Kolosse 1
1
1Paolo, apostolo wa Yesu Kristo kwa kilondo kyake Mulungu, 2nu Timoteo ndongo witu, kwa wala pa Kolosse wawalafu ni walongo wakukeleka mwa Kristo: Neema kwinu ni kindamba kuhuma pa Mulungu Dadi witu.
3Tinsengusa Mulungu Dadi wa Bambo witu Yesu Kristo, kisalile magono goha kwa mwenga, 4ndawa tiyufwini kiyitakiso kinu mwa Kristo Yesu, ni kiganano kila muyii nakyo kwa wawalafu woha, 5ndawa ya kihuwalilo kila kiwikiki kwa mwenga kunani, iki mukakiyufwini palongolo pa lilowe lya chakaka lya evangel, lila lihichili mwenga; 6umu liyii kawili pa ndima woha mu kupambika fipambiko ni kuyonjakesa, ngati pa mwenga kawili, kitumbulile ligono lila mukayiyufwini ni mukayimanyisi neema ya Mulungu pa fya chakaka; 7umu mukiwulili pa Epaphra mbanda njitu wakuganika, uyu ayii wakutumakila wakuyitikalika wake Kristo pa mihalo ya tenga, 8uyu kawili akalasiti kwa tenga kiganano kinu pa Roho.
9Kwa ndawa iki tenga nati, kitumbulile ligono ili tikayufwini, nukupumula kisalile kwa mwenga ni kwiluwila, kukita mufwilanise ni kukimanyisa kilondo kyake pa luhala lwoha ni kuwalalila mwa roho, 10kugendagenda umu mulinganakila Bambo kwa kwiganila kwoha, pa kupambika fipambiko pa lihengo liyi lyoha linofu, ni kuyonjakesa mpaka kummanyisa Mulungu; 11wakupelewa mbafu iyi yoha, kwa ndingo wa kukangamala kwa kukwisika kwake, mpaka pa luyumalakilo ni kwisinga pamonga nu kuhekelela; 12wakunsengusa Dadi, uyu akatilinganisi kuhasangana kwa lipwela lya wawalafu pa lulangalila; 13uyu akatifuwili kipitile pa chengo kya lwisi, ni akatihamisi kuyingila pa utwa wa Mwana wa kiganano kyake: 14mwa yombe tiyii ni kukombola kwitu, kuku kulekelekesa sambi situ: 15uyu ayii kifwilifwili kya Mulungu wangawoneka, wa kiwele wa mapangiko goha; 16pakukita pa yombe fyoha fikapangiki, fya kunani ni fya pa ndima, fyakuwoneka ni fyangawoneka, pangi fitihu fya kiutwa, pangi matamilo ga wabambo, pangi wakutumbulisa, pangi machengo; fyoha fyapangiki kwa yombe, ni pa yombe; 17nu mwene ayii wa palongolo pa fyoha, ni fyoha fiyima ngani mwa yombe. 18Nu mwene kawili ayii mutu wa mbili, lili kanisa: uyu ayii wakutumbula, wa kiwele kipitile pa wakufwa; nausi yombe aye wa palongolo pa fyoha. 19Pakukita kikayili kwiwonesa kinofu kukita pa yombe kyakufwilanila kiyi kyoha kihwele ngani; 20nu kwa yombe afiyufwanganise fyoha pa yombe mwene, apa akiti kindamba nu mwasi wa msalaba wake; pa yombe, pangi fila fya pa ndima, pangi fya kunani. 21Nu mwenga, wakuya mwandi wakukangachana ni wa mitumba pa maholo ginu pa mahengo ginu mawifu, 22leka hino awayufwanganisi pa mbili wa nyama yake pa kufwa, kuwapelekela wawalafu ni wanyelelele ni wangapisika wawifu pa miho gake: 23wona kuyili kukita muhwele ngani pa kiyitakiso, wakungiki pasi, ni wakusindimala, ni wanganyuka‐nyuka kuhuma pa kihuwalilo kya evangel yila mukayiyufwini, yila yikawandasiki pa kapangiko kayi kyoha pasi pa mafundi; iyii nenga Paolo nikakitiki wakutumakila wake.
24Hino nihekelela pa mahumbuso gangu pa mihalo ya mwenga, ni pa lilundu lyangu nifwilanisa fila filemuka pa mahumbuso gake Kristo pa nyama yangu kwa ndawa ya mbili wake, lili kanisa; 25wa ili nikakitiki wakutumakila, kwa ndingo wa kugoha kula kwa Mulungu kula kukapelakiki kwa nenga pa mwenga, kufwilanisa lilowe lya Mulungu, 26kya kuhyetu kila kikafihaliki kuhumila miaka ni fihogosi fyoha: 27leka hino kikalasiki pa wawalafu wake, wala Mulungu akalonditi kuwamanyisa kiki kyuma kya kukwisika kwa kya kuhyetu iki pa wa Mihuku, iki kiyii Kristo mwa mwenga, kihuwalilo kya kukwisika: 28uyu timbwandisa, kunkila mundu ayi yoha ni kunjigalisa mundu ayi yoha pa luhala lwoha, nausi timpeleke mundu ayi yoha wakumalakilana mwa Kristo; 29pa iki nihenga mahengo kawili, kukita ukiki kwa ndingo wa kuhenga kwake, uku kuhenga mgati mwa nenga kwa mbafu.
Currently Selected:
Kolosse 1: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
