Mafunukuliko 17
17
1Ni akachiti yumonga wa wakamalaika saba wala wakayili ni fisayi saba, ni akalongili nu nenga, kujowa, Yicha kuni, yanikulase lipaulo lya wa fiyaka yula nkulungu, uyu atama pa machi mingi; 2uyu watwa wa ndima wakakiti fiyaka pamonga nako, na wala wakuhwela pa ndima wakagalasiki kinywelile mvinyo wa fiyaka fyake. 3Ni akanitoliti pa roho mpaka pa lipululu; ni nikambweni ndala wakutama pa kilugu kikele, wakumema mahina ga blasfemia, wakuya ni mitu saba ni manyelo kumi. 4Nu ndala akayili wakufwatakiwa ni pofulo ni kikele, pamonga ni zahabu ni maganga ga uhemesi ni lulu, wakuya ni ntimbo wa zahabu pa kiwoko kyake kimemasile fya wafu ni fya usokosi fya fiyaka fyake, 5ni pa kiwungi kyake lihina lilembiki, kya kuhyetu, babel ukulungu, nyongolo wa wa fiyaka ni wa fya usokosi fya ndima. 6Ni nikambweni ndala wakugala ni mwasi wa wawalafu, ni mwasi wa walungamakiso wa Yesu. Ni apa nikambweni, nikakangichi ni kukangacha kukulungu. 7Ni malaika akajowiti kwa nenga, kwa kiki ukakangichi? Nenga yanikutawile kya kuhyetu kya ndala uyu, ni kya kilugu kila kintwika yombe, kyakuya ni mitu saba ni manyelo kumi. 8Kilugu kila ukakiweni kikayili, ni kiyilepe; ni kiyii papipi kukwela kipitile pa china, ni kubita kiyingalile pa kutagika. Na wala wakuhwela pa ndima yawakangache, wala lihina lyawe nakulembeka pa kitabu kya kulama kitumbulile pakuwikika ndima, pala wakiwona kilugu, kukita kikayili baho, ni kiyilepe, ni yakiye panyuma. 9Apa gayii maholo gakuya nu luhala. Mitu yila saba yiyii fidunda saba, pala ndala yula atama: 10na watwa saba wayii; mhano wala wagwili, yumonga ayii baho, yungi akona nakuhicha; ni apa yahiche, nakuleka kuhwela yombe pachokope. 11Ni kilugu kila kikayili ni kiyilepe, kyene kyake kawili kiyii kya nane, ni kiyii kya saba wala; ni kibita kiyingalile pa kutagika. 12Ni manyelo gala kumi, aga ukagaweni gayii watwa kumi, wala nawombe wakona nakuyupa utwa; koma wayupa chengo kya watwa, kwa saa yimonga, pamonga ni kilugu kila. 13Awa wayii ni maholo gamonga, ni wapeleka kwa kilugu mbafu syawe ni chengo kyawe. 14Awa yawakite ngondo ni Mwana ling’osi, ni Mwana ling’osi yawahotole, pakuya Bambo wa mabambo, ni Mutwa wa watwa; nuwombe kawili wayii pamonga nuyombe, wakukemaleka ni wakuhagulika ni wakukeleka. 15Ni anijowela, Machi aga ukagaweni, pala wa fiyaka atama, gayii misafi, ni mapuga, ni mihuku, ni njowelo. 16Ni manyelo kumi gala ukagaweni, ni kilugu, yawambipile wafiyaka yula, ni yawankite wangali wandu ni ukengele, ni yawalye nyama yake, ni yawantinyise nu mwoto. 17Pakuya Mulungu akapeliki mu mioyo yawe kukita maholo gake, ni kufika mpaka pa maholo gamonga, ni kupeleka utwa wawe kwa kilugu, mpaka malowe ga Mulungu yagamalakasike. 18Nu ndala uyu umbweni ayii likaya likulungu, ili liyii ni utwa panani pa watwa wa ndima.
Currently Selected:
Mafunukuliko 17: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
