Roma 3

1Mumu kiki kyakulutila kya mYehudi? pangi kiki kyakulinganila kyake kusilimuka? 2Kya mahele kwa ndingo uyi woha: pa kutumbula ndawa wakakamulasiki ni malowe ga kuhyetu ga Mulungu. 3Pakuya kiki wona wangi wakayili wangali kiyitakiso? kwangali kiyitakiso kwawe yakuwuse kiyitakiso kya Mulungu ati? 4Kisiya wila; ena, Mulungu aye wa chakaka, leka mundu ayi yoha wa mageya; umu yilembekili,

Nausi upisike wakugoloka pa malowe gako,

Ni uhotole pa kupaulika kwako.

5Koma wona uwifu witu uyimasika ugolofu wake Mulungu, yatijowe kiki? Wila Mulungu ayii wangali kugoloka uyu alolalela ni kudada? (Nilongela kwa ndingo wa wandu.) 6Kisiya wila: pakuya wona wiwi Mulungu yaupaule ndima wuli? 7Leka wona fya chakaka fyake Mulungu kwa kudeta kwangu fikafulusiki kwa kukwisika kwake, kwa kiki nipaulika ngati mwene sambi mpaka hino? 8Ni ndawa kiki tijowa lepa (umu watikupikisila, na umu wangi wakangamasa kukita tijowa), Tikite fiwifu, nausi finofu fihiche? wala wapisika mhalo pa kugoloka.

9Kiki mumu? tilekiki munyuma? Lepa, napachokope: pakuya tikawapili mhalo palongolo waYehudi na kawili waGriki, kukita woha awa wayii pasi pa sambi; 10umu yilembekili,

Pangali wakugoloka, haka yumonga;

11Pangali mundu uyu awalalila,

Pangali uyu andondandonda Mulungu;

12Woha wapatwiki, woha pamonga wangali kulinganila;

Pangali uyu akita kinofu, haka yumonga:

13Nkolomelo wawe uyii manyinja gadinduliki;

Ni nimi syawe wakongisi:

Sumu ya mamoma yiyii pasi pa milomo yawe:

14Ndomo wawe umemiti ni kulapalakisa ni kuwawa:

15Magulu gawe gayumbatika kwa kuyitisa mwasi:

16Kuyanangika ni kuhumbusika kuyii pa ndila syawe:

17Ni ndila ya kindamba wayimanyiti lepa:

18Pa waka woga wa Mulungu palongolo pa miho gawe.

19Leka timanye kukita fiyi fyoha yafijowa torah, yilongela na wala wayii pasi pa torah; kukita pa ndomo payi poha padindike, nu ndima woha upelewe mhalo nu Mulungu: 20pakuya kipitile pa makitiko ga torah nyama iyi yoha yayiye yangagoloseka pa miho gake: ndawa pa torah kuyii kuyimanyila ngani sambi. 21Koma hino pangali torah kugoloka kwake Mulungu kulasiki, kulungamakika ni torah ni wakulweta; 22kuku kugoloka kwake Mulungu kipitile pa kiyitakiso pa Yesu Kristo kwa woha wakukela; pakuya pawaka kyakulekana; 23ndawa woha wakiti sambi, ni walemwiki pa kukwisika kwake Mulungu; 24kugoloseka waka ni neema yake kipitile pa kukombola kula kuyii pa Kristo Yesu: 25yula Mulungu akambikiti chakupepesa kipitile pa kiyitakiso, pa mwasi wake, kulasa ugolofu wake, ndawa ya kulekelekesa sambi sikakitiki mwandi, pa kwisinga kwake Mulungu; 26kwa kulasa ugolofu wake pa lukumbi lwa hino; nausi aye wakugoloka mwene, ni wakugolosa yula ayii ni kiyitakiso pa Yesu. 27Mumu kuyii kuliku kwilumba? Kudindisiki. Kwa torah wuli? ya makitiko? Lepa, koma kwa torah ya kiyitakiso. 28Mumu tiwalanga kukita mundu agoloseka ni kiyitakiso, pangali makitiko ga torah. 29Pangi Mulungu ayii Mulungu wa waYehudi wakape? si Mulungu wa Mihuku kawili? Ena, wa Mihuku kawili: wona Mulungu ayii yumonga, 30ni yawagolose wakusilimuka kipitile pa kiyitakiso, ni kwangali kusilimuka pa kiyitakiso. 31Mumu wila tiyiwusa ngani torah ni kiyitakiso ati? Kisiya wila: koma tiyiyimisa torah.

Currently Selected:

Roma 3: MGS1937

Highlight

Copy