I Timoteo 6
6
1Wala woha wayii wawanda pasi pa lingolingoli wawawalange wabambo wawe wa wombe wakulinganila liginiko lyoha, nausi lihina lya Mulungu na mayigaliso gasijoweka blasfemia. 2Leka wala wayii na wabambo wawe wakukela wasiwahepa, ndawa wayii walongo; koma mbanga wawatumakile, pakukita wala wapata kipatapata pa kuyupana wayii wanya kiyitakiso ni wakuganika. Findu ifi uyigalise ni kukila. 3Mundu wona ayigalisa fingi, ni nakuyitakila malowe ga kusangalukisa, gaga malowe ga Bambo witu Yesu Kristo, na mayigaliso gala kwa ndingo wa kungwilakimbo Mulungu; 4yombe atupisiki, nakumanya kandu lepa, koma kiyilile nu lupengo pa makoto na mapindikano ga malowe waka, kipitile gala gakitika kuwina mwoyo, kutumbulana, 5blasfemia, maholo mawifu, mapindikano ga wandu wakuwipisika pa mwoyo ni wangali fya chakaka, kuhola kukita kungwilakimbo Mulungu kuyii ndila ya kupata mbendo. 6Koma kugwilakimbo Mulungu pamonga na kwiyenelela kuyii mbendo yikulungu: 7ndawa tenga titolili lepa kandu pa kuyingila mu ndima umu, na haka kutola kandu pakuwuka tihotola lepa; 8leka pakutama ni fyakulamila ni fyakwifunakila, yatiyenelele ni ifi. 9Leka wala walondalonda kuya wakafi wagwa pa mageseko na pa ntego na pa manyonyelo mingi gahimu ni ga kuwinisa, aga gayiwisa wandu pa kuyanangika ni kutagika. 10Pakuya ndela ya fiwifu fyoha kuku kukisa ndalama yene: kula wangi pa kuyitambasulila wasowiti kuhuma pa kiyitakiso, na wayiholwisi ni mahumbusiko mingi.
11Leka wenga, mundu wa Mulungu, ukimbile pa ifi: leka ukise fya ugolofu, kungwilakimbo Mulungu, kiyitakiso, kiganano, luyumalakilo, uwololo. 12Ukomane pa kukomana kunofu kwa kiyitakiso, ukamulile kulama kwa miaka ni miaka, kwa kula ukakemaliki, ni ukafumbwili mafumbuliko manofu pa miho ga walungamakiso wingi. 13Nikupela luwimbi pa miho pa Mulungu, wakufilamisa fyoha, nu Kristo Yesu, uyu pa chengo kya Pontio Pilato alasiti kufumbula kula kunofu; 14kukita ulugohe luwimbi, lwangali lidonondo, lwangali nyimu, mpaka kuwoneka kwake Bambo witu Yesu Kristo: 15kula pa ngumbi sya yombe yakulase, uyu ayii wakusengwa ni Mwene mbafu wakape, Mutwa wa watwa, Bambo wa mabambo; yula wakape ayii ni kwangali kufwa, kihwelile pa lulangalila nakuwandakika; 16yula haka mundu ambweni lepa, haka kumbona nakuhotola lepa: kwa yombe liginiko ni makakala kwa miaka ni miaka. Amen.
17Wakafi wa miaka iyi, uwakile kukita wasiya ni mioyo ya kukweseka, ni wasihuwalila pa kyuma kyangamanyika, koma pa Mulungu, uyu atipela pa ukafi fyoha tisangaluke nafyo; 18kukita wakitaye finofu, waye wakafi pa makitiko manofu, wakwiwikile tayari kupelana, kihasanganile; 19kwiwikila kikokoli kyakuwikika pasi kinofu kiyingalile pa lukumbi lula luyii mu kuyicha, nausi wakamulile kulama kwene.
20Timoteo, ukigohe kyakuwikika kyako, kung’anamuka kuhuma pa gakumamatila mawifu ni mapindikano ga kumanya kula kukemeleka wiwi kwa mageya; 21kula wangi wakayitakili wapuwiti pa kiyitakiso.
Neema yiye pamonga na mwenga.
Currently Selected:
I Timoteo 6: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
