I Thessalonike 5
5
1Leka panani pa ngumbi ni miaka, walongo, kyangasowa kukita niwalembele. 2Pakuya mwawene mumanya kwangahokela kukita ligono lya Bambo lihicha kihwanakiso kya mwifi ni kilo. 3Pala yawajowe, Kindamba ni kihuwalilo, lukumbi lululalula kikenyamukile kuyanangika kuwachilila, ngati kwitambatamba kya ndala wona ayii nu luleme; na yawayokoke lepa haka pachokope. 4Leka mwenga, walongo, muyilepe pa lwisi, kukita ligono lila liwakamula ngati mwifi: 5pakuya mwenga mwawoha muyii wana wa lulangalila, na wana wa musi: tenga tiyilepe wa kilo haka wa lwisi; 6mumu tisigona, ngati wakusigala, koma titame miho ni wakwihotola. 7Ndawa wala wakugona lugono wagona ni kilo; na wala wakugala, wagala ni kilo. 8Leka, tenga, pakuya wa musi, tiyihotole, kwifwatika kyuma kya pa mwoyo kya kiyitakiso ni kiganano; ni kwa kyuma kya pa mutu, kihuwalilo kya uyokosi. 9Pakuya Mulungu akatiwikiti lepe kwa kudada, koma kwa kwipatila uyokosi pa Bambo witu Yesu Kristo, 10uyu akafwili pa mihalo ya tenga, nausi kukita, pangi wona tiyii miho pangi wona tigoniti lugono, tilame pamonga nuyombe. 11Kwa iki mukilane, ni mujengelane, umu mukita kawili.
12Leka tiwapembesa, walongo, muwamanye wala wakutondaseka pa mahengo pa mwenga, ni wayii wene chengo pa mwenga mwa Bambo, ni wawapela luhala; 13ni muwaginike kulutila muni pa kiganano ndawa ya mahengo gawe. Muye ni kindamba na wayinu. 14Leka tiwakila, walongo, muwalakalile wala watumbulana, muwakangamase wala wakukepa pa mwoyo, muwayimalile wakulegeleka, muye wakwisinga na woha. 15Mulolaye kukita mundu asindipalila njini kiwifu kwa kiwifu; koma magono goha mukise iki kiyii kinofu, yungi kwa njini, ni kwa woha. 16Muhekelelaye magono goha; 17Musalaye nakukotoka; 18pa kindu kiyi kyoha musenguseye: pakuya iki kiyii kilondo kyake Mulungu mwa Kristo Yesu kwa mwenga. 19Musinsimisa Roho; 20musihepa fyakulweta: 21mufilinge fyoha; mukamulaye ngani ki kiyii kinofu; 22mwipatule kuhuma pa kihwanakiso kiyi kyoha kya usokosi.
23Ni Mulungu mwene wa kindamba awawalase ngani; ni roho winu nu wumi winu nu mbili winu ugoheke wangakayuka kandu, wangali mhalo, pa kuwoneka kwake Bambo Yesu Kristo. 24Wakukeleka yula awakemela, uyu yakite kawili.
25Walongo, mutiluwile.
26Mulamukile walongo woha ni kununa kuwalafu. 27Niwakila pa Bambo kukita epistola iyi yisomeke kwa walongo woha.
28Neema ya Bambo witu Yesu Kristo yiye pamonga nu mwenga.
Currently Selected:
I Thessalonike 5: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
