II Petro 1
1
1Simon Petro, mbanda ni apostolo wa Yesu Kristo, kwa wala wakapatiti kiyitakiso kya uhemesi kya ntundu uwu pamonga nu tenga, pa ugolofu wake Mulungu witu ni Njokosi witu Yesu Kristo; 2Neema kwinu ni kindamba kifulusike pa kummanya Mulungu ni Yesu Kristo Bambo witu; 3pakuwona kukita makakala gake Mulungu gatipili findu fyoha fya wumi ni fya kungwilakimbo Mulungu, pa kupata kummanya yula akatikemili pa kukwisika kwake mwene ni finofu fyake: 4pa ifi tipeliwi filago fyake fya uhemesi ni fikulungu nyamhope; nausi pa ifi mupate kuya wakuhasangana ni Umlungu wake, pamaliki mwenga kuyokoleka pa kuyananga uku kuyii mu ndima ndawa ya manyonyelo. 5Ena, ni kwa ndawa iyi, kuyonjakesa mwenga ukiki, ni pa kiyitakiso kinu muyonjakese finofu; ni pa unofu winu kumanya; 6ni pa kumanya kwinu kwihotola; ni pa kwihotola kwisinga; ni pa kwisinga kungwilakimbo Mulungu; 7ni pa kungwilakimbo Mulungu kuwagana walongo; ni pa kuwagana walongo kiganano. 8Pakuya wona ifi fiyii finu ni fifuluka, fiwakitisa mwenga nukuya wakata, nukuya wangali fipambiko mpaka pa kummanya Bambo witu Yesu Kristo. 9Pakuya uyu ayilepe ni findu ifi wakukoyoka miho ayii, wakuwona fila fiyii papipi fyakape, wakuyuwalila kuguyulika kula kwa sambi syake sya mwandi. 10Mumu, walongo, wiyumbatike kukangamasa kakemeleko ni kuhagulika kwinu; pakuya wona mukita ifi, yamukuwale lepa magono goha; 11pakuya wiwi yamupelewe kulutila kuyingila pa utwa wa miaka wa Bambo witu ni Njokosi witu Yesu Kristo.
12Mumu yaniye tayari magono goha kuwakumbukisa mwenga findu ifi, haka mufimanya, ni mwatamasiki pa fya chakaka fila fiyii pa mwenga. 13Ni nikiwalanga kya malinga, lukumbi lwoha apa niyii pa hema iyi, kuwakenyumusa pa kuwakumbukisa; 14pa kumanya kukita kwifuwula hema yangu kuyii papipi, umu Bambo witu Yesu Kristo akanilasili. 15Ena, yaniyumalakile kukita, panyuma pa kuwuka kwangu, magono goha yamuhotole kufikumbukila fifilafila. 16Pakuya tikakisiti lepa sumu sya kukitika na malango, pala tikawamanyisi mbafu ni kuwoneka kwake Bambo witu Yesu Kristo, koma tikayili wakuwona ni miho ukulungu wake. 17Pakuya akayupiti kuhuma pa Mulungu Dadi, liginiko ni kukwisika, pala likamfikili lilowe lya ntundu wula kuhuma pa kukwisika kwa kuniamba, Uyu mwanangu wakuganika, pa yombe niganisiki: 18ni lilowe ili tikayufwini tenga, lyatoliki kipitile kunani, baho tikayili pamonga nuyombe pa kidunda kiwalafu. 19Ni tiyii ni lilowe lya kukangamala kulutila lya wakulweta; ili mukita wicho kuliyufwana, ngati nyali yiwoneka pandu pa lwisi, mpaka musi ukita ngwee, ni kiwumbu kikwela pa mioyo yinu: 20pakumanya iki palongolo, kukita kya kulweta kiyi kyoha kya lilembo nukukokoseka lepa pa kyakape. 21Pakuya nukuya kwa kilondo kya wandu kulweta kukatoliki lukumbi luyi lwoha: koma wandu wakalongili kuhuma pa Mulungu, pakuya wakulongoseka nu Roho Mbalafu.
Currently Selected:
II Petro 1: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
