I Yohana 3
3
1Mulolaye kugana wuli Dadi atipili tenga, kukita ngatikemaliki wana wa Mulungu: na wana wake tiyii. Kwa ndawa iyi ndima utimanya lepa, pakukita ukammanyiti lepa yombe. 2Wakuganika, hino tiyii wana wa Mulungu, ni takona nakulasika yatiye. Timanya kukita wona alasika yatiye wakuhwanangana nuyombe; pakuya yatimbone umu ayili. 3Nu mundu ayi yoha wakuya ni kihuwalilo iki pa yombe iguyule mwene umu yuyulayula ayii wakuguyulika. 4Ayi yoha uyu akita sambi akita kawili pangali torah: ni sambi yiyii pangali torah. 5Nu mumanya kukita akalasiki nausi asiwuse sambi; na pa yombe payilepe sambi. 6Ayi yoha uyu ahwela mwa yombe akita lepa sambi: ayi yoha uyu akita sambi ambweni lepa, haka kummanya ammanya lepa. 7Wana wachoko, mundu asiwasowesa mwenga: yuakita fya ugolofu ayii ngolofu, umu yuyulayula ayi ngofofu: 8yuakita sambi ayii wa diabolo; pakuya diabolo akita sambi kihumile pakutumbula. Ndawa iyi Mwana wa Mulungu akalasiki, nausi ayanange makitiko ga diabolo. 9Ayi yoha uyu ahogoliki nu Mulungu akita lepa sambi, ndawa mbeyu yake yihwela mwa yombe: na ahotola lepa kukita sambi, ndawa ahogoliki nu Mulungu. 10Pa iki wana wa Mulungu wawoneka, na wana wa diabolo; ayi yoha uyu akita lepa fya ugolofu ayilepe wa Mulungu, haka yualema kungana ndongo mundu. 11Pakuya uwu utenga wula mukayufwini kihumile pakutumbula, kukita tiganane: 12nukuya ngati umu Kain akayili wa nsokosi yula, ni ankomiti nung’una mundu. Na kwa ndawa kiki akankomiti? Pakukita makitiko gake gakayili mawifu, ni ga nung’una mundu gakugoloka.
13Musikangacha, walongo, wona ndima uwawipila. 14Timanya kukita tihamiti pa kifwa kiyingalile pa kulama, ndawa tiwagana walongo. Uyu alema kugana ahwela pa kifwa. 15Ayi yoha uyu ambipila ndongo mundu ayii wakokoma wandu: na mumanya kukita mundu wa kukoma ayilepe ni kulama kwa miaka kuhwela mwa yombe. 16Pa iki tikimanya kiganano, ndawa awikiti wumi wake pa mihalo ya tenga: na tenga tiwikeye wumi witu pa mihalo ya wayitu. 17Koma uyu ayii ni fyakulamila fya ndima uwu, ni andola ndongo mundu wakuhumbusika, ni andindila lukolo lwake, kiganano kya Mulungu kihwela wuli mwa yombe? 18Wana wangu wachoko, tisigana ni malowe, haka nu lulimi; koma ni makitiko ni fya chakaka. 19Pa iki yatimanye kukita tiyii kipitile pa fya chakaka, na yatikopeke mioyo yitu palongolo pake, 20pa kiyi kyoha apa mioyo yitu yitipisa kuwifu; ndawa Mulungu ayii nkulungu kulutila mioyo yitu, ni amanya fyoha. 21Wakuganika, wona mwoyo witu utipisa kuwifu lepa, tiyii wangali kuyogopa kwa Mulungu; 22ni kiyi kyoka kila tikiluwa tikiyupa pa yombe, ndawa tigoha mimbi syake, ni tikita fila fyakuganisa pa miho pake. 23Nu ulu luyii luwimbi lwake, kukita tikele pa lihina lya Mwana mundu Yesu Kristo, ni kuganana, ngati umu akatipili luwimbi. 24Nu uyu agoha mimbi syake ahwela mwa yombe, nuyombe mwa yombe. Ni pa iki timanya kukita ahwela mwa tenga, pa Roho yula akatipili.
Currently Selected:
I Yohana 3: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.
