Mafunukuliko 14
14
1Ni nikaweni, na lola, Mwana ling’osi ni ayima pa kidunda Sion, ni pamonga nu yombe wakuya ni lihina lyake, ni lihina lya Dadi mundu, lilembiki bahalapala pa fiwungi fyawe, elfu mia ni makumi ncheche ni ncheche. 2Ni nikayufwini njowelo kipitile kunani, ngati njowelo ya machi mingi, ni ngati njowelo ya mbamba ya kuwuluma ngulungu: ni njowelo iyi nikayiyufwini ngati ya wene kukuwa mihawala ni wakuwa mihawala yawe: 3ni wayimbili ngati nyimbo ya hino palongolo pa kitihu kya kiutwa, ni palongolo pa fyakulama ncheche, ni wakuluwakulu: ni pawaka mundu akahotwili kwiwula nyimbo yila lema elfu mia ni makumi ncheche ni ncheche, awa wahemaliki kihumile pa ndima uwu. 4Awa wawa wakalekaliki lepe uwafu na wadala; pakuya wayii mabikira. Awa wawa wankisa Mwana ling’osi kuyi kwoha uku abita. Awa wakahemaliki kihumile pa wandu, fipambiko fya kutumbula kwa Mulungu ni kwa Mwana ling’osi. 5Ni pa ndomo pawe nakukoleleka mageya: wayii wa nyelelele.
6Ni nikaweni malaika yungi ni awuluka pagati pa nyingalila, wakuya ni evangel ya miaka ni miaka kuwandisa kwa wala wakuhwela pa ndima, ni kwa mhuku uyi woha ni ntangilo ni njowelo nu nsafi: 7ni ajowa ni njowelo ngulungu, Munjogope Mulungu, ni mumpele kukwisika; pakukita saa ya kupaula yifiki: ni mungwilekimbo uyu akapangiti kunani nu ndima ni nyanja ni pa kulapukila pa machi.
8Nu yungi, malaika wakawili, akakisiti, wakujowa, Ugwili, ugwili Babel uwu ukulungu, uwu uwanyweseye mihuku yoha mvinyo wa makeko ga fiyaka fyake.
9Ni malaika yungi, wakadatu, akakisiti, wakujowa ni njowelo ngulungu, Wona mundu akigwilakimbo kilugu ni kifwilifwili kyake, ni ayupa kiwalalilo pa kiwungi kyake, pangi pa kiwoko kyake, 10nuyombe kawili yaanywe pala mvinyo wa makeko gake Mulungu, utendekasiki pangali kuhasangana na kandu pa ntimbo wa kudada kwake; ni yang’ahike nu mwoto ni kiberiti palongolo pa wakamalaika wawalafu, ni palongolo pa Mwana ling’osi: 11ni lyosi lya lihumbuso lyawe likwela kwa miaka ni maika; ni wapumulila lepa musi ni kilo, wala wakugwilakimbo kilugu ni kifwilifwili kyake, ni ayi yoha uyu ayupa kiwalalilo kya lihina lyake. 12Apa luyumalakilo lwa wawalafu luyii, kukita wagoha mimbi sya Mulungu, ni kiyitakiso kya Yesu.
13Ni nikayufwini njowelo kipitile kunani kujowa, Ulembe, Wakusengwa wafwili wala wafwa pa Bambo kitumbulile hino: ena, ajowa Roho, nausi wapumulile pa mahengo gawe gakutondesa; pakukita makitiko gawe gakisana nuwombe.
14Ni nikaweni, na lola, lifundi liwalafu; ni panani pa lifundi yumonga wakutama pasi ngati mwana wa adam, wakuya pa mutu wake kikupiku kya zahabu, ni pa kiwoko kyake nyengo yakutema. 15Ni malaika yungi akapititi pa hekalu, wakukuwa ni njowelo ngulungu kwa uyu wakutama pasi pa lifundi, Uyitume nyengo yako ni ubene: ndawa saa ya kubena yifiki; pakuya mabeno ga ndima gayumiti ngani. 16Nu uyu wakutama pasi pa lifundi akayilekalili nyengo yake pa ndima; ni ukabeniki ndima.
17Ni malaika yungi akapiti pa hekalu iyi yiyii kunani, nuyombe kawili ayii ni nyengo yakutema. 18Ni malaika yungi akapititi pa mathbahu, uyu ayii ni chengo panani pa mwoto; ni akakuwuti ni njowelo ngulungu kwa uyu ayii ni nyengo yakutema, kujowa, Uyitume nyengo yako yakutema; ni udumule mitumbula ya mbelesa wa pa ndima; pakuya fipambiko fya mbelesa fyake fikomili. 19Ni malaika akayilekili nyengo yake mu ndima, ni akadumwili mbelesa wa ndima, ni akaulekili pa kufinyila fipambiko pakulungu pa kudada kwa Mulungu. 20Ni pakufinyila fipambiko pakapondiki kunja kwa likaya, ni mwasi ukapititi pakufinyila fipambiko, mpaka pa migoyi ya pa milomo ya mafarasi, mpaka mastadia elfu ni mia sita.
Currently Selected:
Mafunukuliko 14: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
