiauam'i, a ti p'erndu v'ata p'ani a kam'i.’ ” 6Laha, arm'ertu a Isrel avlev'la neiauar asn ptha lil iv'i Hurep.
7Sarei, a Musis ilev' nmah kanuisan, kahli av'aran na nut arm'ertu avhl nmah kanuisar, arna nut v'iv'a au, katu nahan iv'i nmah kanuis na tamatan Atua. Laha, ipavr ti m'ertu kinkin itala an a Mlin Eia, iv'a au asn nmah kanuis na tamatan a Mlin Eia, la iter av'aran na nut avhl nmah kanuisar nakl. 8Laha, itu hin, naran a Musis iv'a au al nmah kanuis na tamatan Atua, arm'ertu udlani avp'tir. Ardu udlani avp'tir a karliu na nmah kanuisar, kavp'ei a Musis dav'a ti iv'a eim al nmah kanuis na tamatan Atua. 9Laha, itu hin, naran a Musis iv'a eim al nmah kanuis na tamatan Atua, nakal la iv'i p'knaran ha ima a nadep' kap'tir a karliu na nmah kanuis na tamatan Atua, laha, a Mlin Eia iv'ana m'ei a Musis. 10Arm'ertu udlani avla nakal la iv'i p'knaran ha naran ip'tir a karliu na nmah kanuis na tamatan Atua. Sarei, hir udlani avp'tir kavpatei. Ardu udlani p'sev' avp'tir a karliu na nmah kanuisar. 11Inap'i lera, a Mlin Eia iv'ana m'ei a Musis arna nahn, inep'a nut dui iamk iv'ana m'a tv'aln inap'ei. Sarei, a Musis im'alet nakl arna nut arm'ertu avhl nmah kanuisar nakl, v'eti dui na m'akarienan, iv'i a Susua, a natn a Nun, iv'i malakal iamk, iaruh asn nmah kanuis na tamatan Atua.
12Laha, a Musis iv'ana m'ei a Mlin Eia, kavr ti a, “Palei, Nakm kvr a kana, kavr ti a, ‘Pav'av'ar arm'ertu laha.’ V'eti kdavr a kana hin ak patap'ei a ti ipalak m'a kana. V'eti ktvr sarei a kana, kavr ti a, ‘Nrndauh, nrndu naham, nakm kv'i m'ertu np'ei karn ip'as ani.’ 13Hilaha, ipavr ti nv'i m'ertu kp'ei karn ip'as ani, pav'iv'en v'ahienam a kana, a ti p'erndu ti hin iv'i m'ertu kp'ei karn ip'as ani. Pav'ahur ti arm'ertu laha avv'i m'ertuam.” 14Laha, a Mlin Eia ivr ani, kavr ti a, “P'elak asnm naran kv'el, p'ani ti palak arna tamat.” 15Sarei, a Musis ivr an a Mlin Eia, kavr ti a, “Ipavr ti mkalak asnm'em', malev'la kam'em' arna nut laha. 16?Ipavr ti kalak asnm'em' naran nvv'el, m'ertu apavrndu ti kam'em' nvv'i m'ertu kp'ar nakl, karn ip'as anr inap'i? Ipavr ti inap'i lera, kana m'er m'ertuam p'vlak sisiaur. P'vv'i m'rau asnr arm'ertu udlani arna nadep' ka.”
17Laha, a Mlin Eia ivr an a Musis, kavr ti a, “P'en sei kvri, sena ti hilaha np'ah karn ip'as anh, nrndauh, karndu naham.” 18Sarei, a Musis ivr ti a, “Pav'iv'en si p'sp'asam a kana, nmiman anh ihua.” 19#Rum 9:15.Laha, ivr ani, kavr ti a, “P'ani ti si p'sp'asak ipamima asnm, kavrp'ep'a nahan a Mlin Eia asnm. P'emhmah a m'ertu nrn ti p'emhmah ani, p'ern istu a m'ertu nrn ti p'ern istu ani.” 20V'eti ivr ti a, “Mkala nahk, sena ti m'ertu kinkin ikala Kana kasilv'.” 21Sarei, a Mlin Eia ivr ti a, “Nut laha iv'i nut iamk imima asnk, pap'tir arna nav'et. 22Laha, ipatu hin, naran si p'sp'asak ipamima asnm, p'etauh al nut kal na nav'et, sarei katukarh m'a lm'ak naran nsiv'h. 23Sarei, p'elev'la lm'ak, pala duk, v'eti mkala nahk.”
Currently Selected:
Avruh 33: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
