Mafunukuliko 5
5
1Ni nikaweni pa kiwoko kya kigosi kya uyu wakutama pasi pa kitihu kya kiutwa kitabu kyakulembeka kugati ni kunyuma, kyakukomaleka ni fiwalalilo saba. 2Ni nikaweni malaika wa makakala ayii mu kuwandisa ni njowelo ngulungu, Nani wakulinganila kukidindula kitabu, ni kufiwopola fila fikikomalela? 3Ni pawaka mundu akahotwili, haka kunani, haka muni mu ndima, kukidindula kitabu, haka kukilolalela. 4Nu nenga nikahulwisi masoli muni, pakukita pa waka mundu akakolaliki wakulinganila kukidindula kitabu, haka kukilolalela mumu: 5nu yumonga wa wakuluwakulu anijowela, Usihulusa masoli: lola, Lihimba kipitile pa ntangilo wa Yuda, Ndela wa Daudi, akahotwili, kukidindula kitabu ni fyakukomalela fyake saba. 6Ni nikaweni pagati pa kitihu ni pa fyakulama ncheche, ni pagati pa wakuluwakulu, Mwana ling’osi wakwiyimika, ngati wakukomeka, wakuya na manyelo saba, ni miho saba, aga gayii Roho saba sya Mulungu, sipelakiki kiyingalile pa ndima woha. 7Ni akachiti, ni akayupiti pa kiwoko kya kigosi kya uyu wakutama pasi pa kitihu kya kiutwa. 8Ni pala akakiyupiti kitabu, fyakulama ncheche ni wakuluwakulu makumi gawili ni ncheche wakagwili palongolo pa Mwana ling’osi, ayi yoha wakuya nu mhawala, ni kisayi kya zahabu kyakumema ni lubani, sila siyii sala sya wawalafu. 9Ni wayimba nyimbo ya hino, kujowa, Uyii wakulinganila kukiyupa kitabu, ni kufidindula fyakukomalela fyake: pakukita ukakomiki, ni ukamhemalili Mulungu nu mwasi wako kuhapula pa ntangilo uyi woha wa wandu, nu lumilo, 10nu mhuku, ni ukawakiti wombe kwa Mulungu witu utwa ni makasisi; ni yawaye watwa bahalapala pa ndima. 11Ni nikaweni, ni nikayufwini njowelo ya wakamalaika wingi kisyungutile pa kitihu ni fyakulama ni wakuluwakulu; ni mawalangiko gawe gakayili maelfu kumi marra maelfu kumi, ni maelfu ga maelfu; 12kujowa ni njowelo ngulungu, Wakulinganila Mwana ling’osi uyu akakomiki kwiyupa mbafu, ni fyuma, nu luhala, ni makakala, ni liginiko, ni kukwisika, ni kihomo. 13Ni kapangiko kayi koha aka kayii kunani, na pa ndima, na pasi pa ndima, na ifi fiyii pa nyanja, ni fyoha fiyii mumu, nikayufwini ni fijowa, Kwa uyu wakutama pasi pa kitihu kya kiutwa, ni kwa Mwana ling’osi, kihomo, ni liginiko, ni kukwisika, ni chengo, kuye kwa miaka ni miaka. 14Ni fyakulama ncheche fikajowiti, Amen. Ni wakuluwakulu makumi gawili ni ncheche wakagwili pasi ni kugwilakimbo.
Currently Selected:
Mafunukuliko 5: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
