रोमि 4
4
आब्राहाम बिस्वासलाम्मा धारमोति लिसाना
1हाट्ले आनि छोङ्बाङाना टुबाठेबा आब्राहामङाना बारेङि माट्टुम्॥ उन्ङा माङ्हाङ् ओनाभाक्ङि धारमोति याप्मि लिना बारेङि पाक् सिकाँ लिसेना टे? 2आब्राहामङा उन्ङा चोगुना ओचेट्नुना टोॽवालाम्मा उन् धारमोति लिसानाँ बे उन् लाउङ्सा ठेलोक् लिमाना रिङ् लिसे बे, टरो हिट्ना बारेङि माङ्हाङ् सोरि उन् ठेलोक् लिमाना रिङ् पाक्चा वानेट्निना॥ 3पोङ्भोने धारमाछाप्लाङि नाड्डे छेप्टेसेए, “आब्राहामङा माङ्हाङ् बिस्वास चोगुए हिट्नुङ् उन्ङा चोगुना बिस्वासङा माङ्हाङ्ङा उन् धारमोति याप्मि नुङ् लाडुए॥”#उत्पति १५:६; गालाति ३:६ 4हाट्ले टोॽवा काचोक् याप्मिङा उन्ङा चोगुना टोॽवाङाना उनिम्याक् टोगुटु, हिट्ना दान माखाक्, टरो हिट्ना उन्ङाना पाउँदार उनिमेयाक् ए॥ 5टरो कोइ याप्मिङा आप्पे ओबारगाट्ङि भोरोसा चोगुन्ना, टरो पापि याप्मि धारमोति काचोक् माङ्हाङ्ङि ओभोरोसा युङ्सुटु भोने, हिट्ना माङ्हाङ्ङा धारमोति याप्मि नुङ् लाडुटु, पोङ्भोने हिट्ना याप्मिङा आप्पे ओबारगाट्ङा पाक्चा चोक्मा हिडुन्ना॥ 6याप्मा बारखा पाइले दाउदङा चा टोॽवा मिचोक्ङे डोक् माङ्हाङ्ङा धारमोति याप्मि नुङ् लाडुना याप्मि, उन् आसिक् टोगुना याप्मि लोडुए॥ दाउदङा माट्टुए,
7“माङ्हाङ्ङा पाप छेमा पिडुचिगा याप्मिचि आसिसित् उलिसेसे,
हिट्नुङ् हिट्नागाँगा पाप उन्ङा टुगुबिडुएसुचे॥
8जुन् याप्मिङाना पाप टाङ्बाङा मिट्टुन्ना हिट्नागा याप्मिचि आसिसित् उलिसेसे॥”#छाम्लोमा छाप्ला ३२:१-२
9आन्याँ याप्मिलोडा: ना आसिक्उम्बाक् पाक् खाताना काचोक् याहुदिचि लोङ्सा एडोक् इ? आथाबा खाताना ओचोक्निगा पानिछोङ्बाचि लाउङ्सा चा इ? पोङ्भोने आब्राहामङा माङ्हाङ् बिस्वास चोगुए हिट्नुङ् उन्ङा चोगुना बिस्वासङा माङ्हाङ्ङा उन् धारमोति याप्मि नुङ् लाडुना रिङ् आन्याँ पाइले डोक् माट्टुएसुम्मे॥ 10हिट्नुङ् आब्राहाम माङ्हाङ् ओनाभाक्ङि खोना बेला धारमोति लिसेना टे? पाक् उन् खाताना लिमा नुङ् पाइले धारमोति लिसाना इ एङ्स्वा इ? छेम्बा डोक्, उन् खाताना लिमा नुङ् पाइला डोक् माङ्हाङ् ओनाभाक्ङि धारमोति याप्मि लिसे॥ 11हिड्डेउङ् ना खातानाम्बाक् माङ्हाङ्ङा आब्राहाम धारमोति याप्मि नुङ् लाडुना रिङ्ङाना चिन्ना उन्ङा टोगुना ए, पोङ्भोने आब्राहामङा खाताना चोक्मा पाइले डोक् माङ्हाङ्ङि बिस्वास चोगुना डाना॥ नाड्डेउङ् आब्राहामम्बाक् माङ्हाङ्ङि बिस्वास ओचोगुगा सोब्बे याप्मिचिगा टुबाठेबा लिसे, हिट्नुङ् हिट्नागाँ खाताना ओचोगुन्चा माङ्हाङ्ङा धारमोति याप्मिचि नुङ् लाडुचे॥#उत्पति १७:१० 12आब्राहाम चा खाताना ओचोगुगा ख्वाप्पाङागा टुबाठेबा ए, टरो हिट्नागाँ खाताना ओचोगुनाँ एडोक् आब्राहाम हिट्नागाँगा टुबाठेबा लिसाना माखाक्॥ आब्राहाम उन्ङा खाताना चोक्मा पाइले माङ्हाङ्ङि बिस्वास चोगु गाड्डे बिस्वास ओचोगुगा याप्मिचिगा चा टुबाठेबा ए॥
बिस्वासलाम्मा माङ्हाङ्ङाना माङ्हुप् टोगुम्टुम्
13आच्छो बेला माङ्हाङ्ङा आब्राहाम हिट्नुङ् उपुङ्लाचि ख्वाप्पा नाराङिना हाकवाला चोक्मा हिट्नागा चामारसिङा चोगुचे॥ आब्राहामङा धारमाबिधि पालान् चोगुनाँ माङ्हाङ्ङा चामारसिङा चोगुना माखाक्, टरो आब्राहामङा माङ्हाङ्ङि बिस्वास चोगुनाँ माङ्हाङ्ङा उन् चामारसिङा चोगुए हिट्नुङ् माङ्हाङ्ङा उन् धारमोति याप्मि नुङ् लाडुए॥#उत्पति १७:४-६; २२:१७-१८; गालाति ३:२९ 14धारमाबिधि पालान् काचोक्चिङा एडोक् चामारसिङा ओटोगुटु भोनेम्टे बिस्वास काम लाहाब् लिनिना हिट्नुङ् माङ्हाङ्ङाना चामारसिङा चा बिथाँङाना लियुक्॥#गालाति ३:१८ 15पोङ्भोने धारमाबिधि पालान् ओचोगुन्गा याप्मिचिङि माङ्हाङ्ङाना ओरेक् ठायुक्॥ टरो हिट्नि धारमाबिधि वाइना भोने, हिट्नि पाप चा लिनिना॥
16नाड्डेउङ् ना चामारसिङा बिस्वासलाम्मा टायुक्॥ ना चामारसिङा माङ्हाङ्ङा आनि खेरोक् डोक् आपिडेसे॥ हिट्नुङ् ना चामारसिङा आब्राहामङागा ख्वाप्पा पुङ्लाचिगा लोङ्सा पाक्का चोगुएसुए॥ ना चामारसिङाम्बाक् धारमाबिधि पालान् काचोक्चि लोङ्सा एडोक् माखाक्, टरो आब्राहाम गाड्डे बिस्वास काचोक्चि ख्वाप्पा लोङ्सा चा ए, पोङ्भोने आब्राहामबाक् आनि सोब्बेङाना टुबाठेबा ए॥#गालाति ३:७ 17पोङ्भोने नाड्डे चा माङ्हाङ्ङा उन् लोडुए, “आङा खान् जोम् याप्मिचिगा टुबाठेबा चोक्नाइने॥”#उत्पति १७:५ आब्राहामङा माङ्हाङ्ङि बिस्वास चोगुए, हिट्नुङ् माङ्हाङ्ङाना ओनाभाक्ङि उन् आनि सोब्बेङाना पाबा लिसे॥ माङ्हाङ्ङा डोक् उसियागा चा उहिङ्ग्वाट् चोगुचिचि, हिट्नुङ् सिरिस्टि डोक् उलिनिगेट्निगा थोक्चि चा माट्टुङ् डोक् सिरिस्टि चोगुटु॥ 18-19माङ्हाङ्ङा आब्राहाम लोडुए, “काछालेट्चि जोम् उलियुक्,”#उत्पति १५:५ टरो आब्राहामङा उन् आप्पेलाम्मा उइछाचि लिमा आड्डिक् पासिङ् लिसाना रिङ् ठाहा टोगुए, पोङ्भोने उन्ङा साए बारखा टेप्मा टामा हिडुएसुना॥ ओटालिमाङ् साराङाना चा ओओ पोङ्माना बेला पाक्टुडिसुना डाना॥ नागा सोब्बे रिङ्लाम्मा जोम् याप्मिचिगा पाबा लिमा हिनिङ्ना रिङ् ठाहा टोगु चा आब्राहाम बिस्वासङि कामजोर लिनेट्नि॥ उन्ङा बिस्वास चोगुयाक्टुए हिट्नुङ् आसा चोगुयाक्टुए॥#उत्पति १७:१७ 20आब्राहामङा माङ्हाङ्ङा चोगुना चामारसिङा काइले चा साङ्का चोग्वाट्टुन्, टरो बिस्वासङि झान् बोल्लेउ लिसे॥ हिट्डेउङ् उन्ङा माङ्हाङ् मान् चोगुए॥ 21हिट्नुङ् माङ्हाङ्ङा चोगुना चामारसिङा छेम्बा डोक् पुरो चोगुटु नुङ् आब्राहाम लाउङ्सा पाक्का डाना॥ 22हिड्डेउङ् आब्राहामङा चोगुना बिस्वासङा माङ्हाङ्ङा उन् धारमोति याप्मि नुङ् लाडुए॥
23हाट्ले ना रिङ् “माङ्हाङ्ङा आब्राहाम धारमोति याप्मि नुङ् लाडुए” नुङ् आब्राहाम लोङ्सा एडोक् छेप्टाना माखाक्॥ 24टरो ना रिङ्उम्बाक् आनि लाउङ्सा चा छेप्टाना ए॥ आनि टाङ्बा येसु सियानालाम्मा उहिङ्ग्वाट् काचोक् माङ्हाङ्ङि आनि बिस्वास चोगुम्टुम् भोने, उन्ङा आनि धारमोति नुङ् आलाड्युक्॥ 25ना येसु डोक् आनि पाप लाउङ्सा माङ्हाङ्ङा सिमा पाङ्सुए हिट्नुङ् माङ्हाङ्ङा ओनाभाक्ङि आनि धारमोति चोक्माउङ्सा येसु सियानालाम्मा उहिङ्ग्वाट् चोगुए॥#यासैया ५३:४-५
Currently Selected:
रोमि 4: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
