Efeso 2
2
1Nu mwenga akawalamisi, apa mukayili wakufwa pa mahoko ni sambi sinu, 2pa isi mwagendagendaga mwandi kwa ndingo wa miaka iyi, kwa ndingo wa nduna wa mbafu ya nyingalila, ya roho yila yihenga hino pa wana wangayufwa; 3pa awa tenga nati mwandi tikalamiti pa manyonyelo ga nyama kugakita magano ga nyama ni ga maholo, ni tayili kwa kihogosi wana wa kudada, ngati wakusigala: — 4koma Mulungu, wakutopela pa lipyana, kwa ndawa ya kugana kwake kwingi uku akatiganiti nako, 5haka apa tayili wakufwa pa mahoko gitu, akatilamisi pamonga nu Kristo, (kwa neema mwayokoliki), 6ni akatisyusiti pamonga nuyombe, ni akatitamisi pasi pamonga nuyombe pandu pa kunani, mwa Kristo Yesu: 7nausi pa miaka yiyii mu kuyicha alasile ngani kutopela kwakulutila kwa neema yake pa lukolo kwa tenga mwa Kristo Yesu: 8pakuya pa neema mwayokoliki pa kiyitakiso; ni iki nukuya kipitile pa mwawene: 9kiyii kiyetulo kipitile pa Mulungu: nukuya kipitile pa makitiko nausi mundu asiyilumba. 10Pakuya tenga tiyii kapangiko kake, wakupangika mwa Kristo Yesu kwa makitiko manofu, gala Mulungu akawikiti palongolo kukita tigendegendele pa gala.
11Kwa iki mukumbukilaye, kukita mwenga mwandi, wa Mihuku wa pa nyama, wakukemeleka pangali kusilimuka na wala wakemeleka Wakusilimuka, pa nyama, wakupangika nu mawoko; 12kukita lukumbi lula mukayili pangali Kristo, wakupatuliwa na malikaya ga Israel, na wageni pa kilagano kya kilago, wangali kihuwalilo ni wangali Mulungu pa ndima. 13Koma hino mwa Kristo Yesu mwenga mukayili wa patali mukakitiki wa papipi pa mwasi wake Kristo. 14Pakuya yombe ayii kindamba kitu, uyu akakiti woha wawili kimonga, 15ni akalibomwili luwumba lwa pagati, apa akawusiti mitumba pa nyama yake, torah ya mimbi ya mapaulo; nausi apange mwa mwene na wala wawili mundu yumonga wa hino, kukita kindamba; 16kuyufwanganisa woha wawili pa mbili umonga kwa Mulungu pa msalaba, apa akakomiti mitumba pa uwu: 17nakachiti nakawawandasili evangel ya kindamba kwa mwenga wa patali, ni kindamba kwa awa wa papipi: 18pakuya pa yombe tawoha tawili tiyii nawo ndyango witu kumbandamila Dadi pa Roho yumonga. 19Mumu mwenga nukuya hino wageni na wakwihadisa pandu, koma muyii wa likaya limonga na wawalafu, na wa pa nyumba ya Mulungu, 20wakujengeka pa kyakuwikika pasi kya maapostolo na wakulweta, Kristo Yesu mwene liganga lya kisongwa; 21pa uyu kanyumba kayi koha ka kuwunganasika wicho pamonga, yakayonjakaseke mpaka kuya hekalu yiwalafu ya Bambo; 22pa yombe namu mujengeka pamonga kwa pakuhwela pake Mulungu pa Roho.
Currently Selected:
Efeso 2: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
