Hebrayo 7
7
1Pakuya uyu Melkisedek, mutwa wa Salem, kasisi wa Mulungu wa Panani pene, 2uyu akanjangalili Ibrahim, wakukilawuka pa kuwatowa watwa, ni akampili kihomo, uyu nuyombe Ibrahim akamgawili lilundu lya kakumi lya fyoha (pakuya wakutumbula pa kukokosela, Mutwa wa malinga, ni panyuma pake Mutwa wa Salem, yuyu Mutwa wa kindamba; 3wangali dadi, wangali mao, wangali kuwalangika fihogosi, haka nukuya lepa pakutumbula ligono haka pakumalakila pake kulama, koma wakukitika wakuhwanangana nu Mwana wa Mulungu), ahwela kasisi kihwelile. 4Mulolaye umu mundu uyu akayili nkulungu, yula Ibrahim, dadi nkulungu, akampili fya kakumi fya mikoli fyakulutila. 5Na wala nuwombe wa wana wa Levi, wakuyupa mahengo ga kasisi, wayii nu luwimbi walipise nsafi fya kakumi kwa ndingo wa torah, kuku kujowa walongo wawe, haka wapititi mu kiwuno kya Ibrahim: 6leka yombe wangali kuwalangika fihogosi pa wombe akawalipisi Ibrahim fya kakumi, ni akampili wakuya ni filago kihomo. 7Koma pangali kupindikana kuyi kwoha kwa kichoko kupelewa kihomo ni kukulungu. 8Ni apa wandu wa kufwa wayupa fya kakumi; uku koma yumonga, yuyu walungamakika kukita alama. 9Kiyii kyakujowa kukita pa Ibrahim, Levi mwene, wakulipisa fya kakumi, akalipiti fya kakumi; 10pakuya akayili akona mu kiwuno kya dadi, pala Melkisedek akanjangalili.
11Mumu wona kukayili kumalakilana pa ndila ya ukasisi wa wa Levi, (ndawa nsafi upeliwi torah pa awa), kukalondiki wuli kukita kasisi yungi ngaayimi wa ntunda wa Melkisedek, nukuya kuwalangika wa ntunda wa Harun? 12Pakuya ukasisi wona ung’anamulika, nukulekeka kung’anamula kwa torah kawili. 13Pakuya uyu ya yula ifi fijoweka, ayii wa ntangilo wungi, kuhuma pa wula pa waka mundu akawandamili mathbahu. 14Pakuya kimanyika kukita Bambo witu apititi pa Yuda; pa ntangilo uwu Musa akalongili lepa haka kandu panani pa makasisi. 15Ni kipitile kulutila iki kimanyika, kukita wona kwa ndingo wa kuhwanangana kwake Melkisedek ayima kasisi yungi, 16uyu akakitiki nukuya kwa ndingo wa torah ya nyama, koma kwa ndingo wa mbafu ya kulama kwangamala: 17pakuya kulungamakika,
Wenga kasisi kwa miaka
Kwa ntunda wa Melkisedek.
18Pakuya kuyili baho kusimisa luwimbi lwa kulongosa kwa ndawa ya ulegelefu wake ni kulema kutangatila kwake, 19(pakuya torah yikakiti lepa kindu kyakumalakilana), ni kuyingisa baho kihuwalilo kya lilino kinofu kulutila, pa kila timbandamila Mulungu. 20Ni ndawa nukuya pangali kulapila, 21(pakuya wombe chakaka wakitiki makasisi pangali kulapila; leka yombe pamonga nu kwilapila kwa uyu akanjowili,
Bambo akalapili ni kung’anamuka lepa,
Wenga kasisi kwa miaka);
22Kwa ndingo wuwu Yesu apatiti kuya wakukamulila wa malagano nago manofu kulutila. 23Ni wala chakaka wakitiki makasisi wa mahele, ndawa yake kufwa kukasiwilakisi wasihwela mumu: 24koma yombe, ndawa yakuhwela kwa miaka, ayii ni ukasisi wake nukuwukika. 25Mumu nuyombe ahotola kuwayokola kiyokolile wala wakumhichila Mulungu pa yombe, pakulola kukita alama magono goha kupepesa pa mihalo yawe.
26Pakuya kasisi nkulungu wa ntundu uwu atilinganili, wapakape, wangali kukonga, wangali wafu, wakupatukana ni wene sambi, ni wakitiki wakukwela kulutila kunani kwene; 27uyu nuyombe akalonditi lepa ligono ni ligono, ngati makasisi wakulungu wala, kulekela nyambiko, pakutumbula pa mihalo ya sambi syake mwene, ni panyuma pake pa mihalo ya nsafi: pakuya iki akakiti kamonga waka, pala akilekili mwene wakape nyambiko. 28Pakuya torah yikawikiti wandu kuya makasisi makulungu, wakuya wakulegeleka; koma lilowe lya kulapila lila, likayili panyuma pa torah, likambikiti Mwana, wakufwilanasika kwa miaka.
Currently Selected:
Hebrayo 7: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
