रोमि 5
5
बिस्वासङा खुसि टाडुटु
1नाड्डेउङ् आनि चोगुम्ना बिस्वासङा माङ्हाङ् सोरि आनि धारमोति लिसेसे॥ हिट्नुङ् आनि डाङ्बा येसु खिरिस्टङा चोगुनाँ माङ्हाङ्लोक् आनिना साम्बान्धा ओचेट्नुना लिसेसे॥ 2येसु खिरिस्टङि आनि बिस्वास चोगुम्नाङा माङ्हाङ्ङा उन्ङाना मायादाया आनि आनिमेट्टेसे, हिट्डेउङ् हाट्ले आनि टोगुम्ना माङ्हाङ्ङाना मायादाया ठाहा टोगुम्टुम्॥ हिट्नुङ् आन्याँ निङ्ग्वाङि डोक् खुसि लिसिटिङा, पोङ्भोने माङ्हाङ्ङा उन्ङाना माहिमाङि आनि साहाभागि आचोक्युक् नुङ् आनि आसा चोगुम्टुम्॥ 3हिट्टेप्मा एडोक् माखाक्, याङ्छामाङि चा आन्याँ निङ्ग्वाङि डोक् खुसि लिसिटिङा, पोङ्भोने याङ्छामा टोगुम्नाँ याङ्छामाङा आङ्मा हिमाना बोल् आपियुक् नुङ् आन्याँ ठाहा टोगुएसुम्मे॥ 4हिट्नुङ् याङ्छामा आङ्मा हिमाना बोल्ङा ओचेट्नुना चाट्ला लिसाना याप्मि आचोक्युक्॥ हिट्नुङ् ना ओचेट्नुना चाट्लाङा आनि आसा आड्डिक् बोल्लेउ चोगुटु॥ 5हिट्नुङ् आनि चोगुम्ना आसाङा निरासा आचोक्निना, पोङ्भोने माङ्हाङ्ङा आनि औधि माया आचोक्ना रिङ् उन्ङा आपिडाना सेङ्सेङ्ना हाङ्सालाम्मा आनि ठाहा टोगुम्टुम्॥
6छेम्बा डोक्, पाइले आनि पापलाम्मा छुट्कारा टोक्मा आनि पाक्चा चोक्मा हिनेट्निम्॥ टरो जब माङ्हाङ्ङा टोङ्सुना बेला टाए, खिरिस्ट आनि पापि याप्मिचि लोङ्सा सिए॥ 7हाट्ले धारमोति याप्मि लोङ्सा सिमा कोन्ना याप्मि टोक्मा आड्डिक् टुक्युक् होला, हिट्नुङ् चा छेम्बा डोक् नुना याप्मि लाउङ्सा कोइ याप्मि सिमा आँट् चोक्मा हिडुटु॥ 8टरो आनि पापि लिसिनाँ डोक् माङ्हाङ्ङा खिरिस्ट आनि लाउङ्सा सिमा पाङ्सुङ् उन्ङा औधि माया आचोक्ना रिङ् आनिमेट्टे॥ 9हिट्डेउङ् छेम्बा डोक् खिरिस्टङा माङ्हाङ्ङाना ओयाग्लाम्मा आनि आहिङ्ग्युक्, पोङ्भोने हाट्ले आनिम्टे खिरिस्टङाना ओहेलिक्लाम्मा माङ्हाङ् सोरि धारमोति लिसेसे॥ 10पोङ्भोने आनि माङ्हाङ्ङाना ओसाट्टुर लिसिना बेला डोक् उन्ङा उइछा आनि लाउङ्सा सिमा पाङ्सुङ् आनि ओसाइबाचि आचोगेसे॥ छेम्बा डोक्, हाट्ले आनि ओसाइबाचि लिसिनाँ आनि उन्ङा उइछाङाना ओचोलालाम्मा आहिङ्युक्॥ 11हिट्नुङ् नाटेप्मा एडोक् माखाक्, माङ्हाङ्ङि आनि आनान्दा चोक्मा हिडुम्टुम्, पोङ्भोने हाट्ले आनि डाङ्बा येसु खिरिस्टङा माङ्हाङ्ङाना ओसाइबाचि आनि आचोगाइसे॥
आदाम हिट्नुङ् खिरिस्ट
12पाइलेना याप्मि आदामलाम्मा नाराङि पाप टाए, हिट्नुङ् हिट्ना पापङा सिमाना रिङ् टाडुए॥ नाड्डेउङ् ख्वाप्पा याप्मिचिङि सिमाना रिङ् टाए, पोङ्भोने ख्वाप्पा याप्मिचिङा पाप ओचोगुए॥#उत्पति ३:६ 13माङ्हाङ्ङा मोसा धारमाबिधि पिमा पाइले डोक् नाराङि पाप डाना, टरो धारमाबिधि वाइना भोने माङ्हाङ्ङा पापङाना हिसाबकिताब चा चोगुन्ना॥ 14आदाम ओबेला नुङ् धारमाबिधि काछेप् मोसाङा ओबेला सोम्मा ख्वाप्पा याप्मिचि उसिए॥ आदामङाम्बाक् माङ्हाङ्ङाना आग्याँ पालान् चोग्वाट्टुन् नुङ् उन् सिए, टरो आरु याप्मिचिङा आदामङा चोगुना गाड्डेना पाप ओचोग्वाट्टुन् चा हिट्नागा आझै चा उसिए॥
आदामबाक् हान्डेङ् टाना खिरिस्टङाना उरुप् डाना॥ 15टरो माङ्हाङ्ङा आनि आपिडाना मायादायाङाना बारदान आदामङाना पाप गाड्डेना माखाक्॥ पोङ्भोने ठिबाङ् याप्मि आदामङा चोगुना पापङा जोम् याप्मिचि उसिए॥ टरो माङ्हाङ्ङा आनि आपिडाना मायादायाङाना बारदानम्बाक् हिट्ना आदामङाना पाप नुङ्ना चा आड्डिक् ठेना ए, हिट्नाम्बाक् ठिबाङ् याप्मि येसु खिरिस्टलाम् सोब्बे याप्मिचिङा ओटोगुएसुए॥ 16हिट्नुङ् माङ्हाङ्ङा आपिडाना बारदान लोक् आदामङाना पापङा टाडुना रिङ् पाक्चा टोङ्निना॥ पोङ्भोने ठिबाङ् याप्मिङा चोगुना पापङा ख्वाप्पा याप्मिचिङि साजाए टाडुए, टरो याप्मिचिगा जोम् पाप लिसा चा माङ्हाङ्ङाना बारदानङा टुगुडिसुए, हिट्नुङ् उन्ङाना ओनाभाक्ङि याप्मिचि धारमोति चोगुचे॥ 17ठिबाङ् याप्मि आदामङा चोगुना पापङा सोब्बे याप्मिचि सिमा कोन्ना लिसे॥ टरो माङ्हाङ्ङाना मायादाया लोक् धारमिक्ताङाना बारदान ओटोगुगा याप्मिचिङा छेम्बाना चोला ओटोगुटु हिट्नुङ् ठिबाङ् याप्मि येसु खिरिस्टलाम्मा सासान् ओचोगुटु॥
18हिट्डेउङ् आदामङा चोगुना ठिक् पापङा सोब्बे याप्मिचिङि साजाए टाडुए, हिट्नाडेडोक् खिरिस्टङा चोगुना ठिक् ओचेट्नुना टोॽवाङा सोब्बे याप्मिचि माङ्हाङ् ओटोकानाङि फाट्टुर मालेना उलियुक् हिट्नुङ् ओछोङ्ग्वाट् चोला ओटोगुटु॥ 19पोङ्भोने ठिबाङ् याप्मि आदामङा माङ्हाङ्ङाना आग्याँ पालान् चोग्वाट्टुन्नाँ जोम् याप्मिचि पापि उलिसे, हिट्नाडेडोक् ठिबाङ् याप्मिङा माङ्हाङ्ङाना आग्याँ पालान् चोगुनाँ जोम् याप्मिचि माङ्हाङ् ओटोकानाङि धारमोति उलियुक्॥
20याप्मिचि आप्पेङा इम्टेप्मा औधि पाप ओचोगुएना हिट्ना रिङ् ठाहा ओटोगुवाक् नुङ् माङ्हाङ्ङा हिट्नागा धारमाबिधि पिडुचे॥ टरो याप्मिचिगा पाप पोया चा माङ्हाङ्ङा कायाङ्छाबाचि उन्ङाना मायादाया औधि याप्मा निमेट्टुचे॥ 21हिट्नुङ् पाइले पाप आड्डिक् बोल्लेउ डाना, हिट्नाड्डेउङ् ख्वाप्पा याप्मिचिङा पाप ओचोगुए हिट्नुङ् उसिए॥ पोङ्भोने हाट्ले येसु खिरिस्टङि भोरोसा ओचोगुगा ख्वाप्पा लाउङ्सा माङ्हाङ्ङाना मायादाया आड्डिक् साक्तिसालि ए, हिट्नुङ् हिट्नागा माङ्हाङ्ङा धारमोति चोगुचिचि॥ हिट्नुङ् आनि टाङ्बा येसु खिरिस्टलाम्मा हिट्नागा उन्ङा लाट्निना चोला पिडुचिचि॥
Currently Selected:
रोमि 5: APH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
