Ebhikorwa bhya Abhatumwa 20

Pawuro mu-kyaro kya Makedooniya na kya Ebhuyunaani

1Bhunu inkungu ya Efeso ayo ꞉yaawooye, Pawuro ˆnaabhirikira Abhakiriisitu abheenda eyo. Kimwi ˆnaabhakomeesha emitima, ˆnaabharaga, ˆnaagenda mu-kyaro kya Makedooniya. 2ˆNaatura mu-kyaro kiyo, ˆnaabhwiraga Abhakiriisitu amangʼana maafu aga okubhakomeesha emitima. Kimwi ˆnaayika Ebhuyunaani,#20:2 Ebhuyunaani. Ni esiina erindi erya ekyaro kya Akaya. Korinto nigwo ꞉gwariga guri omusi omukuru gwa Akaya. 3ˆnaamara eyo meesi gasatu. Pawuro ˆneeganiirisha okuriinya iimeeri asubhe Siiriya. Ebhuyunaani eyo, Abhayawudi mbamukorera ekiifuteete, bhamwite. Iingʼana iyo niikora Pawuro aramure okutura okwamba mu-kyaro kya Makedooniya, niwe eemukire eyo okugenda Siiriya aturiiye mu-nyanja.

Bhunu ꞉aariga ˆnaasubha Siiriya, 4꞉bhaariga bhari amwi na Sopateri omwana wa Piiro okusooka Bheroya, amwi na Abhateesaroonike abhandi bhabhiri, Arisitariko na Sekundo, Gaayo wa Deribhe, Timoteeyo, na abhaanu bhabhiri abha Asiya, Tukiko na Torofimo. 5Bhayo bhoone kutyo mbatangata mu-musi gwa Turowa, mbakirindira eyo. 6Insikukuru ya emikaate ginu gitatunduuye niiyika kyone kyayikire mu-musi gwa Firipi, nkirinda niiwa, niwe nkisooka Firipi ayo na iimeeri. Nsiku etaanu ngitura kiri mu-bhusibha, niwe kyone nkiyika Turowa. Turowa ayo nkinyookana na abheejaasu. Nkiikara-wo nsiku mungati.

Pawuro kaasuura Ewutiko

7Ekya obhwoyo nkiyika, nkisangira amwi, insonga kiriire amwi kw-igari rya Raatabhugenyi. Kimwi Pawuro ˆnaamba okuraasisha abhaanu Riingʼana rya Nyamuwanga. Mwejo Pawuro ꞉aariga ˆneenda okwimuka ayo, ku-nsonga iyo ꞉aagendereeye okuraasisha abhaanu Riingʼana rya Nyamuwanga ˆnaayikya mu-bhwire agati. 8Munu ꞉kyariga kisangiiye, ꞉kyariga kiri mu-kyumba kinu ꞉kyariga kiri mu-nyumba ingereka eya akasatu. Mu-kyumba muyo ꞉gyariga girimo ntara nyafu ngyokaga.

9Kw-idirisha rya ekyumba kiyo ꞉aariga eekaaye-wo omumura wumwi, riisiina ryaye ˆnaatogwa Ewutiko. Ewutiko uyo ˆnaamba okuwuniirira, kwa okubha Pawuro ꞉aariga ˆnaagenderera okuraasha Riingʼana rya Nyamuwanga agendeeye-ko. Bhunu Ewutiko ꞉aariga ari mu-ntiro agati, ˆnaagaramuka ˆnaagwira anja, ˆneetikiisha ansi. Tikii. Abhaanu mbamuja-ko okumwimusha, mbanyoora afuuye. 10Pawuro woone ˆnooromoka emwaro. ˆNaayika ˆneefumbika iiguru ku-Ewutiko, ˆnaamufumbeera. Kimwi ˆnaabhwira abhaanu bhayo ꞉bhaariga bhari ayo ati, “Musige okukora inkungu! Kwa okubha omumura unu akyarimo omwoyo!” 11Mmbe, Pawuro ˆnaariinya kweki mu-kyumba kinu ꞉bhaariga bhasangiiye-mo, ˆnaagega omukaate, ˆnaarya. ˆNaagenderera okuraasha Riingʼana rya Nyamuwanga okuyikira anu ꞉bhwakyereeye, kimwi ˆneemuka. 12Abhaanu bhayo mbayeregesha Ewutiko mbamuyikya iika ari omuworu. Bhanu ꞉bhaariga bhariwo mbajomerwa muno.

Pawuro kaayika Mireto

13Pawuro ˆneemuka Turowa ayo, ˆnaatura ku-kyaro okugenda mu-musi gwa Asoosi. Eswe nkigenda eyo na iimeeri, insonga kinyookane nawe eyo. Nikwo kutyo ꞉kyariga kiikirishaanyiishe nawe ati ekimugegera eyo. 14Bhunu ꞉kyayikire eyo, ˆnaariinya mu-meeri nkigenda nawe mu-musi gwa Miturene. 15Anu ꞉bhwakyeye, nkitweka iimeeri, nkitura ku-ngego ya riisinga rya Kiiyo. Mwejo yeende-ko, nkyambuka okuja kw-isinga rya Saamosi, nkiikara Turogiriwo. Mbukya kweki, nkiyika mu-musi gwa Mireto. 16Pawuro ꞉aariga atakenere okutura mu-musi gwa Efeso, kwa okubha ꞉aariga ˆneenda eeraabhe okuyika Yerusareemu mu-Nsikukuru ya Pentekoositi akatura okukora kutyo. Ku-nsonga iyo ꞉ateendaga okukoora mu-kyaro kya Asiya.

Pawuro kaaragana na abhakaruka bha riikanisa rya Efeso

17Bhunu Pawuro ꞉aariga ari Mireto ayo, ˆnaabhirikira bhakaruka bha riikanisa rya Efeso eyo. 18Bhunu ꞉bhaamwijire-ko, ˆnaabhabhwira ati, “Emwe mumenyere kujomu kutyo ꞉neekaaye na emwe, okusooka orusuku rwa okwamba runu ꞉naatajire mu-kyaro kya Asiya anu. 19꞉Neetuuye emwaro ku-Raatabhugenyi niimukoreraga emirimu nindiriraga-ko, na gayo ꞉gaanyoorere bhunu Abhayawudi ꞉bhaasakaga okundya injeejemo. 20Nawe ritariwo engʼana na rimwi erya okubhasakira rinu ꞉naabhabhisire. Tari ꞉naabheeyigisishaga ku-bhweru ninturaga na mu-misi gyemwe gumwigumwi. 21꞉Naariga nimbwirira abhweru Abhayawudi na bhanu bhatari Bhayawudi ati, bhanuge ebhikayo bhyebhwe ku-Nyamuwanga, na bheekirishe Raatabhugenyi weeswe Yeesu.

22“Na woori, Mwoyo Omutaakatiifu keenda nigende Yerusareemu. Nawe enigenda kutyo, nitakumenya ganu agaaja okunnyoora eyo. 23Nimenyere era ati mu-misi gyone kutyo ginu enitura, Mwoyo Omutaakatiifu kaanyereshaga ati abhaanu abhaaja okungwata bhamboye, na iinyanko iinene iri imbere waani eyindinda. 24Nawe na woori obhurame bhwani bhutari kiinu ku-anye. Eneenda era ati nimare omurimu gunu ꞉naaramiiye okusooka ku-Raatabhugenyi Yeesu. Omurimu guyo, ni kuraasisha abhaanu Amangʼana Amajomu aga iinema ya Nyamuwanga.

25“Woori mwitegeereshe, nimenyere ati kw-imwe bhanu ꞉naariga nintura agati weemwe okubharaasisha iiguru ya obhukama bhwa Nyamuwanga, mutakyandora kweki. 26Kyakora enibhabhwira reero ati, raabhe ariwo owumwi weemwe unu kaaja okubhura, amaanyinga gaaye gatakuuja okubha ku-anye, 27kwa okubha ꞉nitaasigire okubharaasisha goone kutyo ganu Nyamuwanga keenda. 28Mmbe, mwiyangarire emwe abheene, mwangarire na abheejaanyu bhoone kutyo, bhanu Mwoyo Omutaakatiifu abhatuuye-ko emwe mubhe bhaangarisi mu-bheene. Murere kujomu riikanisa rya Nyamuwanga, kwa okubha Nyamuwanga ꞉aarigurire okuturira ku-maanyinga gaaye omwene.

29“Anye nimenyere ati nikamara okusooka kw-imwe, abhaanu bha ameeyigisho amabhiibhi abhaaja okwiyingisha mw-imwe, na bhataribhafwira ekigongo uri rwa ginsunji. 30Na agati weemwe abheene, bhariwo abhaanu bhanu bharyaika amangʼana ga orurimi insonga bhakongye Abhakiriisitu, bhabhaseete. 31Mmbe woori, mwiyangarire! Muyiitega ati, ku-myaka esatu migima ginu ꞉naamarire na emwe, ꞉nitaasigire okubhatongera muunu wumwiwumwi, nindiriraga-ko mu-ngeta na mu-mwisi.

32“Woori anye noone, enibhatuura mu-mabhoko ga Nyamuwanga, na kw-ingʼana rya iinema yaaye. Riyo niryo eritura okubhakomeesha, na okubhayaanira amwi omugabho na abhaanu bha Nyamuwanga abhandi bhanu bheesiibhwe ku-nsonga yaaye.

33“Anye ꞉niteegombere yera, jaabhu, na ngibho gya omuunu woonewoone. 34Emwe abheene mumenyere kujomu ati, ꞉naariga ninkora emirimu na amabhoko gaani ganu, insonga nimare-wo obhukene bhwani na obhwa abheejaasu bhanu ꞉kyariga kiri amwi nabho. 35Ku-mangʼana gayo goone kutyo, ꞉naariga nimbeeresha ati kiisire kikorega emirimu eswe abheene, kyone kinyoore ebhiinu bhya okusakira bhanu bhatari nabhyo. Mukorega kutyo muyiita amangʼana ganu Raatabhugenyi Yeesu ꞉aaikire ati, ‘Nyakara okusoosha, okukira okuramira.’ ”

36Pawuro ꞉aamarire okwaika amangʼana gayo era, ˆneefukama amwi na abhandi bhoone kutyo, ˆnaasabha Nyamuwanga. 37Kimwi abhaanu bhoone kutyo mbamufumbeera mbariraga na okumubhuusu. 38Ekiinu kinu ꞉kyabhasurumbasiishe ni iingʼana rinu ꞉aaikire ati bhatakuuja okumurora kweki. Mmbe, mbamuyeregesha mbamuyikya ku-bhwato.

Currently Selected:

Ebhikorwa bhya Abhatumwa 20: kya

Highlight

Copy