Ebhikorwa bhya Abhatumwa 19

Pawuro kaaraasha ku-bhaanu bha Asiya

1Mu-kabhaga kayo Apooro ꞉aariga ari Korinto ayo, Pawuro woone ꞉aariga aturire mu-mbaara gya iiguru, ˆnaatebhera mu-musi gwa Efeso. Bhunu ꞉aariga ari Efeso ayo, ˆnaanyookana na abheeyigira bha Yeesu abhandi abha Efeso ayo, 2ˆnaabhabhuusha ati, “Angu bhunu ꞉mweekirisiishe Yeesu, mwaramiiye Mwoyo Omutaakatiifu?” Bheeki mbamusubhya ati, “Uri, na okuungwa ati ariwo, kikyariga okuungwa.” 3Pawuro ˆnaabhabhuusha kweki ati, “Kana, ꞉mwabhatiisiibhwe bhubhatiisibhwaki?” Bheeki mbamusubhya ati, “꞉Kyabhatiisiibhwe obhubhatiisha bhwa Yowana.”

4Niwe Pawuro ˆnaabhabhwira ati, “Yowana ꞉aariga ˆnaabhatiisha abhaanu, ˆnaabhabhwiraga bhanuge ebhikayo bhyebhwe, na okwikirisha unu ariija iinyuma waaye. Omuunu uyo niwe Yeesu.” 5Abhaanu bha Efeso bhayo, okuungwa amangʼana gayo, mbeekirisha, mbabhatiisibhwa bhoone kutyo kw-isiina rya Raatabhugenyi Yeesu. 6Bhunu Pawuro ꞉aariga ˆnaabhatuurira-ko amabhoko gaaye, Mwoyo Omutaakatiifu ˆnaabheekira. Mbaamba okwaika nyaaika egindi, mbasooshaga na obhuragi. 7Na obhukumi bhwa abhaanu bhayo, ꞉bhaariga bhari muna bharume ekumi na bhabhiri.

8Pawuro ˆnaamara ameesi gasatu ˆneengiraga mw-isunagoogi rya Abhayawudi. ˆNaabhambashaanyaga na abhaanu ari na riibhaasi bheekirishe amangʼana ga obhukama bhwa Nyamuwanga. 9Nawe abhandi mbakomeesha emitima gyebhwe. Mbarema okwikirisha amangʼana ga Yeesu, mbaamba okugajeera mu-meeso ga abhaanu bhanu ꞉bhaariga bhasangire ayo. Iingʼana iyo niikora Pawuro ˆnaasigana nabho, ˆnaasira Abhakiriisitu mw-idarasa rya omuunu wumwi ˆnaatogwa Tirano, ˆnaabhambashaanyaga na abhaanu ku-nsiku mw-idarasa muyo. 10Pawuro ˆnaamara eyo emyaka ebhiri ˆnaabhwiraga abhaanu iiguru ya Yeesu, okuyikira anu abheekasi bhoone kutyo abha ekyaro kya Asiya ꞉bhoongwiriiye Riingʼana rya Raatabhugenyi, bharimo Abhayawudi na abhaanu bha ebhyaro ebhindi.

Abhaana bha Sikeewa abhabhumwa na ebhiwi

11Mu-kabhaga kanu Pawuro ꞉aariga ari Efeso ayo, Nyamuwanga ꞉aariga ˆnaakora ebhigwa bhya okuruguusha okuturira ku-mabhoko gaaye. 12Na ebhitambaara bhya mu-mabhoko na gingibho egindi ginu ꞉gyariga ngikuunʼya ku-mubhiri gwa Pawuro, bhunu ꞉gyatuurwaga ku-bharwaye, mbawora. Nikwo kutyokutyo na ebhiwi bhyone, ꞉bhyariga mbisooka mu-bhaanu bhakakuunibhwa-ko na gingibho na ebhitambaara bhiyo.

13꞉Bhaariga bhariwo Abhayawudi abhandi bhatereeganu, bhari bhawungi bha ebhiwi. Abhayawudi bhayo ꞉bhaasakaga okubhirimya ebhiwi mu-bhaanu kw-isiina rya Raatabhugenyi Yeesu, mbabhwiraga ebhiwi bhiyo ati, “Kw-isiina rya Yeesu unu Pawuro kaaraasishaga abhaanu amangʼana gaaye, ekibhasiiga musooke mu-muunu unu!” 14Mu-bhaanu bhanu ꞉bhaariga mbakora kutyo, ꞉bhaariga bharimo bhaana mungati abha Sikeewa. Sikeewa ꞉aariga ari Muyawudi, mukuru wa abhashengesi. 15Nawe ekiwi nkibhasubhya ati, “Yeesu nimumenyere, Pawuro woone nimumenyere, woori emwe ni bhaaga?” 16Kimwi omuunu uyo ꞉aariga awungirwe ekiwi ˆnaabheejungira, ˆnaabhayiga amanaga. ˆNaabhabhuma muno, mbabhirima anja bhari kinaabhi, bhabheeye na amawuta.

17Iingʼana iyo niiswerana mu-Bhayawudi bhoone kutyo na Abhayunaani bhanu ꞉bhaariga bheekaaye Efeso ayo, ekiyayo nkibhagwata bhoone kutyo, na riisiina rya Raatabhugenyi Yeesu ndigenderera okugungibhwa. 18Abhaanu bhaafu bhanu ꞉bheekirisiishe Yeesu, mbeegamba ebhikayo bhyebhwe bhinu ꞉bhaariga bhaakorere. ꞉Bheegambire ebhikayo mu-meeso ga abhaanu bhoone kutyo. 19Abhaafu ꞉bhaariga mbakoraga amangʼana ga obhufumu. Kimwi abhafumu bhayo mbareeta ebhitabho bhyebhwe bhinu ꞉bhaariga mbakoreraga obhufumu, mbabhyokya mu-meeso ga abhaanu bhoone kutyo. Mbabhara giiyera gya obhugusi bhwa ebhitabho bhiyo, ꞉gyariga giri nyafu muno ngiyikya muna bhiwumbi makumi gataanu.#19:19 Bhiwumbi makumi gataanu. Mu-kabhaga kayo giiyera giyo ꞉gyariga giri yera gya okugura ngʼombe nyafu muno. 20Nikwo kutyo riingʼana rya Raatabhugenyi ꞉ryariga ndiswerana na amanaga mu-bhaanu.

Inkungu mu-musi gwa Efeso

21Mmbe gayo ngawa, Pawuro ˆneenda ature mu-kyaro kya Makedooniya na Akaya, agende Yerusareemu. ˆNaaramura mu-mutima gwaye ati, “Nikabha Yerusareemu ayo, eyeendwa ati niyike na mu-musi gwa Ruumi.” 22Mmbe, ˆnaagega bhaanu bhabhiri mu-bhasakisi bhaaye, ˆnaabhatuma bhatangate Makedooniya. Abhasakisi bhayo ni Timoteeyo na Eraasito. Nawe omwene ˆnaasigara mu-kyaro kya Asiya.

23Mu-kabhaga kayo Pawuro ꞉aariga ari Efeso ayo, niibha-wo inkungu nene muno ku-nsonga ya ameeyigisho ga Pawuro ku-bhaanu. 24Efeso ayo ꞉aariga ariwo omuyeesi wumwi wa giiyera, riisiina ryaye ˆnaatogwa Demetiriyo. Ku-yera giyo ꞉aariga ˆnaayeesa, ꞉aatuuraga-ko orususo rwa riiyekaru rya riisambwa ryebhwe rinu ꞉ryatogwaga Aritemi. Na emirimu giyo ꞉gyayaanaga abhayeesi bheejaabho muyeero mwafu.

25Rusuku rumwi Demetiriyo ˆnaabhirikira abhayeesi bheejaabho bhayo, amwi na abhaanu abhandi bhanu ꞉bhaakoraga emirimu rwa egyaye. ˆNaabhabhwira ati, “Bhamura emwe, mumenyere kujomu ati mu-mirimu ginu, nimwo ekinyoorera-mo muyeero. 26Nawe woori mwoongwa, na mwarora kutyo Pawuro kaakongya abhaanu bhaafu bha Efeso anu, na abhaanu bhaafu abha mbaara gyone kutyo egya ekyaro kya Asiya. Na Pawuro uyo niwe kaabhabhwira ati ekisusano kitari na bhuturo, ati abhaanu bhasige okukiikirisha, kwa okubha ati ebhisusano ebhiroosibhwa era na amabhoko ga abhaanu. 27Itari ati emirimu gyeswe nigyo egiija okuremwa era, tari na riiyekaru rya riisambwa ryeswe riikuru Aritemi ryone eribha rijeererwe. Aritemi niwe ekiramya Asiya anu na mu-bhyaro bhyone kutyo, woori eyibha kutiki raabhe akajeerwa ˆnaateesibhwa obhukuru bhwaye?”

28Amangʼana ga Demetiriyo gayo, ngakora bheejaabho bhayo mbabhiiyirwa muno. Mbaamba okumwaya mbaaikaga ati, “Aritemi wa Abhaefeso niwe omukuru!” 29Mmbe, omusi gwa Efeso gwone kutyo ngubha-mo inkungu. Abhaanu bhayo mbagwata Gaayo na Arisitariko, abhaanu bha Makedooniya bhanu ꞉bhaariga mbaribhashaanya amwi na Pawuro. Mbeengira nabho mu-rubhuga runu ꞉bhaawooyeraga-mo. 30Pawuro woone ˆneenda ati eengire mw-isangi rya abhaanu bhayo, nawe Abhakiriisitu bheejaabho mbamugaanya. 31Na abhasaani bhaaye abhandi bhanu ꞉bhaariga bhari bhakuru bha Asiya eyo, bhoone mbatuma abhaanu okumwisaasaama ati aasiga okwingira mu-rubhuga muyo.

32Mmbe, abhaanu bhayo ꞉bhaariga bhasangiiye ayo abhandi mbamwaya kutya, abhandi kutya. Inkungu iyo ꞉yaariga iri nene muno. Abhaafu ꞉bhataamenyaga insonga inu ꞉yaakorere bhasangire muyo. 33Abhayawudi mbabhwira Arekijanda abhaaikire mu-bhaanu bhayo. Mbamutuura abhweru mu-meeso ga abhaanu. Niwe Arekijanda ˆneemusisha abhaanu okubhoko bhajibhire, kwa okubha ꞉aariga ˆneenda okubhagira Abhayawudi. 34Nawe bhunu ꞉bhaamenyere ati ni Muyawudi, mbamwayira amwi riibhaga nditura-wo, mbaaikaga ati, “Aritemi wa Abhaefeso niwe omukuru!” Ekimwayo kiyo ꞉kyamarire-wo muna nsa ebhiri kutya.

35Ku-bhuteero, kiraka omukuru wa mu-musi guyo ˆnaajibhisha abhaanu bhayo. ˆNaabhabhwira ati, “Emwe abhamura bha Efeso, ni muunuki mu-bhyaro bhyone kutyo unu atakumenya ati omusi gwa Efeso gunu nigwo ogwangarira riiyekaru rya riisambwa riikuru Aritemi, na ekisusano kyaye kinu ꞉kyeekire okusooka mu-rwire? 36Mmbe! Kwa okubha atariwo omuunu unu kaarema amangʼana ganu, mujibhire, na musige kukora engʼana ryoneryone bhwangu. 37Enaaika kutyo, kwa okubha abhaanu bhanu mwabhareeta anu, bhateebhire kiinu mw-iyekaru rya riisambwa ryeswe Aritemi, na bhakyari okumufuma. 38Kiri na owa okuramurira amangʼana gayo, na abharamusi bha ebhiraagiro bhariwo. Ayo niwe Demetiriyo na abhayeesi bheejaabho bheesire bhasitaakye abhaanu bhayo, raabhe bhari na riingʼana rya okubhasitaakya! 39Na mukabha na amangʼana agandi ganu omubhaagara-ko, mugende muungwanire ku-bharamusi bhanu bheekirisiibhwe na ebhiraagiro bhyeswe, 40kwa okubha ganu kyakora reero agatura okukora kisitaakibhwe ati, kyakora inkungu nene. Raabhe kikasitaakibhwa ku-nsonga iyo, kitari na engʼana rinu eriija okukisoosha-mo, kwa okubha inkungu inu itari na nsonga yooneyoone.” 41Bhunu kiraka uyo ꞉aamarire okubhwira abhaanu bhayo kutyo, ˆnaabhabhwira bhagende iika.

Currently Selected:

Ebhikorwa bhya Abhatumwa 19: kya

Highlight

Copy