Mafunukuliko 6
6
1Ni nikaweni pala Mwana ling’osi akadindwili kyakukomelela kimonga kya fila saba, ni nikayufwini njowelo ya kyakulama kimonga kya fila ncheche, ni kajoweko ngati mbamba ya kuwuluma, Yicha. 2Ni nikaweni, ni lola, farasi yiwalafu, nu uyu wakutama panani pake akayili ni upindi; ni kikupiku kikapelakiki kwake: ni akapititi wakuhotola ni kwa kuhotola.
3Na pala akakidindwili kyakukomelela kya kawili, nikayufwini kya kulama kya kawili ni kijowa, Yicha. 4Ni ikapititi farasi yingi, yikele: ni kwa uyu wakutama panani pake kukapelakiki kuyupa kindamba pa ndima, ni nausi wakomane yungi nu njini: ni ukapelakiki kwa yombe upanga ukulungu.
5Na pala akakidindwili kyakukomelela kya kadatu, nikayufwini kya kulama kya kadatu ni kijowa, Yicha. Ni nikaweni, na lola, farasi yipili; nu uyu wakutama panani pake akayili ni kipimo pa kiwoko kyake. 6Ni nikayufwini ngati njowelo pagati pa fyakulama ncheche iyi yijowa, Kiheneko kya ngano kwa denario yimonga, ni fiheneko fidatu fya shairi kwa denario yimonga; ni ukotoke kuyananga mafuta nu mvinyo.
7Na pala akakidindwili kyakukomelela kya ncheche, nikayufwini njowelo ya kyakulama ncheche ni kijowa, Yicha. 8Ni nikaweni, ni lola, farasi yitotolo: nu uyu wakutama panani pake, lihina lyake Kifwa; ni Pandu pa mahoka pakankisiti yombe. Ni kikapelakiki kwa wombe chengo pa lilundu lya pa ncheche lya ndima, kukoma nu upanga, ni pa njala, ni pa kufwa, ni pa kimpetupetu, ni pa filugu fya ndima.
9Na pala akidundwili kyakukomelela kya mhano, nikaweni pasi pa mathbahu mawumi ga wala wakakomiki kwa ndawa ya lilowe lyake Mulungu, ni kwa ndawa ya ulungamakiso uwu wakayili nawo: 10ni wakakuwiti ni njowelo ngulungu, kujowa, Mpaka ndali, Bambo, mbalafu ni wa chakaka chakaka, upaula lepa ni kulipilisa mwasi witu pa wala wakuhwela pa ndima? 11Ni ukapelakiki kwa ayi yoha wa wombe, mwingila uwalafu; ni kukajowiki kwa wombe kukita ngawapumulili kawili huti, mpaka apa wawanda wayawe na walongo wawe, wala yawakomeke ngati wombe, kawili wafwilanasike.
12Ni nikaweni pala akakidindwili kyakukomelela kya sita, ni kikayili kinyukunyuku kikulungu; ni lijuwa likapatiti kuya lipili ngati likong’onda lya lwagi, ni mwesi wa mfilimila ukakitiki ngati mwasi; 13ni ndondo sya kunani sikagwili mu ndima, umu nkuyu upuluputikila mbiki syake, wakudigisika ni mbepo ngulungu. 14Ni kunani kukapatukini ngati kitabu pa kuniengeka; ni kidunda kiyi kyoha ni kilumba kikawusiki kipitile pandu pawe. 15Ni watwa wa ndima, ni wakupelewa chengo, ni wakulungu wa maelfu, ni wakafi, ni wa makakala, ni mbanda ni nkamba ayi yoha, wakwifihiti pa makolo ni pa maganga ga pa fidunda; 16ni wafijowela fidunda na maganga, Mugwe panani pa tenga ni kutifiha pa kyene kya uyu wakutama pasi pa kitihu kya kiutwa, ni pa kudada kwake Mwana ling’osi: 17pakuya lifikili ligono likulungu lya kudada kwawe; nu nani ahotola kuyimasika ngani?
Currently Selected:
Mafunukuliko 6: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
