Roma 2

1Mumu uyii wangali kigwalilo, Mundu, wenga ayi yoha upaula: pakuya umu upaulila yungi, wipisa wamwene mbifu; pakuya fifilafila ufikiteye wenga wakupaula. 2Leka timanya kukita lipaulo lyake Mulungu liyii kwa ndingo wa fya chakaka pa wala wakiteye fya ntundu uwu. 3Ni uwalanga, ati, wenga wakuwapaula awa wakiteye fya ntundu uwu, ni ufikita fifilafila wamwene, kukita yaukimbile ngani pa lipaulo lyake Mulungu? 4Pangi uhepa ukafi wa kuniamba mwoyo kwake ni kwisinga ni uwololo, wangali kumanya kukita kuniamba kwake Mulungu kukutola mpaka pa kupela? 5Leka kwa ndingo wa unonono wako nu mwoyo wangapela wiwikila kwa wamwene kikokoli kya kudada pa ligono lya kudada ni kulifunukula lipaulo lya ugolofu wake Mulungu; 6uyu yalipalile ngani mundu ayi yoha kwa ndingo wa makitiko gake: 7kwa wala wawa pa kwisinga ni kukita kunofu walondalonda kukwisika ni liginiko ni kwangali kuwola, kulama kwa miaka: 8leka kwa wala wawa watumbulana na wayufwana lepa fya chakaka, 9koma wayufwana uwifu, kudada ni kuwina mwoyo, lihumbuso ni kufinyikisika, pa wumi wa mundu ayi yoha yuahengela fiwifu, wa mYehudi pakutumbula, na kawili wa mGriki; 10leka kukwisika ni liginiko ni kindamba kwa mundu ayi yoha yuahengela finofu, kwa mYehudi pakutumbula, ni kawili kwa mGriki: 11pakuya pawaka kuhagula fyene kwa Mulungu. 12Pakuya wayii woha wala wakiti sambi pangali torah yawatagike pangali torah: ni wayi woha wala wakiti sambi pasi pa torah yawapaulike ni torah; 13ndawa nakuya wala wayufwana torah yawaye wagolofu pa chengo kya Mulungu, koma wala wakuyikita torah yawagoloseke: 14pakuya apa wa Mihuku wala wangali torah wafikita pa matamilo findu fya torah, wawa, pakuya wangali torah, wayitola torah kwa wene, 15ndawa walasa lihengo lya torah lilembiki pa mioyo yawe, chengo kya pa mioyo yawe kilasile ulungamakiso pamonga nawo, ni maholo gawe limonga ni liyini kisimalakasile pangi kikamulile kigwalilo; 16pa ligono lila Mulungu yapaule fyakufihika fya wandu, kwa ndingo wa evangel yangu, pa Yesu Kristo.

17Koma wona wenga wikemela mYehudi, ni kuyegamila torah, 18ni kwilumba pa Mulungu, ni umanya kilondo kyake, ni ulinganisa fila fiyii fyakulutila, pa kwigilasiwa kipitile pa torah, 19ni uhuwalila kukita wamwene uyii wakuwalongosa wala wakukoyoka miho, lulangalila kwa wala pa lwisi, 20wakuwayambulisa wahimu, wakuwayigalisa wakeke, pakutama pa torah ni ntundu wa kumanya kwene ni fya chakaka fyene; 21mumu wenga wakunjigalisa yungi, wiyigalisa lepa wa mwene? 22wenga wakuwandisa Usiyiwa, uyiwa? wenga wakujowa Usikita ukeme, ukita ukeme? wenga wakuwipila fifwilifwili, upuma pa mahekalu? 23wenga wilumba pa torah, pa kwipatukila torah untolelela Mulungu lihamu? 24Pakuya lihina lya Mulungu likitika blasfemia pagati pa Mihuku ndawa ya mwenga, umu yilembekili. 25Pakuya kusilimuka kutipatila kandu, wona ukiteye torah: leka wona uyii wakwipatukila torah, kusilimuka kwako kukitiki kwangali kusilimuka. 26Mumu wona kwangali kusilimuka kulindalili mimbi sya torah, si kwangali kusilimuka kwake yakuwalangike kwa kusilimuka? 27ni kwangali kusilimuka kula, kwa matamilo, wona kumalakisa torah, si yakupaule wenga wakwipatukila torah, uyii ni lilembo ni kusilimuka? 28Pakuya nakuya mYehudi ayii, wakulasika pa kwelu; haka kusilimuka kula kwakulasika pa kwelu pa nyama: 29koma mYehudi ayii yula wa mgati; ni kusilimuka kuyii kwa pa mwoyo, pa roho, nukuya pa lilembo; kulumba kwake nukuya kipitile pa wandu, koma pa Mulungu.

Currently Selected:

Roma 2: MGS1937

Highlight

Copy