Ebhikorwa bhya Abhatumwa 21

Pawuro kaagenda Yerusareemu

1Mmbe, nkiragana na bhakaruka bha Efeso bhayo, nkiriinya mu-bhwato, nkigenda kiroobhere nkitura kw-isinga rya Koosi. Mwejo, nkigenda kw-isinga rya Rodo. Okusooka ayo, nkigenda kweki nkiyika mu-musi gwa Patara. 2Patara ayo nkinyoora-wo iimeeri eyindi inu ꞉yambukaga okuja mu-kyaro kya Foyinike. Nkiriinya-mo, nkigenda nayo. 3Bhunu ꞉kyarorere riisinga rya Kiipuro, nkirisiga orubhaara rwa ebhumosi, nkigenderera nkitura mu-kyaro kya Siiriya.

Bhunu ꞉kyayikire Siiriya, nkitebhera okuja mu-musi gwa Tiiro. Nkiikira Tiiro ayo, kwa okubha ayo niwe iimeeri iyo ꞉yaariga niyiisisha emijigo. 4Okuyika ayo, nkinyookana na Abhakiriisitu bheenda ayo, mbakiramira nkiikara eweebhwe, nkimara-wo nsiku mungati. Abhakiriisitu bhayo mbabhwiraga Pawuro enu bhatangasiibhwe na Mwoyo Omutaakatiifu ati, aasiga kuriinyagisha okuja Yerusareemu. 5Bhunu ꞉kyamarire nsiku mungati kiri ayo, nkiimuka. Abhakiriisitu bhoone kutyo abha Tiiro ayo, abharume na abhagasi bheebhwe, na abhaana bheebhwe mbakiyeregesha. Mbakyambusha ku-musi gwa Tiiro mbakiyikya ku-ngego ya omwaro. Ku-ngego ayo, bhoone kutyo nkiifukama, nkisaasaama Nyamuwanga. 6Okumara okusaasaama, nkiragana nabho nkiriinya mu-bhwato, bheeki bhoone mbasubha eweebhwe.

7Kimwi nkisooka Tiiro ayo, nkigenderera na orugendo nkitura mu-musi gwa Toremayi. Nkikeesha Abhakiriisitu bheejaasu ayo, nkiikara nabho rusuku rumwi. 8Mwejo anu ꞉bhwakyeye, nkisooka ayo, nkigenda mu-musi gwa Kayijaariya nkiikara ewa Firipo. Firipo ꞉aariga ari omuraasha wa Amangʼana Amajomu aga Yeesu, woone ꞉aariga ari owumwi wa abhasakisi mungati bharya ꞉bhaasorerwe Yerusareemu. 9Firipo ꞉aariga ari na bhayara bhana. Abhayara bhayo ꞉bhaariga bhari bhayarajuma, na ꞉bhaariga bhayaaywe na Nyamuwanga ekiyaanwa kya obhuragi.

10Mmbe, ginsiku ngitura nyafu kiri Kayijaariya ayo, ˆnaaja omuragi okusooka Ebhuyawudi, riisiina ryaye ˆnaatogwa Agabho. 11Agabho uyo ˆnaakiija-ko, ˆnaagega omuchipi gwa Pawuro, ˆneebhoya amaguru na amabhoko, ˆnaaika ati, “Mwoyo Omutaakatiifu kaaika ati, ‘Kutyo omuchipi gunu gubhoyerwe, nikwo kutyo Abhayawudi bha Yerusareemu eyo, abhaaja okubhoya omwene omuchipi gunu na abhaaja okumutuura mu-mabhoko ga abhaanu bha ebhyaro ebhindi.’ ”

12Bhunu ꞉kyoonguuywe kutyo, eswe na abheejaasu abha Kayijaariya ayo, nkiisaasaama muno Pawuro ati, asige okugenda Yerusareemu. 13Nawe omwene ˆnaakisubhya ati, “Kubhaki omurira muunyita omutima? Anye niituuye-wo, ku-nsonga ya riisiina rya Raatabhugenyi Yeesu, itari kubhoywa era, tari raabhé kwitwa Yerusareemu eyo, kwone niituuye-wo.” 14Bhunu ꞉kyarorere ati Pawuro aarema okukyungwa, nkimusiga, nkyaika era ati, “Ganu Raatabhugenyi kaakena nigo gakoreke.”

15Kimwi nkibhoya emijigo gyeswe, nkyamba okuriinyagisha okuja Yerusareemu. 16Nkiimuka na Abhakiriisitu abhandi abha Kayijaariya ayo, mbakisira ewa Munaasoni. Munaasoni ꞉aariga ari muunu wa kw-isinga rya Kiipuro, na ꞉aariga ari wumwi wa Abhakiriisitu bha okwamba. Na uyo niwe ꞉kyariga nkija okwikara ewaaye.

Pawuro aayika Yerusareemu

17Mmbe, nkiyika Yerusareemu ayo, Abhakiriisitu bheejaasu abha Yerusareemu ayo, mbakiramira bhajomeeywe muno. 18Mwejo, nkigenda na Pawuro ewa Yakobho okumukeesha, na abhakaruka bha riikanisa bhoone ꞉bheejire-wo. 19Pawuro ˆnaabhakeesha, ˆnaabhabhwira engʼana rimwirimwi ku-ganu Nyamuwanga ꞉aakorere ku-bhanu bhatari Bhayawudi mu-kuraasha kwaye kwa Riingʼana rya Nyamuwanga.

20Bhunu ꞉bhoonguuywe amangʼana gayo, mbagungya Nyamuwanga. Mbabhwira Pawuro ati, “Ee mwana waasu, owurora kutyo ebhiwumbi na ebhiwumbi ebhya Abhayawudi kutyo bheekirisiishe Yeesu. Na bhoone kutyo abheekomeesha muno okukora ganu ebhiraagiro bhya Musa ebhyenda. 21Abheene bhoone bhabhwiriiywe ati, owiiyigisha Abhayawudi bhoone kutyo bhanu bheekaaye mu-bhyaro ebhindi bhasige okuseeta ebhiraagiro bhya Musa, ati bhasige okusaara abhaana bheebhwe, na okuseeta gintungwa gya Ekiyawudi. 22Mmbe! Woori kikore kutiki? Ni kimari ati Abhayawudi bhayo bhoone abhaaja okuungwa ati waaja Yerusareemu anu. 23Woori, nuukore kinu kiraakubhwire. Anu kiri na bhaanu bhana bharume bhanu bhatuuye-wo riirayiro ku-Nyamuwanga. 24Genda amwi nabho, mwiyeshe nabho, bhamwegwe na ginfwiri. Na ebhiinu bhya okumwegera ni awe owuuja okubhagurira,#21:24 Ringira Ebhikorwa bhya Abhatumwa 18:18. insonga abhaanu bhoone kutyo bhamenye ati amangʼana goone ganu abhaanu ꞉bhaariga mbakugamba gatari na bhwera. Abhaaja okumenya kutyo kwa okubha abhakurora ati owugenderesha okugwata ebhiraagiro bhya Musa. 25Nawe ku-rubhaara rwa bhanu bhatari Bhayawudi, bhanu bheekirisiishe Yeesu, kyakorere ekisendo nkibhakaamira iinyarubha ati, bhaasiga okurya ebhyokurya bhinu bhisoosiibhwe okushengera, bhaasiga okurya orwamba, bhaasiga okurya gintyanyi ginu gibhuutirwe, na bhaasiga okubha bhataasi bha ameega.”

26Mwejo, Pawuro ˆnaagenda na abhaanu abhana bhayo, ˆneeyesha amwi nabho. Kimwi ˆneengira mw-iyekaru, insonga abhwire omushengesi ginsiku ginu abhaaja okumara eyo ku-kwiyesha kwebhwe, na omugabho gwebhwe wumwiwumwi gunu abhaaja okusoosha.

Pawuro kaagwatwa

27Nsiku mungati gya okwiyesha, bhunu ꞉gyarebhereeye okuwa, riisangi rya Abhayawudi bhanu ꞉bhaariga bhasookere mu-kyaro kya Asiya mbarora Pawuro mw-iyekaru. Kimwi Abhayawudi bhayo mbasooyeresha abhaanu, mbakora inkungu kimwi mbamugwata. 28꞉Bhaariga mbaamura obhuraka mbaaika ati, “Emwe abhaanu bha Ijirayeeri, mukisakire! Ndora omuunu unu niwe urya kaagendaga ˆneeyigisha abhaanu mbaara gyone kutyo ati bhakijeerega, bhajeerega na ebhiraagiro bhya Musa, na riiyekaru. Okukira gayo, kaanaabhiyasha riiyekaru riitaakatiifu, ˆnaakisaasikanya na abhaanu bha ebhyaro ebhindi.”#21:28 Ebhyaro ebhindi. Abhaanu bhanu ꞉bhaariga bhatari Bhayawudi ꞉bhaariga bhatakwikirisibhwa okwingira mu-rubhuga rwa mw-iyekaru munsi. Bhayo bheeki ꞉bhaariga bhari na orubhaara rwebhwe orwa okubha. Ringira iiramaani mu-bhuteero bhwa ekitabho. 29꞉Bhaaikire kutyo kwa okubha ꞉bhaariga bharorere Pawuro Yerusareemu ayo, ari amwi na Torofimo Omuefeso. Bheeki ꞉bhaatogaga ati Pawuro ꞉aamwingisiishe mw-ibhanja rya riiyekaru.

30Mmbe abhaanu mbaamba okukora inkungu mu-musi gwone kutyo ogwa Yerusareemu, mbabhirimira Pawuro mw-iyekaru mbamugwata, mbamukurura okusooka mw-ibhanja rya riiyekaru muyo. Emiryango gya riiyekaru ngiigarwa ayoayo. 31Bhunu abhaanu bhayo ꞉bhaariga bhakyabhuma Pawuro mbeendaga bhamwite, amangʼana ngayikira omukuru wa abhasirikare bha Ekiruumi ati, omusi gwa Yerusareemu gwone kutyo guwooye nkungu. 32Mmbe, omukuru uyo ˆnaagega abhasirikare bhaaye na abhayambaasi bheebhwe, mbabhirima okugenda ku-bhaanu bhayo. Anu abhaanu bhayo ꞉bhaarorere omukuru uyo ari na abhasirikare na abhayambaasi bheebhwe, mbasiga okubhuma Pawuro.

33Omukuru wa abhasirikare ˆnaabhafugerera, ˆnaagwata Pawuro, ˆnaasiiga ati abhoywe na eminyororo ebhiri. Kimwi ˆnaabhuusha abhaanu bhayo ati, “Niga unu? Na aakora kiinuki?” 34Abhaanu bhayo mbaamba okumwaya muno, abhandi kutya, abhandi kutya. Ekimwayo kiyo nkikora omukuru wa abhasirikare asige okumenya ganu gaabha-wo. Kimwi ˆnaasiiga ati Pawuro asirwe mu-rubhago rwebhwe orwa abhasirikare. 35Bhunu Pawuro ꞉aariga ari ku-ngaji gya orubhago ruyo, abhaanu bharya ꞉bhaamukururaga, mbabhiiyirirwa muno, iingʼana iyo niikora abhasirikare bhayo bhayange Pawuro iiguruguru, insonga bhamuwonʼye. 36Nawe, abhaanu bhayo mbagenderera okuseeta Pawuro, mbamwayaga mbaaikaga ati, “Unu mumwite era!”

Pawuro keebhagira ku-Bhayawudi

37Bhunu abhasirikare bhayo ꞉bhaariga mbeengisha Pawuro mu-rubhago rwebhwe, Pawuro ˆnaabhuusha omukuru wa abhasirikare bhayo ati, “Owiikirisha nikubhwire riingʼana?” Omukuru wa bhasirikare ˆnaamusubhya ati, “Kana woone umenyere okwaika Ekiyunaani? 38Naaniitoga ati awe ni awe Omumiisiri unu ꞉aasokanyiishe abheeti bhiwumbi bhina bharya, ˆnaabhatangasha okubhasira ku-nsi ya orukungu.”

39Pawuro ˆnaamusubhya ati, “Anye niri Muyawudi, mwibhurwa wa mu-musi gwa Taruso mu-kyaro kya Kirikiya. Enikwisaasaama unyiikirisishe naaike-ko na abhaanu bhanu.” 40Kimwi omukuru wa abhasirikare ˆneekirisha. Mmbe, Pawuro ˆnaayambaara ku-ngaji, ˆneemusisha abhaanu okubhoko ati bhajibhire. Bhunu abhaanu ꞉bhaajibhiiye bhoone kutyo, ˆnaabhabhwirira mu-nyaaika yeebhwe eya Ekiebhuraaniya.

Currently Selected:

Ebhikorwa bhya Abhatumwa 21: kya

Highlight

Copy