I Thessalonike 4
4
1Mumu pakumalakisa, walongo, tiwapembesa ni tiwakila mwa Bambo Yesu, kukita umu mukayupiti pa tenga umu mulinganila kugendagenda ni kunganila Mulungu, umu muyii mukugendagenda, — kukita muyoloke kilutalile. 2Pakuya mumanya mimbi siliku tikawapili pa Bambo Yesu. 3Pakuya iki kilondo kyake Mulungu, kuwalasa kwinu, kukita mwipatule kuhuma pa fiyaka; 4kukita ayi yoha wa mwenga amanye kwipatila kila akitumila mwene wakape pa kuwalasa ni pa liginiko, 5nakuya pa kuyufwana manyonyelo, ngati umu wa Mihuku awa wangali kummanya Mulungu; 6haka mundu alutakise ni kunkitila ndongo mundu kiwifu pa iki: ndawa Bambo ayii wakulipalisa pa findu ifi fyoha, umu tikakiliti kwinu palongolo ni kuwalasila ulungamakiso. 7Pakuya Mulungu nakutikemela kwa wafu, koma pa kuwalasa. 8Mumu yula akana nakuya mundu ankana, koma Mulungu, uyu awapela mwenga Roho wake Mbalafu.
9Koma panani pa kiganano kwa walongo kyangalondeka kulemba kwinu: pakuya mwenga mwawene muyii mukuyigilasiwa nako Mulungu kuganana; 10ndawa mukikita kikilakila pa walongo woha wala wayii pa Makedonia poha.
11Leka tiwakila, walongo, muyoloke kulutila; ni mupikane kindamba ni kuhenga lihengo linu lya mwawene, ni kuhengela lihengo na mawoko ginu mwawene, umu tikawatolili luwimbi; 12nausi mugendegende na mbili yinofu kwa wala wakunja, na mutame wangali kusowa kandu.
13Leka tilonda lepa, walongo, muye wangali kuwalalila panani pa wala wagoniti; nausi musiniongoneka ngati wakusigala wangali ni kihuwalilo. 14Pakuya wona tikela kukita Yesu akafwili ni akasyukiti kawili, wiwi wala wagoniti mwa Yesu Mulungu yaahiche nawo pamonga nuyombe. 15Pakuya iki tiwajowela kwa lilowe lya Bambo, kukita tenga wakulama, wakulekeka mpaka pa kuwoneka kwake Bambo, yatilongolele lepa wala wagoniti. 16Pakuya Bambo mwene yaselele kuhumila kunani, ni kukwesa lilowe, ni njowelo ya malaika nkulungu, ni kukuwa mbata ya Mulungu: na wakufwa mwa Kristo yawasyuke palongolo: 17panyuma pake tenga wakulama, wakulekeka munyuma, yatikwatulike pamonga nawombe pa mafundi, kumpingamila Bambo pa nyingalila: na wiwi magono goha yatitame pamonga nu Bambo. 18Mumu munyamasane pa malowe aga.
Currently Selected:
I Thessalonike 4: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
