Roma 1

1Paolo, mbanda wa Yesu Kristo, wakukemeleka apostolo, 2wakupatuliwa kwa evangel ya Mulungu, yila akalagini palongolo pa wakulweta wake, pa malembo mawalafu, 3ya Mwana mundu, uyu akahogoliki wa mbeyu ya Daudi kwa ndingo wa nyama, 4nayombe akapatuliwi Mwana wa Mulungu ni mbafu, kwa ndingo wa roho ya uwalafu, pa kusyuka kwa wakufwa; 5yuyu Yesu Kristo Bambo witu, pa yula tikayupiti neema nu uapostolo, kwa kuyufwanila kiyitakiso pa mihuku yoha, ndawa ya lihina lyake: 6pa wala mwenga namu muyii wakukemeleka wake Yesu Kristo: 7kwa woha wala wayii pa Roma, wakuganika nu Mulungu, wakukemeleka wawalafu: Neema kwinu ni kindamba kuhuma pa Mulungu Dadi witu nu Bambo Yesu Kristo.

8Pakutumbula ninsengusa Mulungu wangu pa Yesu Kristo ndawa ya mwenga mwawoha, kukita kiyitakiso kinu kiwandasiki poha poha pa ndima woha. 9Pakuya Mulungu ayii ndungumakiso wangu, yula nimhengela pa roho wangu pa evangel ya Mwana mundu, umu nenga nukukotoka lepa kuluwula mwenga, magono goha pa maluwo gangu kiluwile, 10pangi hino kwali yanipatile mwanja unofu kuhicha kwinu pa kilondo kyake Mulungu. 11Pakuya nigana muni kuwawona mwenga, nausi niwapele kiyetulo kya neema kya kiroho, nausi mutamasike; 12kila kukita nenga pamonga na mwenga ninyamasike pa mwenga, ayi yoha pa kiyitakiso kya njini, kya mwenga ni kya nenga. 13Leka nilonda lepa muye wangali kumanya, walongo, kukita kawili kawili nikapangiti luhala kuhicha kwinu (ni nikasiliwasiki mpaka hino), nausi niye ni kipambiko kingi pa mwenga kawili, ngati pa Mihuku wangi kawili. 14Niyii ni nsigilo kwa waGriki ni kwa Wakuweweta kawili, kwa wene malango ni kwa wangali malango kawili. 15Mumu, umu nihotolela, niyii tayari kuwandisa evangel kwa mwenga kawili muyii pa Roma. 16Pakuya niwona lihamu lepa pa evangel: ndawa yiyii makakala ga Mulungu kwa kuyokola ayi yoha yuakela kikelile; kwa mYehudi pakutumbula, ni kwa mGriki kawili. 17Ndawa ya yila ugolofu wake Mulungu ufunukulika pa kiyitakiso mpaka kiyitakiso: umu yilembikili, Leka wagolofu yawalame pa kiyitakiso.

18Ndawa kudada kwake Mulungu kufunukulika kuhumila kunani pa unya mitafu yoha ni uwifu wa wandu, wala wasiwilisika fya chakaka pa uwifu; 19ndawa kila kimanyike pa Mulungu kilasika pa wombe; pakuya Mulungu akakilasiti kwawe. 20Pakuya fila fyangawoneka fya yombe kitumbulile kuupanga ndima fiwonakili ngani, kuholakaseka pa fila fyapangiki, sisi mbafu syake sya miaka yoha ni umlungu wake; kukita waye wangali ni kigwalilo: 21ndawa wombe, kummanya Mulungu, wankwisiti lepa ngati Mulungu, wansengwisi lepa; koma wakitiki mfuki wa waka pa maholo gawe, ni mwoyo wawe wangali malango ukalekaliki lwisi. 22Pa kwiwalanga wene malango, 23wakitiki wahimu, ni wang’anamwili kukwisika kwake Mulungu wangawola kuya kihwanakiso kya kifwilifwili kya mundu wakuwola, ni kya fidege, ni kya nyama sya magulu ncheche, ni kya fyakukwawa.

24Mumu Mulungu akawafumbukisi pa manyonyelo ga pa mioyo yawe pa uwafu, kukita miwili yawe yiwe yangaginikika na wayawe: 25nawombe wafing’anamusa fya chakaka fya Mulungu kwa mageya, ni wakagwilikimbo ni kutumakila kapangiko kulutila Wakukapanga, uyu ayii wakupelewa kihomo miaka ni miaka. Amen.

26Kwa ndawa iyi Mulungu akawafumbukisi pa manyonyelo mawifu: pakuya wadala wawe wakang’anamwisi kutumila kwa matamilo gawe kwa kupindika mawikiko: 27na kawili wiwi, wagosi, kuleka kutumila kwa matamilo ga ndala, wakosanilaga pa manyonyelo yungi kwa njini, ngosi pa ngosi kukitila uwafu, ni kuyupa mugati mwawe njombe ya mahoko gawe yila yikawalinganili.

28Ni umu wakabeliti kuya nako Mulungu pa kumanya, Mulungu akawafumbukisi pa mwoyo uwifu, kukita fila fyanganogela; 29wakumema ni uwifu woha, usokosi, lunyonyelo, kuwipa, wakumema nu kuwina mwoyo, kusyangala, kutumbulana, kukonga, kwiwipisa mikuwu; wakupwepwelela, 30wa luhehu, wakuwipalika nu Mulungu, wa mihenje, wa kinywinda, wa kwihikalila, wakupanga malango mawifu, 31wangali kuwayufwana wakuhogola wawe, nukuya na malango, wakukidumula kilago, wangali kuholalela, wangali lukolo: 32wala nawombe wakumanyila ngani lipaulo lyake Mulungu, kukita wala wakitaga fya ntundu uwu walinganila kufwa, wafikita lepa ifi waka, koma wayitisingana kawili na wala wafikitaga.

Currently Selected:

Roma 1: MGS1937

Highlight

Copy