II Timoteo 1
1
1Paolo, apostolo wa Kristo Yesu kwa kilondo kyake Mulungu, kwa ndingo wa kilago kya kulama kula kuyii mwa Kristo Yesu, kwa Timoteo, mwanangu wakuganika: 2Neema, ulongo, kindamba, kuhuma pa Mulungu Dadi nu Yesu Kristo Bambo witu.
3Ninsengusa Mulungu, uyu nimhengela kuhumila pa wakadadi wa mwandi pa chengo kya pa mwoyo kyangapisika mhalo, umu nakukotoka nikukumbukila pa maluwo gangu, 4kilo ni musi kilondile kukuwona, pa kukumbukila masoli gako, nausi nihekelele kulutila; 5apa nikakumbukili kiyitakiso kyako kyangali kwikangalakisa; kila nakyombe kikayili pakutumbula pa mbuyewo Lois, nu nyoko Eunike; na, nikopiki, pa wenga kawili. 6Kwa ndawa iyi nikumbukisa ukolese kya waka kya Mulungu kila kiyii mgati mwako, kuluta pa kulekela mawoko gangu. 7Pakuya Mulungu akatipili lepa roho ya woga; koma ya mbafu ni kiganano ni ya kwihotola. 8Mumu usiwona lihamu pa ulungamakiso wa Bambo witu, haka wa nenga wa pa migoyi wake: koma uyufwane mahumbuso pamonga ni evangel kwa ndingo wa mbafu ya Mulungu; 9uyu atiyokwili, ni akatikemili ni kikemeleko kiwalafu, nakuya kwa ndingo wa makitiko gitu, koma kwa ndingo wa luhala lwake ni neema, yila yikatipelakiki mwa Kristo Yesu palongolo pa ngumbi sya miaka, 10koma yifunukuliki hino pa kuwoneka kwake Njokosi witu Kristo Yesu, uyu akakiwusiti kifwa, ni akamulikisi kulama ni kwangali kuwoleka pa evangel, 11pa yila nikawikiki wakuwandisa, ni apostolo, ni wakuyigalisa. 12Kwa ndawa iyi niyufwana mahumbuso aga nagombe: koma niwonela lepa lihamu; pakukita nimmanya uyu ninkeliti, ni nikopiki kukita ahotola kukigoha kila kiwikiki pa nenga nuyombe kiyingalile pa ligono lililalila. 13Kihwanakiso kya malowe gakusangalukisa ukamule gala ugayufwini pa nenga, pa kiyitakso ni kiganano kila kiyii mwa Kristo Yesu. 14Kyakuwikika kila kiwikiki kwa wenga ukigohe pa Roho Mbalafu uyu ahwela mgati mwitu.
15Iki umanya, kukita woha wa pa Asia wapatwiki pa nenga; pa wala wayii Phugelo ni Hermogene. 16Bambo apwelekele lipyana kwa nyumba ya Onesiphoro: pakukita kawili kawili anikilawusili wumi, na aweni lepa lihamu pa migoyi yangu; 17koma pala akayili pa Roma, akanilonditi‐londiti, 18leka anikolili (Bambo ampelekele akolele lipyana pa Bambo pa ligano lila); na umu pa fingi anitumakili pa Efeso, wenga umanya kulutila.
Currently Selected:
II Timoteo 1: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
